மகிழங்கோட்டையில் நுண்ணீர் பாசனத் திட்டத்தில் புதிய தென்னங்கன்றுகள் நடவு (படங்கள்)

அதிராம்பட்டினம், மார்ச் 17
அதிராம்பட்டினம் அடுத்துள்ள மகிழங்கோட்டையில் கஜா போலாள் பாதிக்கப்பட்ட தென்னை விவசாயிகளின் வாழ்வாதாரத்தை மேம்படுத்தும் நுண்ணீர் பாசனத் திட்டத்தில் புதிய தென்னங்கன்றுகள் நடவு செய்யப்பட்டுள்ளதை மாவட்ட ஆட்சியர் ம.கோவிந்த ராவ் நேரில் பார்வையிட்டு ஆய்வு செய்தார். அருகில், பட்டுக்கோட்டை சார் ஆட்சியர் கிளாஸ்டன் புஸ்பராஜ், வேளாண்மை இணை இயக்குநர் ஜஸ்டின், பட்டுக்கோட்டை தாசில்தார் அருள்பிரகாசம் மற்றும் பலர் உடன் இருந்தனர்.

 

அதிராம்பட்டினம் அருகே தீக்காயமடைந்த பள்ளி மாணவி சாவு!

அதிராம்பட்டினம், ஜூலை 16
அதிராம்பட்டினத்தை அடுத்த மகிழங்கோட்டை செட்டியப்பள்ளி பகுதியைச் சேர்ந்த கட்டடத் தொழிலாளி பாலசுப்பிரமணியனின் மகள் மகாதேவி (16). அதிராம்பட்டினத்தில் உள்ள மேல்நிலைப் பள்ளியில் பிளஸ் 1 வகுப்பு படித்து வந்தார்.

இவர் வயிற்று வலி நோயால் அவதிப்பட்டு வந்தார். இந்நிலையில், ஜூலை 10 ஆம் தேதி வீட்டிலிருந்த மகாதேவிக்கு வழக்கம் போல் வயிற்று வலி ஏற்பட்டதாம். அப்போது நோய்க் கொடுமை தாங்காமல் அவர் தனது உடலில் மண்ணெண்ணையை ஊற்றி தீயிட்டுக் கொண்டாராம்.

இதில் பலத்த காயமடைந்த மகாதேவி தஞ்சை மருத்துவக் கல்லூரி மருத்துவ மனையில் சேர்க்கப்பட்டு அங்கு சிகிச்சை பலனின்றி ஞாயிற்றுக்கிழமை (ஜூலை 15) காலை உயிரிழந்தார். இதுகுறித்த புகாரின் பேரில் அதிராம்பட்டினம் போலீஸார் வழக்குப் பதிந்து விசாரிக்கின்றனர்.

அதிராம்பட்டினம் அருகே ஆற்றில் அழுகிய நிலையில் இளம் பெண் பிணம் யார் அவர்? போலீசார் விசாரணை

அதிராம்பட்டினம், நவ.12
தஞ்சாவூர் மாவட்டம், அதிராம்பட்டினம் அடுத்துள்ள மகிழங்கோட்டை கிராமம் அருகே அக்கினி ஆற்றில் 30 வயது மதிக்கத்தக்க பெண்ணின் பிணம் ஒன்று அழுகிய நிலையில் கரை ஒதுங்கி கிடந்தது. இதுகுறித்து தகவல் அறிந்த அதிராம்பட்டினம் போலீசார் சம்பவ இடத்துக்கு வந்து விசாரணை நடத்தினர். பெண்ணின் உடல் அழுகிய நிலையில் இருந்ததால் அதிராம்பட்டினம் அரசு மருத்துவமனை டாக்டர்கள் அங்கு வரவழைக்கப்பட்டு அங்கேயே பிரேத பரிசோதனை செய்யப்பட்டது.

