தொடர் மழையால் நிரம்பும் தருவாயில் செடியன் குளம் (படங்கள்)

அதிரை நியூஸ்: டிச.05

அதிராம்பட்டினத்தில் கடந்த புதன்கிழமை அதிகாலை முதல் இரவு பகலாக இடைவிடாது பரவலாகத் தொடா்ந்து மழை பெய்து வருவதால், அதிராம்பட்டினத்தில் வெள்ளிக்கிழமை காலை 7 மணியுடன் முடிவடைந்த கடந்த 24 மணி நேரத்தில் 80.4 மி.மீ, வியாழக்கிழமை காலை 7 மணி முதல் மாலை 4 மணி வரை 13.4 மி.மீ, புதன்கிழமை காலை 7 மணியுடன் முடிவடைந்த கடந்த 24 மணிநேரத்தில் 77.1 மி.மீ மழை பதிவாகியது.

இந்நிலையில், தொடர் மழையால் சுமார் 3 ஹெக்டர் 39 ஏர்ஸ் பரப்பளவு கொண்ட செடியன் குளத்திற்கு மழைநீர் வர துவங்கியது. தற்போது குளத்தில் பொதுமக்கள் குளித்து மகிழும் அளவில் போதுமான தண்ணீர் நிறைந்து காணப்படுவதால், பொதுமக்கள் தினமும் ஆர்வத்துடன் குளித்து வருகின்றனர். இன்னும் சில தினங்கள் மழை நீடித்து பெய்தால் குளம் நிரம்பி தண்ணீர் வழிந்து ஓடும் நிலையை எட்டிவிடும்.

இதுஒருபுறமிருக்க, செடியன் குளக்கரையில் படர்ந்து காணப்படும் புதர்களையும், தேவையற்று வளர்ந்து காணப்படும் செடி கொடிகளையும் அகற்றவும், பெண்கள் குளிக்கும் கரையை சுற்றி பிரதியோகமாக தடுப்புவேலி ஏற்படுத்தவும் சமூக ஆர்வலர்கள் கோரிக்கை விடுத்துள்ளனர்.

இதுதவிர, செடியன் குளத்திலிருந்து நிரம்பி வழியும் தண்ணீர் அருகில் உள்ள தாழ்வான பகுதியாக இருக்கும் பிலால் நகர் குடியிருப்பில் புகாதவாறு முன்னேற்பாடுகளை செய்யவும் கோரிக்கை எழுந்துள்ளது.

தற்போது ஏரி போல் காட்சியளிக்கும் செடியன் குளத்தின் புகைப்படங்கள் இதோ உங்களின் பார்வைக்கு.

மின்னொளியில் ஜொலிக்கும் செடியன் குளம்!

அதிராம்பட்டினம், டிச.08
அதிராம்பட்டினத்தின் பொக்கிஷங்களில் ஒன்று செடியன் குளம். சுமார் 3 ஹெக்டர் 39 ஏர்ஸ் பரப்பளவைக் கொண்டது. மிகவும் பழமை வாய்ந்தது. வரலாற்று சிறப்பு மிக்கது. இக்குளத்தில் நீர் நிரம்பிக் காணப்படும்போது, அதிராம்பட்டினம் மற்றும் சுற்றுவட்டார அனைத்து சமுதாயப் பொதுமக்கள் நீராடி மகிழ்ந்து வருவர். மேலும், ஆடு மாடுகள், பறவைகள் நீர் அருந்தி செல்வதற்கும், சுற்றுச்சூழல் பாதுகாப்பிற்கும், நீர் ஆதாரத்தை பெருக்குவதற்கும் இக்குளம் உதவி வருகிறது.

பல ஆண்டுகள் இடைவெளிக்குப் பின் செடியன்குளம் தண்ணீரால் நிரம்பி வழிந்தோடியது. இரவில் இப்பகுதி முழுவதும் இருளில் மூழ்கிக் காணப்பட்டது. இதனால் இப்பகுதி வழியே செல்லும் பொதுமக்கள் பெரும் அச்சத்துடன் கடந்து சென்றனர். வாகன ஓட்டிகளும் பெரும் சிரமத்திற்கு ஆளாகினர்.

இந்நிலையில், அதிராம்பட்டினம் மேலத்தெரு தாஜுல் இஸ்லாம் இளைஞர் சங்கம் (TIYA) அமைப்பின் சார்பில், செடியன் குளக்கரையில் மின் விளக்கு அமைக்கப்பட்டது. இதனால், இரவில், குளக்கரை முழுவதும் ஒளி படர்ந்து மின்னொளியில் ஜொலிக்கிறது.

