இந்தியன் ரெட் கிராஸ் சொசைட்டி சார்பில் 550 நிவாரணப் பெட்டகங்கள் வழங்கல்!

அதிரை நியூஸ்: ஏப்.22
இந்தியன் ரெட் க்ராஸ் சொசைட்டி சார்பில், 18 வகையான வீட்டு உபயோகப்பொருட்கள் அடங்கிய ரூபாய் 750 மதிப்பிலான நிவாரண பொருட்கள் அடங்கிய 550 நிவாரண பெட்டகங்களும், சென்னை தி புளு அம்பர்லா தொண்டு நிறுவனம் சார்பில் 500 முகக் கவசங்களும், சேவாலியா தொண்டு நிறுவன தஞ்சாவூர் கிளையின் சார்பில் கொரோனா  தடுப்பு பணியில் ஈடுபட்டுள்ள மருத்துவர்கள் மற்றும் மருத்துவ பணியாளர்களின் பயன்பாட்டிற்காக ரூபாய் 1,60,000 மதிப்பிலான 100 முழு பாதுகாப்பு கவச உடைகளும் தஞ்சாவூர் மாவட்ட ஆட்சித்தலைவர் ம.கோவிந்த ராவ் முன்னிலையில், தஞ்சாவூர் மண்டல கொரோனா தடுப்புக்குழு அலுவலர் எம்.எஸ்.சண்முகம் அவர்களிடம் வழங்கப்பட்டது. அப்போது, தஞ்சாவூர் மண்டல கொரோனா தடுப்புக்குழு காவல்துறை தலைவர் சாரங்கன் உடன் இருந்தார்.

முன்னதாக, மாவட்ட ஆட்சியர் அலுவலக வளாகத்தில் தமிழ்நாடு அரசின் சார்பில் வழங்கப்பட்ட புதிய 108 ஆம்புலன்ஸ் வாகனத்தினை மண்டல கொரோனா தடுப்பு அலுவலர் அவர்கள் பார்வையிட்டு துவக்கி வைத்தார்.

இந்நிகழ்வுகளின்போது தஞ்சாவூர் சரக காவல்துறை துணைத் தலைவர் லோகநாதன். தஞ்சாவூர் மாவட்ட காவல் கண்காணிப்பாளர் மகேஸ்வரன் ஆகியோர் உடன் இருந்தனர்.

 

பிரிலியண்ட் சி.பி.எஸ்.இ பள்ளியில் டெங்கு தடுப்பு விழிப்புணர்வு ~ நிலவேம்பு குடிநீர் வழங்கும் முகாம் !

அதிராம்பட்டினம், செப்.15
இந்தியன் ரெட் கிராஸ் சொசைட்டி அதிராம்பட்டினம் துணை கிளை சார்பில், அதிராம்பட்டினம் அடுத்துள்ள புதுக்கோட்டை உள்ளூர் பிரிலியண்ட் சி.பி.எஸ்.இ மேல்நிலைப் பள்ளி வளாகத்தில் டெங்கு தடுப்பு விழிப்புணர்வு மற்றும் நிலவேம்பு குடிநீர் வழங்கும் முகாம் வியாழக்கிழமை நடைபெற்றது.

முகாமிற்கு பள்ளித்தாளாளர் வீ. சுப்ரமணியன் தலைமை வகித்தார். அதிராம்பட்டினம் ரெட் கிராஸ் சங்கத் தலைவர் கே. இத்ரீஸ் அகமது, செயலாளர் எம். நிஜாமுதீன், பொருளாளர் எஸ்.ஏ அப்துல் ஹமீது ஆகியோர் முன்னிலை வகித்தனர்.

