துபாயில் முப்பெரும் விழா ~ துரைமுருகன் பங்கேற்பு (படங்கள்)

அதிரை நியூஸ்: அக். 03
பிரபல 'தொழில் அதிபர்' பழஞ்சூர் K. செல்வம் ஏற்பாட்டின் பேரில், துபாய் பன்னாட்டு திமுக, இந்திய யூனியன் முஸ்லீம் லீக் மற்றும் அதன் கூட்டணி கட்சிகளின் சார்பில், முப்பெரும் விழா துபாயில் ஞாயிற்றுக்கிழமை நடைபெற்றது.

விழாவிற்கு, தஞ்சை தெற்கு மாவட்ட திமுக கலை இலக்கியப் பகுத்தறிவு பேரவை அமைப்பாளரும், துபாய் எவர்கோல்ட் நிறுவனருமாகிய பழஞ்சூர் K. செல்வம் தலைமை வகித்தார்.

சிறப்பு விருந்தினராக, திமுக மாநில முதன்மைச் செயலரும், சட்டமன்ற எதிர்க்கட்சி துணைத் தலைவருமாகிய துரைமுருகன் எம்.எல்.ஏ கலந்துகொண்டு விழா பேருரை ஆற்றினார்.

விழாவில், இந்திய யூனியன் முஸ்லீம் லீக் கட்சியின் மாநில முதன்மைச் செயலரும், முன்னாள் பாராளுமன்ற உறுப்பினருமாகிய எம். அப்துல் ரஹ்மான், திமுக மாநில விவசாய அணி செயலர் ஏ.கே.எஸ் விஜயன் ஆகியோர் கலந்துகொண்டு வாழ்த்துரை வழங்கினார்கள்.

தொடக்கத்தில், துபாய் எவர்கோல்ட் நிறுவன பொதுமேலாளர் எஸ். செய்யது இப்ராஹீம் அனைவரையும் வரவேற்றுப் பேசினார். விழா முடிவில் எவர்கோல்ட் நிறுவன மேலாளர் சுரேஷ் நன்றி கூறினார். இவ்விழாவில், துபாய் பன்னாட்டு திமுக, இந்திய யூனியன் முஸ்லீம் லீக் உள்ளிட்ட கட்சிகளின் நிர்வாகிகள், உறுப்பினர்கள் கலந்துகொண்டனர்.

முன்னதாக, 'தொழில் அதிபர்' பழஞ்சூர் K. செல்வம் சார்பில், துபாய் விமான நிலையத்தில், திமுக மாநில முதன்மைச் செயலர் துரைமுருகனுக்கு சிறப்பான வரவேற்பு அளிக்கப்பட்டது. இதில், பழஞ்சூர் K. செல்வம் புதல்வர் எஸ்.விக்னேஷ் பூங்கொத்து கொடுத்து வரவேற்றார்.

 

துபாயில் தங்கம் விலை வீழ்ச்சி !

அதிரை நியூஸ்: அக். 02
சர்வதேச அளவில் தங்கம் விலை குறைந்துள்ளதை அடுத்து தங்கம் விற்பனை விலை துபாயில் வீழ்ச்சியடைந்துள்ளது. உதாரணத்திற்கு, கடந்த மாதம் செப். 5 ந் தேதி ஒரு கிராம் 24 காரட் தங்கம் 161.75 திர்ஹம் என்ற நிலையில் விற்பனையாகி வந்தது. இன்று திங்கட்கிழமை காலை நிலவரப்படி 154.50 திர்ஹத்திற்கு விற்பனை விலை சரிந்துள்ளது. கடந்த ஒரு மாதத்தில் விற்பனை விலையில் 5 சதவீதம் வரை குறைந்துள்ளது.

துபையில் இன்று திங்கட்கிழமை காலை நேர தங்க விற்பனை நிலவரம் ~ (ஒரு கிராம்) 
1. 24 காரட் 154.50 திர்ஹம்
2. 22 காரட் 145 திர்ஹம்
3. 21 காரட் 138.50 திர்ஹம்
4. 18 காரட் 118.75 திர்ஹம்

Source: Gulf News 
தமிழில்: நம்ம ஊரான் 

தூய்மைப் பணி ~ மாவட்ட ஆட்சியர் தொடங்கி வைத்தார்

தஞ்சாவூர் மாவட்டம், மருத்துவக்கல்லூரி மருத்துவமனை வளாகத்தில் தூய்மையே சேவை தொடர்பாக தூய்மை பணியை மாவட்ட ஆட்சித் தலைவர் ஆ.அண்ணாதுரை இன்று (02.10.2017) தொடங்கி வைத்தார்.

