சுகாதார சீர்கேட்டை கண்டித்து அதிரை பேருந்து நிலையத்தில் பாஜகவினர் ஆர்ப்பாட்டம் !

அதிராம்பட்டினம், நவ-24
தஞ்சாவூர் மாவட்டம், அதிராம்பட்டினம் பேரூராட்சி பகுதிகளின் சுகாதர சீர்கேட்டைக் கண்டித்து பாரதிய ஜனதா கட்சி அதிரை பேரூர் சார்பில் கண்டன ஆர்பாட்டம் பேருந்து நிலையத்தில் வியாழக்கிழமை நடைபெற்றது.

ஆர்பாட்டத்திற்கு அக்கட்சியின் அதிரை பேரூர் தலைவர் முத்துகுமார் தலைமை வகித்தார். மாவட்ட செயற்குழு உறுப்பினர் அதிரை வடிவேல், அதிரை பேரூர் பொதுச்செயலர் சக்திவேல் முன்னிலை வகித்தனர்.

ஆர்ப்பாட்டத்தில் அக்கட்சியின் மாவட்ட துணைத்தலைவர் சூரை. சண்முகம் கண்டன உரை நிகழ்த்தினார். இக்கூட்டத்தில் அக்கட்சியின் மாநில செயற்குழு உறுப்பினர் வழக்கறிஞர் முரளி கணேஷ், மாநில மருத்துவப் பிரிவு பொறுப்பாளர் டாக்டர் இளவரசன், மாவட்ட துணைத் தலைவர் செம்பை கோவிந்தராஜ், பட்டுக்கோட்டை ஒன்றியத் தலைவர் பாலுசாமி, பட்டுக்கோட்டை நகரத்தலைவர் பாலசுப்பிரமணியம் உள்ளிட்டோர் கலந்துகொண்டனர்.

பிஜேபி கட்சியில் இருந்து மாவட்ட சிறுபான்மை அணித்தலைவர் தெளலத் ( எ ) தாவூது விலகல் !

அதிராம்பட்டினம், அக்-15
தஞ்சாவூர் மாவட்டம், அதிராம்பட்டினத்தை சேர்ந்தவர் தெளலத் ( எ ) தாவூது. இவர் பாரதிய ஜனதா கட்சியின் தஞ்சை தெற்கு மாவட்ட சிறுபான்மை அணித்தலைவராக பொறுப்பில் இருந்தார்.

இந்நிலையில் 'இஸ்லாமிய ஷரியத் சட்டத்தில் கைவைக்க நினைக்கும் பிஜேபி கட்சியின் போக்கு தமக்கு பிடிக்கவில்லை' எனக்கூறி அக்கட்சியின் அடிப்படை உறுப்பினர் உள்ளிட்ட தான் வகித்து வரும் பொறுப்பிலிருந்து விலகி உள்ளதாக இன்று தெளலத் ( எ ) தாவூது அறிவித்துள்ளார். இதுதொடர்பாக கட்சி நிர்வாகியை சந்தித்து தமது விலகலை தெரிவித்துள்ளதாக கூறினார்.

அதிரை பேருந்து நிலையத்தில் கருப்பு முருகானந்தத்தை ஆதரித்து பிரச்சார பொதுக்கூட்டம் !

அதிராம்பட்டினம் ஏப்-10
பட்டுக்கோட்டை சட்டமன்ற தொகுதி தேசிய ஜனநாயக கூட்டணி சார்பில் போட்டியிடும் பாரதியஜனதா கட்சி வேட்பாளர் கருப்பு முருகானந்தத்தை ஆதரித்து அதிராம்பட்டினம் பேருந்து நிலையத்தில் பிரச்சாரப் பொதுக்கூட்டம் நேற்று மாலை நடந்தது.

