முத்துப்பேட்டை அருகே ஜோசியம் பார்ப்பதாக கூறி 5 பவுன் நகை திருட்டு !

முத்துப்பேட்டை அருகே உள்ள விளாங்காடு கிராமத்தை சேர்ந்தவர் பாஸ்கர் (வயது 50). உடல் நிலை சரியில்லாமல் வீட்டில் இருந்துள்ளார். இந்நிலையில் நேற்று மதியம் மோட்டார் சைக்கிளில் வந்த வாலிபர் ஒருவர் வீட்டில் தனியாக இருந்த பாஸ்கரிடம் ஜோசியம் பார்ப்பதாக கூறியுள்ளார்.

மேலும் பாஸ்கரிடம் உங்களது வீட்டில் தோஷம் இருப்பதாகவும் வீட்டில் இருக்கும் நகைகளுக்கு பூஜை செய்து வைத்தால் அவை பாதுகாப்பாக இருக்கும் என கூறியுள்ளார்.

அதனை நம்பி பாஸ்கர் வீட்டில் இருந்த நகைகளை கொண்டு வந்து அந்த நபரிடம் கொடுத்துள்ளார். இதனையடுத்து அவர் நகைகளை வீட்டின் பின்புறத்தில் வைத்து பூஜை செய்வதாக கூறி நகைகளை ஒரு துணிப்பையில் மடித்து வைத்துள்ளார்.

பின்னர் மயக்கப்பொடியை பாஸ்கரின் முகத்தில் தூவிவிட்டு அங்கிருந்து மறைந்தார். மயக்கம் தெளிந்த பாஸ்கர் அந்த வாலிபரை தேடியுள்ளார். ஆனால் அந்த வாலிபர் 5 பவுன் நகையுடன் தப்பிச் சென்றது தெரியவந்தது.
இதுகுறித்து அவர் முத்துப்பேட்டை போலீசாருக்கு தகவல் தெரிவித்தார். அதன்பேரில் சம்பவ இடத்திற்கு வந்த போலீசார் அந்த மர்ம வாலிபர் குறித்து விசாரித்து வந்தனர்.

அப்போது முத்துப்பேட்டை பிள்ளைவிளாகம் பகுதியில் 4 பேர் ஜோசியம் பார்ப்பதாக கூறி செல்வதாக போலீசாருக்கு தகவல் கிடைத்தது. அதன்பேரில் சம்பவ இடத்திற்கு சென்ற இன்ஸ்பெக்டர் ராஜ்குமார் அங்கு ஜோசியம் பார்ப்பதாக கூறி சென்ற 4 பேரை பிடித்து விசாரித்தனர்.

மேலும் அவர்களிடம் இருந்த புகைப்படங்களை எடுத்துசென்று பாஸ்கரிடம் காட்டினர். அதில் நகையை திருடிச் சென்ற வாலிபரின் புகைப்படத்தை அவர் அடையாளம் காட்டினார்.

இதையடுத்து மற்ற 4 பேரிடமும் அந்த வாலிபர் குறித்து விசாரணை நடத்தினர். அதில் அந்த நபர் மன்னார்குடி மன்னை நகரை சேர்ந்த நாகராஜ் மகன் முருகன் (20) என்பது தெரியவந்தது. இதையடுத்து மன்னார்குடிக்கு சென்ற முத்துப்பேட்டை போலீசார் அங்கு வீட்டில் இருந்த முருகனை கைது செய்து விசாரணை நடத்தி வருகின்றனர்.

நன்றி:மாலைமலர்