தூய்மை பணியை தொடங்கி வைத்து மாவட்ட ஆட்சித் தலைவர் ஆ.அண்ணாதுரை செய்தியாளர்களிடம் தெரிவித்ததாவது;
மகாத்மா காந்தி  பிறந்தநாளையொட்டி அனைத்து ஊராட்சிகளிலும் ஒட்டுமொத்த தூய்மை பணி நடைபெறுகிறது. மாவட்ட நிர்வாகமும், பாரத வங்கி மற்றும் மருத்துவக்கல்லூரி மருத்துவமனை இணைந்து மருத்துவமனை வளாகத்தில் தூய்மை பணி இன்று தொடங்கி வைக்கப்பட்டது. மகாத்மா காந்தியின் கோட்பாடுகளான அகிம்சை, சகோதரத்துவம், தீண்டாமை, பெண்களுக்கு முக்கியத்துவம் போன்றவை அண்ணல் காந்தியடிகளின் கோட்பாடுகளாகும். மருத்துவக்கல்லூரி மருத்துவமனை வளாகத்தில் ஒட்டடை அடிக்கும் பணி, பிளாஸ்டிக் குப்பைகள் அகற்றும் பணி, டெங்கு பரவாமல் தடுப்பு நடவடிக்கைகள் போன்ற தூய்மை பணிகளை செய்து பொது மக்களுக்கு விழிப்புணர்வு ஏற்படுத்தப்படுகிறது. சுகாதாரத்தை கடைப்பிடிப்பதன் மூலம் தூய்மையாக நாம் வசிப்பதற்கும் வழிவகுக்கும்.

முன்னதாக தூய்மை தொடர்பான தூய்மையே சேவை உறுதிமொழி மாவட்ட ஆட்சித் தலைவர் அவர்கள் வசிக்க அனைவரும் உறுதிமொழி எடுத்துக்கொண்டனர்.

தூய்மை பாரதம் இயக்கம் சார்பில் தூய்மை பாரத தினம் 2.10.2017 அன்று நமது மாவட்டத்தில் உள்ள 589 ஊராட்சிகளிலும் “தூய்மையே சேவை” என்பதனை மையமாக வைத்து கட்டுரைப்போட்டி மற்றும் குறும்பட போட்டிகள் நடத்தப்பட்டது.  இதில் முதல் மூன்று இடங்களை பெற்ற நபர்களுக்கு பரிசுகள் மற்றும் சான்றிதழ் வழங்கப்பட்டது. வட்டார அளவில் சிறந்த படைப்புகள், மாவட்டத்திற்கு பரிந்துரை செய்யப்பட்டது. அவர்களில் சிறப்பாக தங்களின் கருத்துகளை வெளிப்படுத்தியவர்களின் கட்டுரை போட்டி மற்றும் குறும்பட போட்டிகளில் முதல் மூன்று இடங்களை பெற்ற நபர்களை, மாநில அளவில் பரிந்துரை செய்யப்பட்டுள்ளது. மேலும், 589 ஊராட்சிகளிலும் ஊக்குநர்கள், தனி நபர் இல்ல கழிப்பறை அமைப்பதற்கு தேர்வு செய்யப்பட்டு ஊராட்சி அளவில் பல்வேறு பணிகளை சிறப்பாக செய்த ஊக்குநர்களுக்கு சிறந்த சேவைக்கான சேவகர் நற்சான்றிதழும் பரிசுகளும் வழங்கப்பட்டது.

இந்நிகழ்ச்சியில் மாவட்ட ஊரக வளர்ச்சி முகமை திட்ட இயக்குநர் மந்திராசலம், தஞ்சாவூர் மருத்துவகல்கல்லூரி முதல்வர் டாக்டர் ஜெயக்குமார், நிலைய மருத்துவ அலுவலர் டாக்டர் எஸ்.நாகராஜன், பாரத வங்கியின் தலைமை மேலாளர் பன்னீர்செல்வம், உதவி திட்ட அலுவலர் பாரதிதாசன், வட்டார வளர்ச்சி அலுவலர்கள், பாரத வங்கியின் அலுவலர்கள் மற்றும் மருத்துவக்கல்லூரி மருத்துவமனை பணியாளர்கள் ஆகியோர் உடன் இருந்தனர்.

அதிராம்பட்டினம் பேரூர் தமுமுக மருத்துவ அணிச் செயலர் புதிதாக நியமனம் !

