ஆந்திரா எம்.எல்.ஏ வுக்கு அதிராம்பட்டினத்தில் சிறப்பான வரவேற்பு (படங்கள்)

அதிராம்பட்டினம், பிப்.26
தஞ்சாவூர் மாவட்டம், அதிராம்பட்டினதிற்கு வருகை தந்த ஆந்திரா மாநிலம் கடப்பா தொகுதி எம்.எல்.ஏ எஸ்.பி அம்ஜத் பாஷாக்கு சிறப்பான வரவேற்பு அளிக்கப்பட்டது.

ஆந்திரா மாநிலம் ஓய்.எஸ்.ஆர் காங்கிரஸ் கட்சி வேட்பாளராக கடப்பா சட்டமன்ற தொகுதியில் போட்டியிட்டு வெற்றிபெற்றவர் எஸ்.பி அம்ஜத் பாஷா. இவரது உறவினர் அப்துல்ரஹ்மான் கடந்த 40 ஆண்டுகள் அதிராம்பட்டினம் காதிர் முகைதீன் கல்லூரியில் நூலகராக பணியாற்றியவர்.

இந்நிலையில், நேற்று ஞாயிற்றுக்கிழமை இரவு அதிராம்பட்டினம் வருகை தந்தார். அதிராம்பட்டினத்தின் முக்கியப் பகுதிகளுக்கு சென்று நண்பர்கள் மற்றும் முக்கிய பகுதிகளுக்கு சென்று பார்வையிட்டனர்.

விருந்தினராக வருகைதந்த எம்.எல்.ஏ எஸ்.பி அம்ஜத் பாஷாக்கு அதிராம்பட்டினம் பேரூர் முன்னாள் சேர்மன் எஸ்.எச் அஸ்லம் சார்பில், சால்வை அணிவித்து சிறப்பான வரவேற்பு அளிக்கப்பட்டது. அதிராம்பட்டினம் தக்வா பள்ளிவாசல் நிர்வாக டிரஸ்ட் தலைவர் கே.எஸ் சுக்கூர், தலைமை இமாம் மவ்லவி. தமீம், சம்சுல் இஸ்லாம் சங்கத் தலைவர் ஹாஜி அபூபக்கர், முன்னாள் கவுன்சிலர்கள் 'நூர்லாட்ஜ்' செய்யது முகமது, முகமது சரீப், சமூக ஆர்வலர்கள் ஏ.சாகுல் ஹமீது, பதர்சான், சுலைமான், அன்சாரி மற்றும் அதிராம்பட்டினம் பிரமுகர்கள் சார்பில் சால்வைகள் அணிவித்து வரவேற்பு அளித்தனர்.

வருகை குறித்து எம்.எல்.ஏ எஸ்.பி அம்ஜத் பாஷா கூறியது;
அதிராம்பட்டினத்திற்கும் எங்களது குடும்பத்திற்கு நெருங்கிய தொடர்பு உண்டு. இப்பகுதி பொதுமக்கள் அளவுகடந்த அன்பைப் பொழிவார்கள், பாசத்தோடு தோழமை கொள்வார்கள். பல்வேறு காலக்கட்டங்களில் நமக்கு உதவி இருக்கிறார்கள். இந்த ஊரோடும், இங்குள்ள மக்களோடும் நல்ல தொடர்பை எப்போதும் தொடர வேண்டும் என, காதிர் முகைதீன் கல்லூரியில் கடந்த 40 ஆண்டுகளுக்கும் மேலாக நூலகாரகப் பணியாற்றிய மறைந்த எங்கள் மாமா அல்ஹாஜ் அப்துல் ரஹ்மான் அவர்கள் எங்களிடம் அடிக்கடி கூறுவார். அவரது ஆசையை நிறைவேற்றும் வகையில், இன்று ஞாயிற்றுக்கிழமை அதிராம்பட்டினம் வருகை தந்து நண்பர்களை சந்தித்து வருகிறோம். இங்குள்ள பள்ளிவாசல்கள் உள்ளிட்ட பல்வேறு இடங்களுக்கு சென்று வருகிறோம். சிறப்பான வரவேற்பும் - உபசரிப்பும் அளித்து வருகின்றனர். இப்பகுதி மக்களுக்கு எங்களது குடும்பத்தின் சார்பில் நன்றியை தெரிவித்துக்கொள்கிறோம்' என்றார்.