கூட்டத்திற்கு தொகுதி பொறுப்பாளர் செம்பை கோவிந்தராஜ் தலைமை வகித்தார். கூட்டத்தில் மத்திய கப்பல் மற்றும் தரை வழி போக்குவரத்து இணை அமைச்சர் பொன். ராதகிருஷ்ணன் கலந்துகொண்டு வேட்பாளரை ஆதரித்து பிரச்சாரம் மேற்கொண்டார். தனது உரையில், இப்பகுதியின் பொருளாதார வளர்ச்சி மேம்படும் வகையில் ஈசிஆர் இருவழிச் சாலையை நான்கு வழிச்சாலையாக மாற்றப்படும்' என்றார்.

முன்னதாக வேட்பாளர் கருப்பு முருகானந்தத்தை ஆதரித்து பேசிய பாரதியஜனதா கட்சி தேசிய பொதுச்செயலாளர் முரளிதாரவ் தனது உரையில் 'கடந்த காங்கிரஸ் ஆட்சியில் இந்திய கடலில் மீன்பிடிக்க சென்ற 550 இந்திய மீனவர்கள் இலங்கை கடற்படையால் சுட்டுக்கொல்லப்பட்டார்கள். பாரதிய ஜனதா கட்சி பொறுப்பேற்ற பிறகு மீனவர்கள் சுட்டுக்கொல்லப்படுவது குறைந்துள்ளது' என்றார்.

முன்னதாக பேசிய பட்டுக்கோட்டை சட்டமன்ற தொகுதி வேட்பாளர் கருப்பு முருகானந்தம் தனது உரையில், அதிராம்பட்டினத்தில் தீயணைப்பு நிலையம் அமைப்பது, அதிராம்பட்டினம் அரசு மருத்துவமனை தரம் உயர்த்துவது, அதிராம்பட்டினத்தில் மீன்கள் விற்பனை கூடம் அமைத்து தருவது, அதிராம்பட்டினம் - பட்டுக்கோட்டை சாலையில் உள்ள ஏரியை மேம்படுத்தி படகு சவாரி அமைப்பது, பட்டுக்கோட்டை புறநகர் வழிச்சாலை பணியை விரைந்து முடிப்பது, பட்டுக்கோட்டையில் தென்னை கொப்பரை கொள்முதல் நிலையம் அமைப்பது உள்ளிட்ட பல்வேறு வாக்குறுதிகளை தொகுதி மக்களுக்கு அளித்தார். இந்த பிரச்சார பொதுக்கூட்டத்தில் பாரதியஜனதா கட்சியினர் பலர் கலந்துகொண்டனர்.

பட்டுக்கோட்டையில் பிஜேபியினர் கண்டன ஆர்ப்பாட்டம் !

பட்டுக்கோட்டையில் இன்று காலை பி.ஜே.பியினர் மதுபானக்கடைகளை மூடக்கோரி கண்டன ஆர்ப்பாட்டம் நடத்தினர். மணிகூண்டு பகுதியில் மாநில வழக்கறிஞர் அணி செயற்குழு உறுப்பினர் வழக்கறிஞர் முரளிகணேஷ் தலைமையிலும், பேருந்து நிலையம் அருகில் மாவட்ட துணைத்தலைவர் கோவிந்தராஜ் தலைமையிலும், அறந்தாங்கி முக்கம் பகுதியில் நகர பொது செயலாளர் பிரபு தலைமையிலும் கூடிய பிஜேபியினர் மதுக்கடைகளை மூடக்கோரி கண்ட ஆர்ப்பாட்டம் நடத்தினர். பட்டுக்கோட்டை காவல்துறையினர் ஆர்ப்பாட்த்தில் ஈடுபட்டவர்களை கலைந்துபோக செய்தனர்.

 

செய்தி மற்றும் படங்கள்:
'நிருபர்' ராஜா
பட்டுக்கோட்டை

திருவாரூர் - காரைக்குடி அகல ரயில் பாதை பணிக்கு ₹ 130 கோடி ஒதுக்கீடு: கருப்பு முருகானந்தம் தகவல் !

திருவாரூர் - காரைக்குடி அகல ரயில் பாதை பணிக்கு முதல் கட்டமாக ₹ 130 கோடி ஒதுக்கப்பட்டுள்ளது.