படத்தின் இடதுபுறத்தில் மூன்றாவதாக நிற்பவர் சமீர் அலி

அதிராம்பட்டினம், அக்.02
தமிழ்நாடு முஸ்லீம் முன்னேற்றக் கழகம் அதிராம்பட்டினம் பேரூர் மருத்துவ அணிச் செயலராக சமீர் அலி (19) இன்று திங்கட்கிழமை புதிதாக நியமிக்கப்பட்டார். இவருக்கு தமுமுக, மமக அதிரை பேரூர் நிர்வாகிகள் பலர் வாழ்த்து தெரிவித்தனர்.

இதுகுறித்து அவ்வமைப்பின், அதிராம்பட்டினம் பேரூர் செயலர் எம்.ஆர் கமாலுதீன் கூறியது; 
'தமுமுக மருத்துவ அணி செயலராக அதிராம்பட்டினம் சமீர் அலி, இன்று (அக். 2) முதல் நியமிக்கப்பட்டுள்ளார். தமுமுக சார்பில், அதிராம்பட்டினம் மற்றும் சுற்றுப்புற கிராமப் பகுதிகளின், அனைத்து சமுதாயத்தினரும் பயன்பெறும் வகையில், கடந்த 9 ஆண்டுகளாக செயல்படுத்தி வரும், ஆம்புலன்ஸ் வாகனம், மருத்துவ உதவி, இரத்த தானம் உள்ளிட்ட அவசர கால மருத்துவச் சேவைகளை, இவரைத் தொடர்புகொண்டு பெறலாம்' என்றார்.

PFI உரிமை முழக்க மாநாடு அழைப்பு பணி அதிரையில் தீவிரம் (படங்கள்)

அதிராம்பட்டினம், அக்.01
பாப்புலர் ப்ராண்ட் ஆஃப் இந்தியா அமைப்பின் சார்பில் உரிமை முழக்க மாநாடு வரும் அக்.7 ந் தேதி மதுரையிலும், அக்.8 ந்தேதி சென்னையிலும் நடைபெற உள்ளது.

இதையொட்டி, அவ்வமைப்பின் பட்டுக்கோட்டை டிவிசன் சார்பில், அதன் பிரசிடெண்ட் வழக்குரைஞர் நிஜாம் தலைமையில், அவ்வமைப்பினர் அதிராம்பட்டினத்தில் உள்ள பல்வேறு அரசியல் கட்சி பிரமுகர்கள், ஆட்டோ ஓட்டுநர், உரிமையாளர் நலச்சங்கத்தினர். பத்திரிகையாளர்கள் உள்ளிட்டோரை நேரில் சந்தித்து, மாநாடு அழைப்பிதழ்களை இன்று ஞாயிற்றுக்கிழமை வழங்கினார்கள்.

 

 

 

 

 

அதிரை பைத்துல்மால் சேவை அமைப்பின் மாதாந்திரக் கூட்டம் (படங்கள்)

அதிராம்பட்டினம், அக். 01

தஞ்சாவூர் மாவட்டம், அதிராம்பட்டினம் பைத்துல்மால் சேவை அமைப்பின் செப்டம்பர் மாத மாதாந்திரக் கூட்டம், அவ்வமைப்பின் தலைவர் பேராசிரியர் எஸ். பர்கத் தலைமையில், அலுவலகத்தில் நேற்று [ 30-09-2017 ] அன்று சனிக்கிழமை இரவு 7 மணியளவில் நடைபெற்றது.

 

 

 

 

அதிரை பைத்துல்மால் - செப்டம்பர் மாத சேவை மற்றும் செயல்பாடுகள் பற்றிய விவரங்கள்:

 

 

 

 

இந்தியரின் உயிரைக் காப்பாற்றிய அமீரகப் பெண்ணிற்கு குவியும் பாராட்டு !

அதிரை நியூஸ்: அக்.01
அமீரகம், ராஸ் அல் கைமா மார்டிர்ஸ் சாலையில் ஏற்பட்ட விபத்தில் இரண்டு ட்ரக்குகள் மோதிக்கொண்டு தீ பற்றி எரிந்தது. இதில் இந்தியாவை சேர்ந்த சிங் என்ற ஓட்டுநரின் உடலில் தீ பற்றி எரிந்து உயிருக்கு போராடிக்கொண்டிருந்தார். அப்போது காரில் சென்றுகொண்டிருந்த ஜவஹர் சைப் அல் குமைத்தி (22) என்ற அமீரகப் பெண், தான் அணிந்து இருந்த புர்க்காவை கழட்டி ஓட்டுநரின் உடலில் மளமளவென பரவிய தீயை அணைத்தார்.

