அதிராம்பட்டினம் அடுத்து கிருஷ்ணாஜிபட்டினம் அருகில் உள்ள திருமங்கலப்பட்டினத்தில் புதிதாக கட்டி முடிக்கப்பட்ட முகைதீன் ஜும்மா பள்ளிவாசல் திறப்பு விழா நிகழ்ச்சி வியாழக்கிழமை நடைபெற்றது.
விழாவிற்கு, திருமங்கலப்பட்டினம் ஜமாஅத் தலைவர் கே.எம் ஹபீப் முகமது தம்பி தலைமை வகித்தார். தமிழ்மாநில ஜமாத்துல் உலமா சபை தலைவர் பேராசிரியர் பி.ஏ காஜா முயீனூத்தீன் பாக்கவி புதிய பள்ளிவாசலை திறந்து வைத்து வாழ்த்துரை வழங்கினார்.
மேலும், இஸ்லாமிய மார்க்க அறிஞர்கள் பலர் கலந்துகொண்டு சிறப்பு சொற்பொழிவு நிகழ்த்தினர். பள்ளி திறப்பு விழா நிகழ்ச்சியில் திருமங்கலப்பட்டினம், கிருஷ்ணாஜிபட்டினம், பி.ஆர் பட்டினம் உள்ளிட்ட பகுதிகளை சேர்ந்த இஸ்லாமியர்கள் பலர் கலந்து கொண்டனர்.
சிறப்பு அழைப்பின் பேரில், அதிராம்பட்டினம் அகமது அன்வர் கலந்துகொண்டு மஹ்ரிப் தொழுகைக்கான பாங்கொலியை எழுப்பி னார். விழாவில், அதிராம்பட்டினம் தக்வா பள்ளிவாசல் டிரஸ்ட் முன்னாள் பொருளாளர் முகமது ஜமீல், இந்திய யூனியன் முஸ்லீம் லீக் தஞ்சை தெற்கு மாவட்ட ஊடகப்பிரிவு பொறுப்பாளர் அதிரை ஏ.சாகுல் ஹமீது உள்ளிட்டோர் கலந்துகொண்டனர்.
விழாவில், திருமங்கலப்பட்டினம் ஜமாஅத் தன்னார்வலர்கள் வாகன நெருக்கடியை சீர் செய்வது, தொழுகையாளிகளுக்கு குளிர்பானம், தண்ணீர், உணவு வழங்குவது, இடத்தில் அமரவைப்பது உள்ளிட்ட பணிகளில் ஈடுபட்டனர்.
இதன்பின்னர், பெண்களுக்கான சிறப்பு சொற்பொழிவு நிகழ்ச்சி நடைபெற்றது. இதில், பெண்கள் ஏராளமானோர் கலந்துகொண்டனர்.
விழா ஏற்பாட்டினை திருமங்கலப்பட்டினம் ஜமாஅத் ஜமாத்தார்கள், பள்ளிவாசல் நிர்வாகக் கமிட்டியினர் செய்திருந்தனர்.