மின் விளக்கு வழங்கிய சமூக ஆர்வலர் அதிரை சம்சுல் ரஹ்மான் மற்றும் தனது நிதியில் மின் விளக்கை அமைத்துக்கொடுத்த TIYA அமைப்புக்கும், இப்பகுதியினர் மிகுந்த மகிழ்ச்சியுடன் நன்றி தெரிவித்தனர்.

 

கவனம் தேவை: நிரம்பி வழியும் நிலையில் செடியன் குளம் (படங்கள்)

அதிரை நியூஸ்: நவ.30
இறைவனின் பேரருளால் மிக நீண்ட பல ஆண்டுகள் இடைவெளிக்குப் பின் செடியன்குளம் நிரம்பி வழியும் நிலையை எட்டியுள்ளது. செடியன்குளம் கடந்த மாதத்தில் தூர்வாரி ஆழப்படுத்தப்பட்டுள்ளதையும் அறிவீர்கள்.

கடந்த இரு நாட்களாக நமதூரில் பெய்துவரும் தொடர்மழை மேலும் நீடித்தால் செடியன்குளம் இன்றிரவோ அல்லது நாளையோ நிரம்பி வழியக்கூடும். இவ்வாறு வழியும் நீர் பிலால் நகரையே மேலும் வெள்ளமாய் சூழ்ந்து நிற்கும்.

இது ஒருபுறமிருக்க...

தற்போதுள்ள செடியன்குளத்தின் கரைகள் மிக மிக ஆழமானவை என்பதுடன் வழுக்கும் தன்மையும் கொண்டவை. எனவே, நீச்சல் தெரியாதவர்கள் மற்றும் சிறுவர்கள் செடியன்குளத்தில் குளிக்காமல் தவிர்ந்து கொள்வது நல்லது. இவ்விஷயத்தில் பெற்றோர்கள் அதிக கவனம் செலுத்துவது மிக மிக அவசியம், அவசரம்.

அதிரை அமீன்

 

செடியன் குளத்துக்கு ஆற்று நீர் வருகை!

அதிராம்பட்டினம், நவ.02
அதிராம்பட்டினம் செடியன் குளத்துக்கு ஆற்று நீர் இன்று (நவ.02) சனிக்கிழமை மாலை வரத் தொடங்கியது.

மழைக்காலத்தில், செடியன் குளத்துக்கு வரும் நீரை முழுமையாக தேக்கினால், குளக்கரை உடைந்து விடும் சூழல் ஏற்பட்டதால், பருவமழை பெய்வதற்கு முன்னதாக, பெரிய ஜும்மா பள்ளிவாசல் நிர்வாகம் சார்பில், செடியன் குளத்தை தூர் வாரி கரையை பலப்படுத்தி இருந்தனர். மேலும், மழையின் போது குளத்தின் சுற்றுப்புறப் பகுதியில் இருந்து வெளியேறும் உபரி நீரை குளத்தில் நிரப்பும் வகையில் வடிகால் அமைக்கப்பட்டு இருந்தது.

இந்நிலையில், அதிராம்பட்டினம் மற்றும் சுற்றுப்புற பகுதியில், அவ்வப்போது பலத்த மழை பெய்தது. கடந்த ஒரு மாதத்தில் மட்டும், அதிராம்பட்டினத்தில் 377.60 மி.மீ (38 செ.மீ) மழை பதிவாகியது. இதனால், குளத்திற்கு மழை நீர் மளமளவென வரத் தொடங்கியது. இருந்தபோதிலும், குளம் முழுமையாக நிரம்பவில்லை. குளத்தில் மூன்றில் இரண்டு பங்கு மட்டுமே நீர் நிரம்பி இருந்தது.

இந்நிலையில், மேலத்தெரு தாஜுல் இஸ்லாம் சங்கத்தின் சார்பில்,  மகிழங்கோட்டை பெத்தையன் குளம் ~ செடியன் குளம் வால்வீச்சு வரையிலான ஆற்றுநீர் வழித்தட பாதையை ஜெசிபி இயந்திரத்தின் உதவியோடு தூர் வாரி சீரமைக்கும் பணி மேற்கொள்ளப்பட்டன. இதையடுத்து, நீர்நிலை பாதுகாப்பு அறக்கட்டளை நிறுவனத் தலைவர் எஸ்.எச் அஸ்லம் மற்றும் தாஜுல் இஸ்லாம் இளைஞர் சங்க நிர்வாகிகள், உறுப்பினர்கள், நீர்நிலை ஆர்வலர்கள் ஆகியோர் கல்லணை கால்வாயிலிருந்து வரும் ஆற்று நீரை ராஜாமடம் தாய் வாய்க்கால் மூலம், மகிழங்கோட்டை பெத்தையன் குளம் வழியாக கொண்டு வந்து குளத்தில் நிரப்பும் பணியில் தீவிரமாக ஈடுபட்டனர்.