இதுகுறித்து ராஜாமடம் கிராம நிர்வாக அலுவலர் மணி கொடுத்த புகாரின் பேரில் அதிராம்பட்டினம் போலீசார் வழக்குப்பதிவு செய்து பிணமாக கிடந்த பெண் யார்? எந்த ஊரை சேர்ந்தவர்?, யாராவது இந்த பெண்ணை கொலை செய்து உடலை ஆற்றில் வீசி சென்றனரா? அல்லது ஆற்றில் அடித்து வரப்பட்டாரா? என பல்வேறு கோணங்களில் விசாரணை நடத்தி வருகின்றனர். 

மகிழங்கோட்டையில் பொது சுகாதாரத் துறையின் காய்ச்சல் தடுப்பு முகாம் !

அதிராம்பட்டினம், பிப்-11
பட்டுக்கோட்டை வட்டம், அதிராம்பட்டினத்தை அடுத்த மகிழங்கோட்டை கிராமத்தில் காய்ச்சல் நோய் ஏற்பட்டு அதிராம்பட்டினம் அரசு மருத்துவமனையில் பிப்ரவரி 2 மற்றும் 3-ந் தேதிகளில் 9 பேர் உள்நோயாளியாக அனுமதிக்கப்பட்டு சிகிச்சை பெற்று வந்தனர்.

தஞ்சாவூர் மாவட்ட ஆட்சித் தலைவர் அவர்களின் உத்தரவு படியும் தஞ்சாவூர் மாவட்ட துணை இயக்குநர், சுகாதார பணிகள் டாக்டர்.அ.சுப்ரமணி அவர்களின் அறிவுறுத்தல் படியும் மகிழங்கோட்டை கிராமத்தில் பொது சுகாதார துறையினர் காய்ச்சல் நோய்க்கு சிகிச்சை மற்றும் தடுப்பு நடவடிக்கை மேற்கொண்டு வருகிறார்கள்.

முகாமில் பட்டுக்கோட்டை வட்டார மருத்துவ அலுவலர் டாக்டர் கு.அறிவழகன் அவர்கள் தலைமையில் இராஜாமடம் ஆரம்ப சுகாதார நிலைய மருத்துவ அலுவலர் டாக்டர் ச.செந்தில்குமார், வட்டார சுகாதார மேற்பார்வையாளர் சா.சந்திரசேகரன், சுகாதார ஆய்வாளர்கள் வி.ரவிச்சந்திரன், கா.காசிநாதன், எஸ்.வி.முத்துசாமி, சி.வெங்கடேஷன் ஆகியோர் கலந்து கொண்டு காய்ச்சல் கண்டவர்களுக்கு சிகிச்சை அளித்தனர். மேலும் காய்ச்சல் பரவாமல் தடுக்க அப்பகுதிகளில் வீடுவீடாக சென்று காய்ச்சல் கண்காணிப்பு பணி மேற்கொள்ளப்பட்டது. கொசுவினால் பரவும் நோய்கள தடுக்க கொசுப்புழு ஒழிப்பு பணி மற்றும் ஊராட்சியுடன் இணைந்து ஒட்டு மொத்த தூய்மை பணி செய்து குப்பைகளை அகற்றினர்.

முதிர்வு கொசுக்களை அழிக்க புகை மருந்து அடிக்கப்பட்டது. காய்ச்சலை தடுக்க நிலவேம்பு குடிநீர் வழங்கப்பட்டது. நீரினால் பரவும் நோய்களை தடுக்க அனைத்து மேல்நிலை நீர் தொட்டிகளும் சுத்தம் செய்யப்பட்டது. குடிநீரில் குளோரின் உள்ளதா என ஆய்வு செய்யப்பட்டு வருகிறது. குடிநீர் குழாய் விரிசல் உள்ளதா என ஆய்வு செய்யப்பட்டது. மகிழங்கோட்டை, தொக்காலிக்காடு கிராமங்களில் உள்ள பள்ளிகள் மற்றும் அங்கன்வாடி மையங்களில் காய்ச்சல் நோய் கண்காணிக்கப்பட்டது. கிராமத்தில் காய்ச்சல் கண்ட 3 நபர்களுக்கு நோயின் தன்மை அரிய இரத்த மாதிரி மற்றும் இரண்டு குடிநீர் மாதிரிகள் சேகரிக்கப்பட்டு கும்பகோணம் பொது சுகாதாரதுறை ஆய்வகத்திற்கு பரிசோதனைக்கு அனுப்பப்பட்டுள்ளது. அரசு மருத்துவமனை, தனியார் மருத்துவமனை, ஆய்வகங்களில் தினசரி காய்ச்சல் கண்காணிப்பு பணி நடைபெற்று வருகிறது.