பின்னர் சம்பவ இடத்திற்கு விரைந்து வந்த போலீசார், தீயில் படுகாயமடைந்த ஓட்டுநர் சிங்கை மீட்டு மருத்துவமனையில் அனுமதித்தனர். அங்கு தீவிர சிகிச்சை அளிக்கப்பட்டு வருகிறது. தற்போது சிங் அபாயக்கட்டத்தைத் தாண்டிவிட்டதாக தெரிவிக்கப்பட்டுள்ளது.

துரிதமாக செயல்பட்டு, ஒரு உயிரைக் காப்பாற்ற உதவிய ஜவஹரின் துணிச்சலைப் பாராட்டி, ராஸ் அல் கைமா சிவில் பாதுகாப்பு இயக்குநர் பிரிகேடியர் முகமது அப்துல்லா அல் ஜாபி, துறை தலைமையகத்தில் ஜவஹர் மற்றும் அவரது தந்தையை வரவழைத்து கெளரவித்தார். மேலும் சமூக வலைதளங்களில் இப்பெண்ணிற்கு பாராட்டு குவிந்து வருகிறது.

Source : Khaleejtimes

அமீரகத்தில் இன்று (அக்.1) முதல் புகையிலை பொருட்கள் மீது 100% கலால் வரி உயர்வு !

அதிரை நியூஸ்: அக்.01
அமீரகத்தில் எதிர்வரும் அக்டோபர் 1 ஆம் தேதி முதல் உடலிற்கு தீங்குவிளைவிக்கக் கூடிய புகையிலை பொருட்கள் (Tobacco products), சக்தி பானங்கள் (Energy Drinks) மற்றும் கேஸ் அடைக்கப்பட்ட மென்பானங்கள் (Carbonated Drinks) மீது 50% முதல் 100% வரை கலால் வரி (Excise Tax) உயர்த்தப்பட்டுள்ளது.

இந்த அதிரடி வரி உயர்வின் மூலம் அரசின் வருமானம் அதிகரிப்பதுடன் சுற்றுச்சூழலுக்கும், மனிதர்களுக்கும் கேடு தரும் இப்பொருட்களின் பயன்பாடு குறையுமென்றும், அரசிற்கு ஆண்டுக்கு சுமார் 7 பில்லியன் திர்ஹம் கூடுதல் வருவாய் கிடைக்குமென்றும், இந்த வரி வருவாயை கொண்டு மக்களுக்கான பல நல்ல திட்டங்கள் செயல்படுத்தப்படும் என்றும் அமீரக பெடரல் அரசு அறிவித்துள்ளது.

இந்த வரி உயர்வு அனைத்து ப்ரீ ஸோன்கள் (Free Zone Ports)(வரியற்ற மண்டலங்கள்) உட்பட நாடு முழுமைக்கும் பொருந்தும். அமீரகத்திற்குள் கொண்டு வரப்படும், மற்றும்அமீரகத்திற்குள் உபயோகப்படுத்தப்படும் மேற்படி பொருட்களுக்கு இது பொருந்தும். அதேவேளை நாட்டிற்குள் கொண்டு வரப்படாமல் வெளியே எடுத்துச் செல்லப்படும் பொருட்களுக்கு பொருந்தாது. (உம். ஏர்போர்ட், துறைமுகம், ப்ரீ ஸோன் போன்றவை வழியாக)

இப்புதிய கலால் வரிகள் ஒரு பார்வை:
1.கேஸ் ஏற்றப்பட்ட பானங்கள்:
கேஸ் ஏற்றப்பட்ட சோடா மற்றும் மென்பானங்கள் மீது 50 கலால் உயர்த்தப்பட்டுள்ளதால் தற்போது 1.50 திர்ஹத்திற்கு விற்கப்படுபவை இனி 2.25 திர்ஹத்திற்கு விற்கப்படும்.

2. சக்தி தரும் பானங்கள்: 
உடலிற்கு சக்தி தரும் பானங்கள்; என்ற பெயரில் விற்கப்படும் இப்பானங்கள் மீது 100 கலால் வரி உயர்த்தப்பட்டுள்ளதால் உதாரணத்திற்கு தற்போது 8 திர்ஹத்திற்கு கிடைக்கும் பானம் இனி 16 திர்ஹத்திற்கு விற்கப்படும்.

3. புகையிலை தயாரிப்புகள்:
சிகரெட் போன்ற புகையிலை தயாரிப்புகளின் கலால் வரியும் 100 உயர்த்தப்பட்டுள்ளதால் இனி விலைகளும் இருமடங்காகும். உதாரணத்திற்கு 12 திர்ஹத்திற்கு கிடைக்கும் சிகரெட் பாக்கெட் அக். 1 முதல் 24 திர்ஹமாக உயரும்.

Source: Gulf News
தமிழில்: நம்ம ஊரான்