எஸ்.டி.பி.ஐ. கட்சியின் மாநில பொதுக்குழு கூட்டம் திருச்சியில் நடந்தது. மாநில பிரதிநிதிகள் சபை கூட்டத்திற்கு மாநில தலைவர் தெகலான் பாகவி தலைமை தாங்கினார். இதனை தொடர்ந்து தமிழகத்தில் அடுத்த மூன்றாண்டுகளுக்கான புதிய நிர்வாகிகள் தேர்தல் நடைபெற்றது. கட்சியின் தேசிய பொதுச்செயலாளர் இலியாஸ் தும்பே தேர்தலை நடத்தினார்.
கட்சியின் தமிழ் மாநில புதிய தலைவராக முகமது முபாரக், துணை தலைவர்களாக தெகலான் பாகவி, அம்ஜத் பாஷா, பொதுச்செயலாளர்கள் நிஜாம் முகைதீன், அப்துல் அமீது, உமர் பாரூக், பொருளாளராக அபுதாகீர் செயலாளர்களாக எஸ்.அமீர் ஹம்ஸா, டி.ரத்தினம், எஸ்.அஹமது நவவி, எ.அபுபக்கர் சித்திக், வழக்கறிஞர் என்.சஃபியா ஆகியோர் தேர்ந்தெடுக்கப்பட்டனர். மேலும், எஸ்.எம்.ரஃபீக் அஹமது, ஜி.அப்துல் சத்தார், எம்.முகம்மது பாரூக், ஏ.கே.கரீம், ஜி.எஸ்.இக்பால், ஐ.சபியுல்லா, எ.சுல்ஃபிகர் அலி, அ.காசிநாத துரை, எஸ்.நஜ்மா பேகம் ஆகியோர் கட்சியின் மாநில செயற்குழு உறுப்பினர்களாக தேர்ந்தெடுக்கப்பட்டனர். புதிய நிர்வாகிகள் தேர்வினை கட்சியின் தேசிய தலைவர் சயீத் அறிவித்தார்.
கூட்டத்தில் நிறைவேற்றப்பட்ட தீர்மானங்கள் வருமாறு:
தமிழகத்தில் தற்போது கல்வி, வேலை வாய்ப்பில் முஸ்லிம்களுக்கு 3.5 சதவீத உள் ஒதுக்கீடு உள்ளது. 2011 சட்டமன்ற தேர்தல் பிரசாரத்தின்போது மறைந்த முன்னாள் முதல்-அமைச்சர் ஜெயலலிதா முஸ்லிம்களுக்கான இட ஒதுக்கீட்டை உயர்த்தி வழங்க பரிசீலிக்கப்படும் என்றார். அவரது வாக்குறுதி படி தற்போது 3.5 சதவீதமாக உள்ள இட ஒதுக்கீட்டை 7 சதவீதமாக உயர்த்தி வழங்கவேண்டும் என கேட்டுக்கொள்வது.
ஆயுள் சிறைக்கைதிகள் விடுதலையில் தமிழக அரசு பரிந்துரைத்த அனைவரும் பாகுபாடு இன்றி விடுதலை செய்யப்படவேண்டும், பேரறிவாளன் உள்பட 7 பேரை விடுதலை செய்ய வேண்டும், சிறுபான்மையினர் நலத்துறை அமைச்சகம் அமைக்கப்படவேண்டும், கல்வி, விவசாயம், மற்றும் தொழில் தொடங்க வட்டி இல்லா கடன் வழங்கும் வங்கிகள் திறக்கப்பட வேண்டும், உருது மொழி அகாடமியை மேம்படுத்த வேண்டும். உலமாக்கள் நல வாரியத்தை செயல்படுத்த வேண்டும் என்பன உள்பட பல தீர்மானங்கள் நிறைவேற்றப்பட்டன.