முகாமில், சிறப்பு விருந்தினராக இந்தியன் ரெட் கிராஸ் சொசைட்டி தஞ்சாவூர் மாவட்டத் தலைவர் ராஜமாணிக்கம் கலந்துகொண்டு முகாமை தொடங்கி வைத்து, டெங்கு நோய் தடுப்பு குறித்து மேற்கொள்ள வேண்டிய முன்னேற்பாடு பணிகள் குறித்து மாணவர்கள் மத்தியில் விழிப்புணர்வு உரை நிகழ்த்தினார். முகாமில் 1000 த்திற்கும் மேற்பட்ட பள்ளி மாணவ, மாணவிகளுக்கு நிலவேம்பு குடிநீர் வழங்கப்பட்டது.

இந்நிகழ்ச்சியில், பள்ளி முதல்வர் ஆர். ஈஸ்வரன், பள்ளி மேலாளர் எஸ். சுப்பையன், அதிராம்பட்டினம் ரெட் கிராஸ் சங்க நிர்வாகிகள் மேஜர் எஸ்.பி கணபதி, என். ஆறுமுகச்சாமி, முத்துக்குமரன், சமியுல்லா, சைஃபுதீன் மற்றும் உறுப்பினர்கள் கலந்துகொண்டனர்.

அதிராம்பட்டினத்தில் இந்திய செஞ்சுலுவைச் சங்கம் சார்பில், நிலவேம்பு குடிநீர் வழங்கும் முகாம் (படங்கள்)

அதிராம்பட்டினம், ஆக.18
தஞ்சாவூர் மாவட்ட ஆட்சியர் ஆ.அண்ணாதுரை அறிவுறுத்தலின் பேரில், இந்திய செஞ்சுலுவைச் சங்கம் தஞ்சாவூர் மாவட்ட நிர்வாகிகள் வழிகாட்டுதலில், இந்திய செஞ்சுலுவைச் சங்கம் அதிராம்பட்டினம் துணை கிளை சார்பில் நிலவேம்பு குடிநீர் வழங்கும் முகாம் அதிராம்பட்டினம் பேருந்து நிலையத்தில் வெள்ளிக்கிழமை காலை நடைபெற்றது.

முகாமிற்கு, அதிராம்பட்டினம் கிளைத் தலைவர் கே.இத்ரீஸ் அகமது தலைமை வகித்தார். செயலர் எம்.நிஜாமுதீன், பொருளாளர் எஸ்.ஏ அப்துல் ஹமீது ஆகியோர் முன்னிலை வகித்தனர். அதிராம்பட்டினம் கிளை பிரசிடென்ட் மேஜர் எஸ்.பி கணபதி முகாமை தொடங்கி வைத்தார். முகாமில் வர்த்தகர்கள், பயணிகள், பொதுமக்கள், பள்ளி, கல்லூரி மாணவர்கள் உள்ளிட்ட 500 க்கும் மேற்பட்டவர்களுக்கு நிலவேம்பு குடிநீர் வழங்கப்பட்டது.

முகாமில், அதிராம்பட்டினம் காவல் நிலைய உதவி ஆய்வாளர் அய்யாதுரை, விஜய்ஆனந்து, இந்திய செஞ்சுலுவைச் சங்க கிளை நிர்வாகிகள், ஆறுமுகச்சாமி, முத்துக்குமரன், சுப்பிரமணியன், பார்த்தசாரதி, சார்லஸ், சைஃபுதீன், முஹம்மது சலீம், சமியுல்லா உள்ளிட்ட பலர் கலந்துகொண்டனர். முகாம் காலை 7.30 மணிக்கு தொடங்கி காலை 10 மணி வரை நடைபெற்றது.

 

வாக்காளர் விழிப்புணர்வு மனித சங்கிலி நிகழ்ச்சியில் அதிரை IRCS பங்கேற்பு !