பொதுமக்களிடையே வட்டார மருத்துவ அலுவலர் டாக்டர். கு.அறிவழகன் அவர்கள் சுகாதார நலக்கல்வி வழங்கும்போது “காய்ச்சல் நோயால் பாதிக்கப்பட்டால் பொதுமக்கள் அருகில் உள்ள அரசு ஆரம்ப சுகாதார நிலையம் மற்றும் அரசு மருத்துவமனை சென்று சிகிச்சை பெற வேண்டும்.

சுயவைத்தியம் மற்றும் போலி மருத்துவரிடம் சென்று சிகிச்சை பெறக்கூடாது. குடிநீரை நன்கு கொதிக்க வைத்து ஆற வைத்து குடிக்க வேண்டும். ஈ மொய்த்த பண்டங்களையும் தரமில்லாத குளிர்பானங்களை அருந்த கூடாது. உள்ளாட்சி துறையினர் மாதம் இருமுறை குடிநீர் தொட்டிகளை தூய்மை செய்து குளோரின் கலந்து பாதுகாக்கப்பட்ட குடிநீர் வழங்க வேண்டும்.

காய்ச்சல், வாந்தி, வயிற்றுப் போக்கு, அம்மை போன்ற தொற்றுநோய் காணப்பட்டால் உடன் அருகில் உள்ள ஆரம்ப சுகாதார நிலையத்திற்கு தகவல் தெரிவிக்க வேண்டும்”. காய்ச்சல் கண்டு உள்நோயாளிகளாக அனுமதிக்கப்பட்ட நபர்கள் சிகிச்சை பெற்று நலமாக வீடு திரும்பி உள்ளனர். மேலும் பாதிக்கப்பட்ட கிராமத்தில் பொது சுகாதாரதுறையினர் முகாமிட்டு தொடர் கண்காணிப்பு பணி செய்து வருகின்றனர்.

 

மகிழங்கோட்டையில் பதுக்கி வைத்திருந்த 3000 போலி மதுபான பாட்டில்கள் பறிமுதல் !

அதிரை அருகே உள்ள மகிழங்கோட்டை கிராமத்தை சேர்ந்தவர் கே. பாலமுருகன் (26). இவர் காரைக்கால் உள்ளிட்ட பகுதிகளிலிருந்து மதுபானங்களை வாங்கி வந்து, அதில் தண்ணீர் கலந்து விற்பனை செய்து வருவதாக போலீஸாருக்கு ரகசிய தகவல் கிடைத்தது. அதன் பேரில் அதிராம்பட்டினம் போலீஸார் சனிக்கிழமை மாலை பாலமுருகன் வீட்டில் திடீர் சோதனை நடத்தினர் அப்போது வீட்டில் 3000 போலி மதுபான பாட்டில்கள் மறைத்து வைக்கப்பட்டிருப்பது தெரியவந்தது. இதையடுத்து அவற்றை போலீஸார் பறிமுதல் செய்தனர். பறிமுதல் செய்த போலி மதுபான பாட்டில்களின் மதிப்பு சுமார் ரூ. 3 லட்சம் இருக்கும் என்று போலீஸ் தரப்பில் கூறப்படுகிறது. மேலும் இதுகுறித்து அதிரை போலீஸார் வழக்குப் பதிந்து தலைமறைவான பாலமுருகனை தேடிவருகின்றனர்.

File Image

நன்றி: தினமணி