அப்போது, நூலகர் அப்துல் ரஹ்மான் அவர்களின் மகன்கள் ஜூக்கா, சமீயூர் ரஹ்மான் ஆகியோர் உடன் இருந்தனர்.

 

 

 

ஹஜ் உம்ரா பயணிகளுக்கான புதிய தாயிப் விமான நிலைய கட்டுமானப் பணிகள் நிலவரம்!

அதிரை நியூஸ்: பிப்.26
ஹஜ் உம்ரா பயணிகளுக்கான புதிய தாயிப் விமான நிலைய கட்டுமானப் பணிகள் 2020 ஆண்டிற்குள் நிறைவுறும்.

தாயிப் நகரில் செயல்பட்டு வரும் தற்போதைய பிரதேச விமான நிலையத்திற்கு (Ta'if Regional Airport) மாற்றாக புனித மக்கா நகரிலிருந்து சுமார் 117 கி.மீ தூரத்திலும் தாயிப் நகரிலிருந்து வடகிழக்கு திசையில் சுமார் 40 கி.மீ தூரத்திலும் புதிதாக கட்டப்பட்டு வரும் தாயிப் விமான நிலையம் சுமார் 48 மில்லியன் சதுரடி பரப்பளவில் அமையவுள்ளது.

கடந்த செப்டம்பர் மாதம் துவங்கிய இதன் கட்டுமானங்கள் எதிர்வரும் 2020 ஆம் ஆண்டிற்குள் நிறைவுறும் என்றும் இதன் மூலம் ஆண்டிற்கு சுமார் 6 மில்லியன் பயணிகளை பிரதானமாக ஹஜ், உம்ரா பயணிகளை கையாள முடியும் என சவுதி அரேபியாவின் விமான நிலையங்களுக்கான ஆணையம் (GACA) தெரிவித்துள்ளது.

தற்போதைய பழைய தாயிப் பிரதேச விமான நிலையம் ஆண்டுக்கு சுமார் 1.5 மில்லியன் பயணிகளை மட்டுமே கையாளும் திறனுடையது. இந்த பழைய நிலையம் புதிய விமான நிலையத்துடன் இணைக்கப்பட்டு ஒரே விமான நிலையமாக மாற்றப்படும். இது பிரதேச விமான நிலையமாக இருந்தாலும் சில அரபுநாடுகளின் சர்வதேச சேவைகளும் தாயிப் விமான நிலையத்தில் நடைபெற்று வருகின்றது.

மேலும் அஸீர் மாகாணம் 'குன்புதாஹ்' (Al Qunfudhah  எனும் துறைமுக நகரில் சுமார் 24 மில்லியன் சதுர கி.மீ பரப்பளவில் கட்ட திட்டமிடப்பட்டுள்ள புதிய 'குன்புதாஹ் விமான நிலைய' பணி ஒப்பந்தங்கள் இன்னும் 60 நாட்களுக்குள் இறுதி செய்யப்படவுள்ளன. இது மக்காவிலிருந்து சுமார் 290 கி.மீ தூரத்திலும் ஜித்தாவிலிருந்து 340 கி.மீ தூரத்திலும் அமைந்துள்ளது.

அதேபோல் ஜித்தா மாநகரில் பிரம்மாண்டமாக கட்டப்பட்டு வரும் கிங் அப்துல் அஜீஸ் சர்வதேச விமான நிலையம் எதிர்வரும் 2018 மே மாதம் முதல் இயங்கத் துவங்கும் என புனித மக்காவிற்கான அமீர் இளவரசர் காலித் அல் பைசல் தெரிவித்தார்.