இப்பணிக்காக, அதிராம்பட்டினம் பேரூராட்சி துப்புரவுப் பணியாளர்கள் 2 பேர் உதவியுடன், 10 க்கும் மேற்பட்ட தாஜுல் இஸ்லாம் இளைஞர் சங்க களப்பணியாளர்கள் ஆற்று நீர் வழித்தடத்தில் ஏற்பட்டுள்ள அடைப்பு, உடைப்புகளை கண்காணித்து சீர் செய்தனர். வழித்தடத்தில் உள்ள முட்புதர்களை அகற்றினர். இதையடுத்து, செடியன் குளத்துக்கு ஆற்று நீர் இன்று (நவ.02) சனிக்கிழமை மாலை வரத் தொடங்கியது.

  

 

  

மழைநீர் சேகரிப்பில் முன்னுதாரணமாகத் திகழும் செடியன் குளம் (படங்கள்)

அதிராம்பட்டினம், அக்.02
அதிராம்பட்டினத்தின் பொக்கிஷங்களில் ஒன்று செடியன் குளம். சுமார் 3 ஹெக்டர் 39 ஏர்ஸ் பரப்பளவைக் கொண்டது. மிகவும் பழமை வாய்ந்தது. வரலாற்று சிறப்பு மிக்கது. இக்குளத்தில் நீர் நிரம்பிக் காணப்படும்போது, அதிராம்பட்டினம் மற்றும் சுற்றுவட்டார அனைத்து சமுதாயப் பொதுமக்கள் நீராடி மகிழ்ந்து வருவர். மேலும், ஆடு மாடுகள், பறவைகள் நீர் அருந்தி செல்வதற்கும், சுற்றுச்சூழல் பாதுகாப்பிற்கும், நீர் ஆதாரத்தை பெருக்குவதற்கும் இக்குளம் உதவி வருகிறது.

அதிராம்பட்டினம் பெரிய ஜும்மா பள்ளிவாசல் நிர்வாகப் பராமரிப்பில் இருந்து வரும் இக்குளத்தை, ஜமாத் நிர்வாகம் சார்பில், தமிழக அரசின் மழை சேகரிப்புத் திட்டத்தை செயல்படுத்த முன்வந்ததையடுத்து, குளத்தை தூர் வாரி கரையை பலப்படுத்தும் பணி கடந்த ஒரு மாதமாக தீவிரமாக நடந்து முடிந்தது. இப்பணிக்காக ஜே.சி.பி, டிராக்டர் வாகனங்கள் பயன்படுத்தப்பட்டன.

இந்நிலையில், கடந்த (செப்.30) திங்கட்கிழமை அதிகாலை அதிராம்பட்டினம் மற்றும் சுற்றுப்புற பகுதியில் பலத்த மழை பெய்தது. அதிராம்பட்டினத்தில் மழையின் அளவு 89 மி.மீ பதிவாகியது. குளத்தின் சுற்றுப்புறப் பகுதியில் இருந்து வெளியேறும் மழை நீரை குளத்தில் நிரப்பும் வகையில் வடிகால் அமைக்கப்பட்டு உள்ளதால், குளத்திற்கு மழை நீர் மளமளவென நிரம்பத் தொடங்கியது. இதையடுத்து, மழைநீர் நிரம்பிய குளத்தில் அதிராம்பட்டினம் மற்றும் சுற்றுப்புற பகுதி பொதுமக்கள் ஆர்வமுடன் குளித்து மகிழ்கின்றனர். மேலும், ஜமாத் நிர்வாகம் சார்பில், குளத்தை சுற்றி மரக்கன்றுகளை நட்டு பராமரிக்க திட்டமிட்டுள்ளனர்.

தமிழக அரசின் மழைநீர் சேகரிப்பு திட்டத்தை செயல்படுத்தி, பிறருக்கு முன்னுதாரணமாகத் திகழும் ஜமாஅத் நிர்வாகிகளுக்கு, மாவட்ட ஆட்சியர் விருது வழங்கி பாராட்டு தெரிவிக்கவேண்டும். அரசின் சார்பில், குளத்தை சுற்றி தடுப்புச் சுவர் எழுப்பி, மின் விளக்கு வசதி ஏற்படுத்தி கொடுக்க வேண்டும். குளத்தின் பெண்கள் மற்றும் ஆண்கள் குளிக்கும் கரைகளில் படித்துறை அமைத்துக்கொடுக்க வேண்டும் என்பன உள்ளிட்டவை பொதுமக்களின் கோரிக்கையாக இருக்கிறது.