முத்துப்பேட்டையில் நேற்று சென்னை துறைமுக இயக்குனர் கருப்பு முருகானந்தம் கூறியதாவது...
'நாடு முழுவதும் அகல ரயில் பாதையாக மாற்றிய நிலையில் திருவாரூர் - காரைக்குடி பகுதி மட்டும் புறக்கணிக்கப்பட்டு கடந்த ஆட்சியில் துவங்கப்பட்ட பணி கிடப்பில் போடப்பட்டது. இதனால் இப்பகுதியில் ரயில் போக்குவரத்து முற்றிலும் தடைபட்டது. இதையடுத்து பாஜக உட்பட பல்வேறு  இயக்கங்கள், அமைப்புகள் போராட்டங்கள் நடத்தினர். இந்த நிலையில் கடந்த எம்பி தேர்தலின் போது பாஜக அளித்த வாக்குறுதியின் அடிப்படையில் மத்திய அமைச்சர், பொன். ராதாகிருஷ்ணனின் தீவிர முயற்சியால் திருவாரூர் முதல் காரைக்குடி வரை அகல ரயில்வே பாதைக்கு முதற்கட்டமாக ₹ 130 கோடியை ரயில்வே  அமைச்சகம்  ஒதுக்கியுள்ளது.  இந்த பணி விரைவில் துவங்கும்.

இதே போல திருத்துறைப்பூண்டி முதல் அகஸ்தியம்பள்ளி வரையிலான அகல ரயில்வே பணிக்கும் நிதி ஒதுக்கீடு செய்யப்பட்டுள்ளது. அந்த பணியும் விரையில் துவங்கும்' என்றார்.

செய்தி:
'நிருபர்' மொய்தீன் பிச்சை
முத்துப்பேட்டை

முத்துப்பேட்டை கலவரத்திற்கும் எங்களுக்கும் தொடர்பு இல்லை: கருப்பு மறுப்பு !

முத்துப்பேட்டை தர்கா புத்தாண்டு அன்று சேதமாக்கப்பட்ட சம்பவத்துக்கும் எங்களுக்கும் தொடர்பு இல்லை என்று பா.ஜ.க மறுப்பு தெரிவித்துள்ளது.