Source: Saudi Gazette / Saudi Business / Wikipedia
தமிழில்: நம்ம ஊரான் 

அதிரையில் வாழும் பேச இயலாத - காது கேளாதோர் நலச்சங்க 8 ஆம் ஆண்டு தொடக்க விழா (படங்கள்)

அதிராம்பட்டினம், பிப்.26
தஞ்சாவூர் மாவட்டம், அதிராம்பட்டினத்தில் வாழும் மாற்றுத்திறனாளிகள் பேச இயலாத - காது கேளாதோர் நலச் சங்க 8 ஆம் ஆண்டு தொடக்க விழா  சங்க அலுவலகத்தில் ஞாயிற்றுக்கிழமை நடந்தது.

விழாவிற்கு நலச்சங்கத் தலைவர் எஸ்.எம்.ஒய் ஹாஜா சரீப் தலைமை வகித்தார். துணைத்தலைவர் ஏ.சிராஜுதீன், பொதுச்செயலாளர் எஸ்.ஏ நூருல் அமீன், இணைச்செயலாளர் உமர் தம்பி, பொருளாளர் ஆர்.மன்சூர் ஆகியோர் முன்னிலை வகித்தனர்.

சிறப்பு அழைப்பாளராக சமூக ஆர்வலர் எம். நிஜாமுதீன் கலந்துகொண்டு வாழ்த்துரை வழங்கினார். விழாவில், மாற்றுத்திறனாளிகள் பேச இயலாத - காது கேளாதோருக்கு இலவச பஸ் பாஸ் வழங்க வேண்டும், நலச்சங்க ஏழை எளிய உறுப்பினர்களுக்கு இலவச வீட்டு மனை பட்டா வழங்க அரசை வலியுறுத்துவது, விடுபட்ட நல அறக்கட்டளை உறுப்பினர்களுக்கு அரசின் மாதாந்திர உதவித்தொகை வழங்க அரசை கேட்டுக்கொள்வது,  தொழிற்கடன் வழங்க  அரசு ஏற்பாடு செய்தல் உள்ளிட்ட தீர்மானங்கள் நிறைவேற்றப்பட்டன.

இந்த விழாவில் அதிராம்பட்டினம் மற்றும் சுற்றுப்புற பகுதிகளைச் சேர்ந்த நலச் சங்க உறுப்பினர்கள் பலர் கலந்து கொண்டனர். அனைவருக்கும் மதிய உணவு வழங்கப்பட்டது.

 

சவுதியில் கெட்டுப்போன மருந்து, உணவுப் பொருட்கள் குறித்து புகார் அளிக்க தொலைபேசி எண் அறிவிப்பு!

அதிரை நியூஸ்: பிப்.26
சவுதியில் கெட்டுப்போன மருந்து, உணவுப் பொருட்கள் குறித்து புகார் தர ஒருங்கிணைந்த தொலைபேசி எண்

சவுதியில் விற்கப்படும் மருந்து, மருத்துவ உபகரணங்கள், அழகு சாதனப் பொருட்கள், தீவனம் மற்றும் பூச்சு கொல்லிகள் குறித்து சந்தேகங்களை விசாரித்து அறிந்து கொள்ளவும், அதில் காணப்படும் குறைகள் குறித்து புகார் தரவும் 19999 என்கிற ஒருங்கிணைந்த தொலைபேசி எண்ணை அறிமுகப்படுத்தியுள்ளது சவுதியின் மருந்து மற்றும் உணவிற்கான ஆணையம். (The Saudi Food and Drug Authority - SFDA)

மேலும் உடல் நலத்திற்காக விற்கப்படும் மூலிகை அடிப்படையிலான மருந்துப் பொருட்கள், அனுமதி பெறாத மற்றும் தரம் குறைந்த அழகு சாதனப் பொருட்கள், மருந்துகள், குழந்தைகளுக்கான பால் உணவுகள் போன்றவற்றின் சுவை, மணம், நிறம் மாறியிருந்தாலும் மேற்காணும் எண்ணில் அழைத்து புகார் தெரிவிக்கலாம்.