அதிராம்பட்டினம் ஏப்-12
நடைபெறவுள்ள தமிழ்நாடு சட்டமன்ற பொதுதேர்தல் 2016 ஐ முன்னிட்டு. தஞ்சாவூர் மாவட்டத்தில் பொதுமக்களுக்கு 100% நேர்மையாக வாக்களிப்பதன் அவசியத்தை வலியுறுத்தி தஞ்சாவூர் மாவட்டத்திலுள்ள 8 சட்ட மன்றத் தொகுதிகளையும் இணைக்கும் வகையில் அணைக்கரை முதல் கடற்கரை வரை மற்றும் கல்லணை முதல் தஞ்சாவூர் வரையிலும் வாக்காளர் மனித சங்கிலி. வாக்காளர் விழிப்புணர்வு நடைபயணம் 100% நேர்மையாக வாக்களிக்க உறுதிமொழி ஏற்பு போன்ற தேர்தல் விழிப்புணர்வு பிரச்சாரங்கள் நடத்த மாவட்ட தேர்தல் அலுலவர் மற்றும் மாவட்ட ஆட்சித் தலைவர் டாக்டர் என்.சுப்பையன் அவர்கள் அறிவுறுத்தி இருந்தார்.

அதன் படி இன்று காலை பட்டுக்கோட்டை தாலுகா பகுதிக்கு உட்பட்ட கரம்பயம் முதல் கார்கவயல் வரையிலான பகுதியில் வாக்காளர் விழிப்புணர்வு மனித சங்கிலி நிகழ்ச்சி நடந்தது. நிகழ்ச்சியை பட்டுக்கோட்டை சார் ஆட்சியர் ராஜசேகர் தலைமையேற்று தொடங்கி வைத்தார். இதில்
பொதுமக்களுக்கு வாக்காளர் விழிப்புணர்வு துண்டு பிரசுரங்கள் வழங்கப்பட்டது.

இந்த நிகழ்ச்சியில் பட்டுக்கோட்டை தாசில்தார் குருமூர்த்தி, பட்டுக்கோட்டை நகராட்சி ஆணையர், கே. அச்சையா, இந்தியன் ரெட் கிராஸ் சொசைட்டி அதிரை கிளை தலைவர் மரைக்கா இத்ரீஸ் அஹமது மற்றும் ரெட் கிராஸ் உறுப்பினர்கள், மாணவ, மாணவிகள் கலந்துகொண்டனர்.

அதிரையில் வாக்காளர் விழிப்புணர்வு பிரச்சார பணி: சப் கலெக்டர் தொடங்கி வைத்தார்!

அதிராம்பட்டினம், ஏப்-02
சட்டமன்ற தேர்தல் நியாயமாகவும், நேர்மையாகவும் நடைபெறவும், ஜனநாயக கடமையாற்றிடவும், அனைவரும் உறுதியேற்க வலியுறுத்தி விழிப்புணர்வு பிரச்சாரப் பணிகள் மாவட்டம் முழுவதும் தொடர்ந்து நடைபெறும் என மாவட்ட தேர்தல் அலுவலர் மற்றும் மாவட்ட ஆட்சித் தலைவர் டாக்டர் என்.சுப்பையன். இ.ஆ.ப அவர்கள் தெரிவித்து இருந்தார்.
இதையொட்டி இந்தியன் ரெட் கிராஸ் சொசைட்டி அதிராம்பட்டினம் துணை கிளை சார்பில் அதிராம்பட்டினம் மற்றும் சுற்றுவட்டார கிராம பகுதிகளின் வாக்காளர்களுக்கு விழிப்புணர்வு ஏற்படுத்தும் வகையில் பேரணி மற்றும் துண்டு பிரசுரங்கள் விநியோகிக்கும் பணி இன்று 02-04-2016 சனிக்கிழமை காலை நடந்தது.