இதுகுறித்து தமிழக பாரதிய ஜனதா கட்சியின் மாநில துணைத்தலைவர் கருப்பு முருகானந்தம் வெளியிட்டுள்ள அறிக்கையில் கூறியிருப்பதாவது: 
ஆங்கில புத்தாண்டை கொண்டாடுவது பா.ஜ.க மற்றும் இந்து இயக்கங்களின் மரபல்ல. இன்றைய தினம் காங்கிரஸ் இயக்கத்தின் தலைவர் ஈ.வி.கே.எஸ்.இளங்கோவன் கொடுத்திருக்கிற பத்திரிகை அறிக்கையில் முத்துப்பேட்டை தர்கா காம்பவுண்ட் சுவர் சேதப்படுத்தப்பட்டது தொடர்ப்பாக அதனை சேதப்படுத்தியது பா.ஜ.க. மற்றும் இந்து முன்னணியின் செயல் என்றும், இது பா.ஜ.க உள்ளுர் பிரமுகரின் ஆதரவோடு நடந்ததாகவும் குறிப்பிட்டுள்ளார். ஒரு கட்சியின் தலைவர் அறிக்கை கொடுக்கும்போது உண்மை நிலையை அறிந்து கொடுப்பது அவசியமாகும். இதுவே சமுதாயத்தில் அமைதியை ஏற்படுத்தும் செயலாகவும் இருக்கும். ஆங்கில புத்தாண்டை கொண்டாடுவது பா.ஜ.க மற்றும் இந்து இயக்கங்களின் மரபல்ல இது ஆங்கிலேயர்களால் துவக்கப்பட்ட இயக்கத்தின் மரபு. எங்களுக்கு அதுபோன்ற வழக்கமோ பண்பாடோ கிடையாது இன்று அங்கு ஆங்கில புத்தாண்டை கொண்டாடியதில் எங்களுடையை நிர்வாகிகள் ஒரு நபர் கூட கிடையாது. அந்த புத்தாண்டு கொண்டாடத்திற்கு ஏற்பாடு செய்தது அ.தி.மு.க வினர். அதில் கலந்துக்கொண்டதில் முக்கியமானவர்கள் காங்கிரஸ் கட்சியினர். இதை காவல் துறையும் மக்களும் நன்கு அறிவார்கள் ஆனாலும் கூட காவல்துறை சில தீவிரவாத இயக்கத்தின் அச்சுறுத்தலுக்கு பயந்து அப்பாவிகளை கைது செய்வது, எங்கள் இயக்கத்தினர் மீது பொய் வழக்கு பதிவு செய்வது போன்ற ஒருதலைப்பட்சமான நடவடிக்கைகளை எடுத்து வருகிறார்கள். காவல்துறை ஒருதலைப்பட்சமான நடவடிக்கையை உடனடியாக கைவிட்டு புத்தாண்டு கொண்டாட்டத்தில் ஈடுபட்டு தர்கா காம்பவுண்ட் சுவர் சேதப்படுத்தப்பட்டதற்கும், இந்துக்களின் மூன்று கார்களும், மூன்று டூவிலர்களை சேதப்படுத்தப்பட்டதற்கு காரணமான இருதரப்பையும் சேர்ந்த உண்மை குற்றவாளிகளை கைது செய்து நடவடிக்கை எடுக்க வேண்டும் என்று கேட்டு கொள்கிறேன். மேலும் முத்துப்பேட்டை தர்கா காம்பவுண்ட் சுவர் சேதப்படுத்தப்பட்டதற்கும் எங்கள் இயக்கங்களை சேர்ந்தவர்களுக்கும் எவ்வித தொடர்பும் கிடையாது. இந்த சம்பவத்தை கட்சி வண்மையாக கண்டிக்கிறது இவ்வாறு தனது அறிக்கையில் கருப்பு முருகானந்தம் கூறியுள்ளார்.

செய்தி மற்றும் படம்:
'நிருபர்' மொய்தீன் பிச்சை
முத்துப்பேட்டை

கருப்பு முருகானந்தம் சென்னை துறைமுக பொறுப்பு கழக இயக்குனராக நியமனம் !

முத்துப்பேட்டை அடுத்த ஜாம்புவானோடை கிராமத்தைச் சேர்ந்தவர் கருப்பு முருகானந்தம். இவர் தமிழக பா.ஜ.கவின் மாநில துணைத் தலைவராக இருந்து வருகிறார்.

இந்த நிலையில் இவரை பா.ஜ.க மத்திய அமைச்சர் பொன்.ராதாகிருஷ்ணன் பரிந்துரையின் பேரில் சென்னை துறைமுக பொறுப்பு கழக இயக்குனராக சென்னை துறைமுகத் தலைவர் அதுல்ய மிஸ்ரா நியமனம் செய்துள்ளார்.

நியமணம் செய்யப்பட்ட கருப்பு முருகானந்தத்திற்கு கட்சி நிர்வாகிகள் பலரும் சால்வை அணிவித்து வாழ்த்து தெரிவித்தனர். 

அதிரையில் இரவு 10 மணியோடு தனது பேச்சை நிறுத்திக்கொண்ட கருப்பு (எ) முருகானந்தம் !

தஞ்சை பாராளுமன்ற தொகுதிக்கு உட்பட்ட பட்டுக்கோட்டை ஒன்றியத்தின் கீழ்வரும் பகுதிகளில் வாக்கு சேகரிப்பதற்காக பிஜேபி சார்பில் வேட்பாளராக போட்டியிடும் கருப்பு (எ) முருகானந்தம் நேற்று இரவு 9.45 மணியளவில் தனது ஆதரவாளர்களுடன் அதிரை பேருந்து நிலையத்தில் தனது தேர்தல் பிரசாரத்தை மேற்கொண்டார்.