அதேபோல் அனுமதி பெற்ற மருந்து மற்றும் உணவுப் பொருட்கள் பாவணையின் மூலம் பக்கவிளைவுகள் ஏதும் ஏற்பட்டாலும் தகுந்த எச்சரிக்கைகளை சம்பந்தப்பட்ட நிறுவனங்களுக்கு விடுக்கப்படும், மருந்து மற்றும் உணவுப் பொருட்களை சுகாதாரமான, பாதுகாப்பான முறையில் சேமித்து வைக்கத் தவறினாலும் அல்லது தரமற்ற அனுமதியற்ற பொருட்களை அதனுள் சேமித்து வைத்திருந்தாலும் தண்டிக்கப்படுவர். சுவை மாறிய அல்லது போக்குவரத்தின் போது சூரிய வெப்பத்தால் சூடான குடிநீரை விற்பவர்களைப் பற்றியும் புகார் தெரிவிக்கலாம்.

மேற்காணும் தொலைபேசி எண்ணை அழைத்து கருத்துக்களை பெற்றுக் கொள்வது அல்லது புகார் தருவதன் மூலம் விற்கப்படும் உணவுப் பொருட்களின் தரம், மருந்து மற்றும் மருத்துவ சாதனங்களின் திறன் மற்றும் தரங்களை துல்லியமாக உத்திரவாதப்படுத்த இயலும்.

மேலும் சவுதியின் உணவு மற்றும் மருந்துகளுக்கான ஆணையம் (SFDA) வழங்கியுள்ள விழிப்புணர்வு மற்றும் எச்சரிக்கை பதிவுகள், அனுமதி பெற்ற உணவுப் பொருட்களின் பட்டியல், பதிவுபெற்ற பாட்டில் தண்ணீர் குறித்த விபரங்கள், மருந்துகள், மூலிகைப் பொருட்கள், கால்நடைகளுக்கான தயாரிப்புக்கள், அழகு சாதனப் பொருட்கள், வைட்டமின் தயாரிப்புக்கள், மருத்துவ உபகரணங்கள் பற்றியும் அதன் விலைகள் மற்றும் கிடைக்குமிடங்கள் குறித்த விபரங்களை அறிந்து கொள்ளலாம்.

மேற்கூறப்பட்ட ஒருங்கிணைந்த தொலைபேசி எண்ணில் சவுதியர்கள் மற்றும் சவுதி வாழ் வெளிநாட்டினர் என அனைவரும் சனி முதல் வியாழன் வரை காலை 8 மணிமுதல் இரவு 10 மணிவரையும், வெள்ளிக்கழமைகளில் மாலை 2 மணிமுதல் இரவு 10 மணிவரையும் அழைத்து புகார் மற்றும் விசாரணைகளை மேற்கொள்ளலாம். வேலை நேரத்தில் அழைக்க முடியாதவர்கள் உங்களுடைய அழைப்பை பதிவு செய்தும் வைக்கலாம். இந்த சேவை அரபி மற்றும் ஆங்கிலத்தில் வழங்கப்படுகின்றன.

Source: Saudi Gazette
தமிழில்: நம்ம ஊரான் 

பிரிலியண்ட் சிபிஎஸ்இ பள்ளியில் அறிவியல் கண்காட்சி (படங்கள்)

அதிராம்பட்டினம், பிப்.26
அதிராம்பட்டினம் அடுத்த புதுக்கோட்டை உள்ளூர் பிரிலியண்ட் சிபிஎஸ்இ பள்ளியில் 2ம் ஆண்டு அறிவியல் கண்காட்சி மற்றும் கணினி அறிவியல் துறையின் கிரிசாளிசிஸ் விழா கொண்டாடப்பட்டது. பள்ளித் தாளாளர் வீ. சுப்பிரமணியன் தலைமை வகித்தார். பள்ளி முதல்வர் ஆர். ஈஸ்வரன் வரவேற்றார். அறிவியல் கண்காட்சியை தமிழ்நாடு அறிவியல் மற்றும் தொழில்நுட்ப மைய இயக்குநர் டாக்டர் அய்யம்பெருமாள் துவக்கி வைத்தார். டாக்டர் அய்யம்பெருமாள், நெய்வேலி என்எல்சி பொது மேலாளர் துரைக்கண்ணு ஆகியோர் மாணவர்கள் கண்காட்சியில் வைத்திருந்த கண்டுபிடிப்புகளை பார்வையிட்டு பாராட்டினர்.

