அதிராம்பட்டினம், செப். 24
தஞ்சாவூர் மாவட்டம், அதிராம்பட்டினத்தில் பல ஆண்டுகளாக ஓதப்பட்டு வரும் புகாரி சரீப் மஜ்லிஸ், கடந்த ஆக.12 ந் தேதி தொடங்கி நடைபெற்று வந்தது.
அதிராம்பட்டினம் அல் மதரசத்துர் ரஹ்மானியா அரபிக் கல்லூரி முதல்வர் மவ்லவி கே.டி முஹம்மது குட்டி தலைமையில், 40 நாட்கள் நடைபெற்ற இந்நிகழ்ச்சியில், இஸ்லாமிய மார்க்க அறிஞர்களின் சிறப்பு சொற்பொழிவு, துஆ, திக்ரூ நடைபெற்றது. இதில், அதிராம்பட்டினம் சுற்றுப்புற பகுதியை சேர்ந்த பெண்கள் உட்பட 1000 த்திற்கு மேற்பட்ட இஸ்லாமியர்கள் பங்கேற்றனர். தினமும் மஜ்லீஸ் முடிவில் அனைவருக்கும் தப்ரூக் உணவு பொட்டலங்கள் வழங்கப்பட்டது.
இந்நிலையில், இதன் நிறைவு நாள் நிகழ்ச்சி இன்று (செப்.24) திங்கட்கிழமை காலை நடைபெற்றது. இதில் அதிராம்பட்டினம், அல் மதரசத்துர் ரஹ்மானியா அரபிக் கல்லூரி முதல்வர் மவ்லவி கே.டி முஹம்மது குட்டி தலைமை வகித்து இஸ்லாமிய மார்க்க விளக்க சொற்பொழிவு ஆற்றினார். முடிவில் சிறப்பு துஆ ஓதப்பட்டன. இந்நிகழ்ச்சியில் பெண்கள் உட்பட ஏராளமானோர் கலந்துகொண்டனர்.
நிகழ்ச்சியின் தொடக்கமாக, இன்று அதிகாலை சுபுஹு தொழுகைக்கு பின் திக்ரு மஜ்லிஸ் நடைபெற்றது. இதில் இஸ்லாமிய மார்க்க அறிஞர்கள், தொழுகையாளிகள் பலர் கலந்துகொண்டனர்.
நிகழ்ச்சி ஏற்பாட்டினை அதிராம்பட்டினம் அஜ்ஜாவியத்தூஸ் ஷாதுலியா நிர்வாக கமிட்டியினர் எம்.பி அபூபக்கர், சேக் அலி உள்ளிட்ட நிர்வாகிகள் செய்தனர்.
மஜ்லீஸ் துளிகள்:
1. மஜ்லிஸில் அதிராம்பட்டினம், அல் மதரசத்துர் ரஹ்மானியா அரபிக் கல்லூரி முதல்வர் மவ்லவி கே.டி முஹம்மது குட்டி, பேராசிரியர்கள் மவ்லவி முகமது நெய்னா, மவ்லவி தேங்கை சர்புதீன், மவ்லவி அப்துல் ஹாதி முப்தி, மவ்லவி சபியுல்லா அன்வாரி, மவ்லவி தமிமுன் அன்சாரி உள்ளிட்ட மார்க்க அறிஞர்கள் சொற்பொழிவு ஆற்றினார்கள். இதில், நல்லொழுக்கம், இறை நம்பிக்கை, ரசூல் (ஸல்) முஹ்ஹபத், சமூக நல்லிணக்கம், ஆரோக்கியம், நீண்ட ஆயுள், இயற்கை பேரிடர் மற்றும் நோயிலிருந்து பாதுகாப்பு, மழை வேண்டி உள்ளிட்டவை குறித்து இடம்பெற்றது.
2. தொடர்ந்து தினமும் 40 நாட்கள் நடைபெற்று வந்த மஜ்லீஸ் நிகழ்ச்சியில் சராசரியாக பெண்கள் உட்பட 1000 பேர் வரை கலந்துகொண்டு சிறப்பித்து வந்தனர். குறிப்பாக விடுமுறை தினங்களில் கூட்டம் அதிகமாகக் காணப்படும்.
3. பெண்களுக்கும், சிறுவர்களுக்கும் ஜாவியா நிர்வாககத்தின் சார்பில் தனித்தனி இடவசதி ஏற்பாடு செய்யப்பட்டிருந்தது. பெண்கள் அனைவரும் கடந்த வருடத்தை போல் அருகில் உள்ள காதிர் முகைதீன் பெண்கள் மேல்நிலைப்பள்ளி வளாகத்தில் அமர வைக்கப்பட்டனர்.
4. அதிராம்பட்டினம் அஜ்ஜாவியத்தூஸ் ஷாதுலியா நிர்வாக கமிட்டி சார்பில் 6 ஆயிரம் உணவு பொட்டலங்கள் தயாரிக்கப்பட்டு, நிகழ்ச்சியில் கலந்துகொண்ட பெண்கள், சிறுவர்கள் உட்பட அனைவருக்கும் வழங்கப்பட்டன.
5. கடந்த வருடங்களைப் போல் இந்த வருடமும் உணவு பொட்டலங்களில் பயன்படுத்தப்படும் ப்ளாஸ்டிக் பைகளை நிர்வாகக் கமிட்டியினர் தவிர்த்துக்கொண்டனர்.
6. உணவு பொட்டலங்கள் பேக்கிங் மற்றும் விநியோகம், ஹதியா நிதி வசூல் உள்ளிட்ட பணிகளில் உள்ளூர் தன்னார்வலர்கள் 100 பேர் ஆர்வத்துடன் ஈடுபட்டனர்.