முன்னதாக இவரின் வருகைக்காக ஏராளமான போலீசார் பாதுகாப்பு பணிகளில் ஈடுபட்டு இருந்தனர். தாமதமாக அதிரை வந்து சேர்ந்த அவர் தனது பிராசர பேச்சை இரவு 10 மணியோடு நிறுத்திக்கொண்டார். இதில் பிஜேபி கட்சியினர் கலந்துகொண்டார்கள்.

பிஜேபி வேட்பாளர் கருப்பு (எ) முருகானந்தம் அதிரைக்கு வருகை ! ஏராளமான போலீஸார் குவிப்பு !

தஞ்சை பாராளுமன்ற தொகுதிக்கு உட்பட்ட பட்டுக்கோட்டை ஒன்றியத்தின் கீழ்வரும் பகுதிகளில் வாக்கு சேகரிப்பதற்காக பிஜேபி சார்பில் வேட்பாளராக போட்டியிடும் கருப்பு (எ) முருகானந்தம் இன்று இரவு 7.15 மணியளவில் தனது ஆதரவாளர்களுடன் அதிரை வழியாக வருகைதர இருக்கிறார்.

மிலாரிக்காடு, உள்ளூர் புதுக்கோட்டையிலிருந்து வருகை தரும் வேட்பாளர் வண்டிபேட்டை வழியாக அதிரை பேருந்து நிலையத்தை வந்தடைகிறார். அங்கே சிறிது நேரம் பிரசாரத்தை மேற்கொள்கிறார். அதனைதொடர்ந்து ஈசிஆர் சாலை வழியாக ஏரிபுறக்கரை கிராம பகுதிக்கு சென்று வாக்கு சேகரிக்கிறார்.

வாக்கு சேகரிப்பின் போது எவ்வித அசம்பாவிதமும் நடைபெறாமல் இருக்க முன்னேச்சரிக்கை நடவடிக்கையாக அதிரையில் பலத்த போலீஸ் பாதுகாப்பு போடப்பட்டுள்ளது. டிஎஸ்பி செல்லபாண்டியன் தலைமையில், அதிரை காவல்துறை ஆய்வாளர் ரவிச்சந்திரன் பொறுப்பில் ஏராளமான போலீசார் பாதுகாப்பு பணிகளில் ஈடுபட்டு வருகின்றனர். இந்த பணிக்காக போலீஸ் படைகள் அதிரைக்கு வரவழைக்கப்பட்டுள்ளனர்.

முன்னதாக அதிரை போலீசார் சார்பில் நேற்று இரவு அதிரையில் செயல்படும் அரசியல் கட்சி மற்றும் சமுதாய அமைப்புகளுக்கு அழைப்புவிடப்பட்டு பேச்சுவார்த்தை நடத்தப்பட்டது. இந்த பேச்சுவார்த்தையில் பிஜேபி, தவ்ஹீத் ஜமாத், எஸ்டிபிஐ ஆகிய அமைப்பை சேர்ந்தவர்கள் பங்கேற்று கருத்துகளை வழங்கி இருக்கிறார்கள்.

அதிரையில் சாலை மறியலில் ஈடுபட்ட BJP யினர் கைது !

BJP யின் மாநில பொதுச்செயலாளர் ஆடிட்டர் ரமேஷ் கொலையாளிகளை கைது செய்ய வலியுறுத்தி நேற்று [ 22-07-2013 ] காலை அதிரை பேருந்து நிலையம் அருகே BJP யின் ஒன்றிய துணைத்தலைவர் பாலுசாமி தலைமையில் சாலை மறியல் ஆர்ப்பாட்டம் நடைபெற்றது. இந்த ஆர்பாட்டத்தில் கலந்து கொண்ட 17 பேரும் அதிரை காவல்துறையினரால் கைது செய்யப்பட்டனர்.

முன்னதாக கடைகளை அடைக்க வற்புறுத்திய BJP யினர் அனைவரும் காவல்துறையினரால் கைது செய்யப்பட்டனர். இதில் ஏராளமான காவல்துறையினர் பாதுகாப்பு பணிகளில் ஈடுபட்டிருந்தனர்.