மேலும் தமிழ்நாடு அறிவியல் மற்றும் தொழில்நுட்ப மையத்தின் நடமாடும் அறிவியல் கோளரங்க வாகனம் மற்றும் ப்ளானட்டோரியம் பொதுமக்களின் பார்வைக்கு வைக்கப்பட்டது. இந்த கண்காட்சியில் பாரம்பரிய உணவு திருவிழா, அனைத்து மாநிலங்களின் பாரம்பரிய உடையணிந்து வந்த மாணவர்கள், மகாத்மா காந்தி போல் வேடமணிந்து வந்து ராட்டினம் சுற்றிய மாணவர், மாணவர்களின் கணித கண்காட்சி வெகுவாக கவர்ந்தது.

மேலும் பள்ளியின் கடந்தாண்டு அமெரிக்க விண்வெளி ஆராய்ச்சி மையம் (நாசா) சென்ற மாணவர்களின் புகைப்பட கண்காட்சி இடம் பெற்றிருந்தது. ஏற்பாடுகளை பள்ளி மேலாளர் எஸ். சுப்பையன் மற்றும் அனைத்துத்துறை ஆசிரியர்கள் செய்திருந்தனர்.

 

 

 

 

 

 

 

 

 

 

மார்ச் 20 ல் ஓமன் விமான நிலையத்தின் புதிய டெர்மினல் திறப்பு!

அதிரை நியூஸ்: பிப். 26
மார்ச் 20 முதல் ஓமன் விமான நிலையத்தின் புதிய டெர்மினல் திறக்கப்படுகிறது

ஓமன் போக்குவரத்து மற்றும் தொலைத்தொடர்பு அமைச்சகம் அறிவித்துள்ளபடி எதிர்வரும் 2018 மார்ச் 20 ஆம் தேதி முதல் மஸ்கட் விமான நிலையத்தின் அனைத்து விமான சேவைகளும் புதிய டெர்மினலுக்கு மாற்றப்படுகிறது. 4 கட்டங்களாக மேற்கொள்ளப்பட்டு வரும் விமான நிலைய விரிவாக்க மேம்பாட்டுத் திட்டத்தின் கீழ் சேவையை துவங்கும் முதலாவது டெர்மினல் சேவை இது.

580,000 சதுர மீட்டர் பரப்பளவில் உருவாகியுள்ள இந்த புதிய டெர்மினலின் முதலாவது பகுதியில் ஆண்டொன்றுக்கு சுமார் 12 மில்லியன் பயணிகளை கையாள முடியும். 4 கட்டப்பணிகளும் நிறைவுறும் போது சுமார் 48 மில்லியன் பயணிகளை கையாள முடியும். இங்க 86 செக்-இன் கவுன்டர்கள், 10 லக்கேஜ் பெல்ட்டுகள், வருகை மற்றும் புறப்பாடுகளுக்காக என மொத்தம் 40 நுழைவாயில்கள், 29 லவுஞ்சுகள், 29 ஜெட் பிரிட்ஜூகள் மற்றும் ஓரு புதிய வான் போக்குவரத்து கட்டுப்பாட்டு அறை என நிறைவடைந்துள்ளன இந்த முதற்கட்ட டெர்மினல் பணிகள்.

தற்போது நடைமுறையிலுள்ள விமான நிலையப் பகுதிகள் பட்ஜெட் கட்டண சேவையில் ஈடுபட்டுள்ள ஏர்லைன்ஸூக்களுக்கான ஒதுக்கப்கடும் எனவும் தெரிவிக்கப்பட்டுள்ளது.