நிகழ்ச்சிக்கு பட்டுக்கோட்டை தாலுகா சப் ஆட்சியர் ராஜசேகர் இ.ஆ.ப அவர்கள் தலைமை ஏற்று வாக்காளர் விழிப்புணர்வு பிராசார பேரணியை கொடியசைத்து தொடங்கி வைத்தார். சட்டமன்றத் தேர்தலில் வாக்காளர் விழிப்புணர்வு ஏற்படுத்தும் வகையில் விளம்பர பதாகைகளை கைகளில் ஏந்தி அதிராம்பட்டினம் பேருந்து நிலையப் பகுதிகளில் இந்தியன் ரெட் கிராஸ் சொசைட்டி உறுப்பினர்கள் மற்றும் தன்னார்வலர்கள் வாக்காளர் விழிப்புணர்வு பிரச்சார பணியில் ஈடுபட்டனர்.

முன்னதாக சிறப்பு விருந்தினராக கலந்துகொண்ட இந்தியன் ரெட் கிராஸ் சொசைட்டி தஞ்சை மாவட்ட  தலைவர் ராஜமாணிக்கம், பட்டுக்கோட்டை வட்டாட்சியர் குருமூர்த்தி ஆகியோர் வாக்காளர் விழிப்புணர்வு பிரச்சார உரை நிகழ்த்தினார்கள். இந்தியன் ரெட் கிராஸ் சொசைட்டி அதிராம்பட்டினம் பிரசிடென்ட் மேஜர் முனைவர் கணபதி அனைவரையும் வரவேற்றார்.

இந்த நிகழ்ச்சியில் வருவாய் ஆய்வாளர் ராஜேஸ்வரி, கிராம நிர்வாக அலுவலர் இளங்கோவன், இந்தியன் ரெட் கிராஸ் சொசைட்டி தஞ்சை மாவட்ட துணை தலைவர் ஜெயக்குமார், இந்தியன் ரெட் கிராஸ் சொசைட்டி அதிராம்பட்டினம் துணை கிளைத் தலைவர் மரைக்கா இத்ரீஸ் அஹமது, செயலாளர் நிஜாமுதீன், பொருளாளர் அப்துல் ஹமீது மற்றும் இந்தியன் ரெட் கிராஸ் சொசைட்டி உறுப்பினர்கள் - தன்னார்வலர்கள் பலர் கலந்து கொண்டனர்.

 

ரேபிஸ் நோய் தடுப்பு விழிப்புணர்வு பேரணி!

தஞ்சாவூரில் இந்திய செஞ்சிலுவைச் சங்கம், மிஷன் ஆப் ரேபிஸ் அமைப்பின் சார்பில் வெறிநாய்க்கடி நோய் தடுப்பு குறித்த விழிப்புணர்வு பேரணி வியாழக்கிழமை நடைபெற்றது.

ரயிலடியில் தொடங்கிய பேரணியை ஆட்சியர் டாக்டர் என். சுப்பையன் கொடியசைத்து தொடக்கி வைத்தார். பிரதான சாலைகள் வழியே சென்ற பேரணி அரண்மனை திடலில் முடிவடைந்தது. இதில்,பள்ளி,கல்லூரி மாணவ,மாணவிகள்,செவிலியக் கல்லூரி மாணவிகள் பலர் கலந்து கொண்டனர்.

நிகழ்சிக்கு இந்திய செஞ்சிலுவை சங்க மாவட்டத் தலைவர் ராஜமாணிக்கம் தலைமை வகித்தார். இந்திய செஞ்சிலுவை சங்க மாவட்ட பொருளாளர் முத்துக்குமார், இந்திய செஞ்சிலுவை சங்க மாவட்ட துணை தலைவர் ஜெயக்குமார் ஆகியோர் முன்னிலை வகித்தனர். இதில் முதன்மைக் கல்வி அலுவலர் இர. திருவளர்செல்வி, மிஷன் ஆப் ரேபிஸ் கல்விப் பிரிவு இயக்குநர் முருகன் அப்புப்பிள்ளை, அரசு ராசா மிராசுதார் மருத்துவமனையின் குழந்தைகள் நலத் துறைத் தலைவர் எம். சிங்காரவேலு உள்ளிட்டோர் கலந்து கொண்டனர்.