Source: Gulf News
தமிழில்: நம்ம ஊரான் 

 

ஓமன் சுற்றுலா விசா ஆன்லைன் மூலம் மட்டும் விண்ணப்பித்து வழங்க முடிவு!

அதிரை நியூஸ்: பிப்.26
மார்ச் 21 முதல் ஓமன் சுற்றுலா விசாக்களின் விண்ணப்பம் மற்றும் விநியோகம் ஆன்லைன் வழியாக மட்டுமே நடைபெறும்.

ராயல் ஓமன் போலீஸ் எனப்படும் ஓமன் குடியேற்றத் துறையின் அறிவிப்பின்படி, எதிர்வரும்  2018 மார்ச் 21 ஆம் தேதி முதல் அனைத்து சுற்றுலா விசாக்கள் மற்றும் எக்ஸ்பிரஸ் விசாக்களுக்கான விண்ணப்பங்கள் அனைத்தும் rop.gov.om என்ற இணையதளம் வழியாக மட்டுமே தேவையான ஆவணங்களை இணைத்து விண்ணப்பிக்கப்பட வேண்டும், இனி குடியேற்றத்துறையின் சேவை மையங்களில் ( not at the service desks) விண்ணப்பிக்கும் நடைமுறையும் நிறுத்தப்படுவதாக அறிவித்துள்ளது.

ஆன்லைன் விண்ணப்பத்துடன் தளத்தின் வழியாக கிரடிட் கார்டு அல்லது டெபிட் கார்டுகள் வழியாக (the official e-payment portal) அதற்குரிய கட்டணங்களையும் செலுத்த வேண்டும். தொடர்ந்து விண்ணப்பம் ஏற்கப்பட்டது குறித்து ஈ-மெயில் வழியாக தெரிவிக்கப்படும் (e-visa approval notification by email), அந்த பக்கத்தை பிரிண்ட் எடுத்து ஓமன் ஏர்போர்ட் கவுண்டர்களில் காட்டினால் அங்குள்ள அலுவலர் நாட்டிற்குள் நுழைய அனுமதி தருவார். இந்த புதிய நடைமுறையின் மூலம் ஓமன் விமான நிலையங்களில் விசாவிற்காக நீண்ட வரிசைகளில் காத்து நிற்கும் தேவையிருக்காது.

கடந்த வருடம் ஹோட்டல் மற்றும் டூர் ஆப்பரேட்டர்களுக்கு விருந்தினர்கள் சார்பாக ஈ-விசாக்களை விண்ணப்பிக்கும் அனுமதி வழங்கப்பட்டது குறிப்பிடத்தக்கது. அதேபோல் கடந்த 2017 ஆம் ஆண்டு அக்டோபர் மாதம் இந்தியா உட்பட பல நாடுகளுக்கும் ஸ்பான்சர் இன்றி ஈ-விசாவை நேரிடையாக விண்ணப்பிக்க அனுமதியளிக்கப்பட்டது.

சர்வதேச அளவில் கச்சா எண்ணெய் விலை வீழ்ந்ததன் எதிரொலியாக மாற்றுப் பொருளாதார தேடல்களில் ஒன்றாக சுற்றுலா வருவாயை அதிகரிக்க திட்டமிடப்பட்டுள்ளதுடன் எதிர்வரும் 2040 ஆம் ஆண்டிற்குள் வருடத்திற்கு சுமார் 5 மில்லியன் சுற்றுலாவாசிகளை ஓமனுக்குள் ஈர்க்கும் நோக்குடன் இத்தகைய மாற்றங்கள் நடைமுறைப்படுத்தப்படுகின்றன, தற்போது ஆண்டிற்கு சுமார் 2.7 மில்லியன் சுற்றுலாவாசிகளே வருகை தருகின்றனர்.

Source: Gulf News
தமிழில்: நம்ம ஊரான்