அதிரையின் சுகாதார சீர்க்கேட்டை கண்டித்து நூதன போராட்டத்தில் ஈடுபட்ட இளைஞர்கள் ( படங்கள் )

அதிராம்பட்டினம், பிப்-27
தஞ்சாவூர் மாவட்டம், அதிராம்பட்டினம் பேரூராட்சிக்கு உட்பட்ட பகுதிகளில் அதிகமாக உற்பத்தியாகும் கொசுக்களை கட்டுப்படுத்தாத பேரூராட்சி நிர்வாகத்தைக் கண்டித்து சாக்கடை தேங்கி நிற்கும் கால்வாய் அருகே இளைஞர்கள் சோடியம் விளக்கு வெளிச்சத்தில் விளம்பர பதாகை வைத்து நூதன போராட்டத்தில் திங்கட்கிழமை இரவு ஈடுபட்டனர்.

இதுகுறித்து அப்பகுதியை சேர்ந்த சகாபுதீன் மற்றும் அய்வா சங்கத்தினர் கூறுகையில்;
அதிராம்பட்டினம் பேரூராட்சி 12 வது வார்டுக்கு உட்பட்ட பெரிய கடைத்தெரு செல்லும் சாலையின் ( என்.கே.எஸ் சவுண்ட் சர்வீஸ் அருகில் ) குடியிருப்பு கழிவு நீர் கால்வாயில் அடைப்பு ஏற்பட்டு பல மாதங்களாக சாக்கடை தேங்கி காணப்படுகிறது. இதனால் இப்பகுதியில் துர்நாற்றம் வீசிவருகிறது. கொசு உற்பத்தியாகி தொற்று நோய் ஏற்படும் அபாயம் உள்ளது. இதுகுறித்து பலமுறை புகார் அளித்தும் எவ்வித நடவடிக்கையும் எடுக்கவில்லை. இதை அரசின் கவனத்திற்கு கொண்டு செல்லும் விதமாக கழிவு நீர் தேங்கி காணப்படும் வடிகால் அருகே சோடியம் விளக்கு வெளிச்சத்தை ஏற்படுத்தி, "பலரை பலிவாங்க துடிக்கும் அதிரை பேரூராட்சியின்  மலேரியா, டெங்கு, பன்றி காய்ச்சல் உற்பத்தியாகும் கூடம் இதுதான்" என்ற வாசகம் அடங்கிய விளம்பரப் பதாகை வைத்து நூதன போராட்டத்தில் ஈடுபட்டுள்ளோம்' என்றனர்.

 

 

 

இலவச தாய் - சேய் வாகன (102) சேவையை ஆட்சியர் தொடங்கி வைத்தார் !

தேசிய நல்வாழ்வு திட்டம் - தமிழ்நாடு சுகாதாரத் திட்டம் - இந்தியன் ரெட்கிராஸ் சொசைட்டி தமிழ்நாடு கிளையின் மூலம், இலவச தாய் சேய் வாகனத்தினை (102) TN 20G 2154 என்ற வாகனம் மாவட்ட ஆட்சித் தலைவர் ஆ.அண்ணாதுரை அவர்கள் இன்று (27.02.2017) மக்கள் பயன்பாட்டிற்கு துவக்கி வைத்து தஞ்சாவூர் மருத்துவக்கல்லூரி முதல்வர் டாக்டர் வனிதாமணி அவர்களிடம் ஒப்படைத்தார்.

தேசிய நல்வாழ்வு திட்டம் - தமிழ்நாடு சுகாதாரத் திட்டம் - இந்தியன் ரெட்கிராஸ் சொசைட்டி தமிழ்நாடு கிளையின் மூலம், இலவச தாய் சேய் வாகனம் ( JSSK ) இந்தியன் ரெட்கிராஸ் சொசைட்டி தஞ்ர்சாவூ மாவட்ட கிளைக்கு TN 20G 2154 என்ற வாகனம் வழங்கப்பட்டுள்ளது.

இச்சேவை மூலம் அரசு தாய் சேய் மருத்துவமனையில் பிரசிவித்த தாய் மற்றும் குழந்தைகள், அதன் பின்னர் ஒரு வருடத்திற்கு தடுப்பூசிக்காகவும் மற்றும் குழந்தைகள் மருத்துவமனையில் இருந்து அவர்களது இல்லத்திற்கு பாதுகாப்பாக அழைத்துச் செல்லப்படுகிறது. இந்த 102 சேவை முற்றிலும் ஒரு இலவச சேவையாகும். எந்த ஒரு நபருக்கும் சன்மானம் கொடுக்க தேவையில்லை.

இந்த 102 சேவை வாகனம் இன்று முதல் (27.02.2017) தஞ்சாவூர் இராசா மிராசுதார் மருத்துவமனையில் இருந்து பொது மக்களின் சேவைக்காக பயன்படுத்தப்பட உள்ளது. இச்சேவைக்க இலவச தொலைபேசி எண் 102ஐ அணுகி பயன் பெறுமாறு மாவட்ட ஆட்சித் தலைவர் ஆ.அண்ணாதுரை அவர்கள் தெரிவித்துள்ளார்.

இந்நிகழ்ச்சியில் இணை இயக்குநர் டாக்டர் ஜெயசேகர், தமிழ்நாடு சுகாதார திட்ட தஞ்சை மாவட்ட திட்ட ஒருங்கிணைப்பாளர் டாக்டர் எட்வின், இந்தியன் ரெட்கிராஸ் சொசைட்டி சேர்மன் எஸ்.இராஜமாணிக்கம், செயலாளர் யூ.ஜோசப், பொருளாளர் எஸ்.முத்துக்குமார், திட்ட ஒருங்கிணைப்பாளர் டி.சுரேஷ்குமார் ஆகியோர் கலந்து கொண்டனர்.

1.5 லட்சம் டாலர் மதிப்புள்ள காரை சோதனை ஓட்டத்தின் போது ஆட்டையை போட்ட ஆசாமி !

அதிரை நியூஸ்: பிப்-27
அமெரிக்கர் ஆட்டையை போடுவதில் கில்லாடிகள் என்பதை அறிவோம், உதாரணத்திற்கு அரபு நாடுகளின் எண்ணெய் வளத்தை சுரண்டுவது என முடிவெடுத்துவிட்டால் எத்தகைய பொய்யையும் சொல்லி குறிப்பிட்ட நாடுகளை போரெடுத்து சூறையாடி தங்களின் கைக்குள் கொண்டு வரக்கூடியவர்கள் என்பது நிதர்சன வரலாறு.

அதேபோல் தங்களுடைய மருந்தை விற்பதற்காகவே பிற நாடுகளில் பலவகையான நோய்களை பரப்பி நமது பொருளாதாரத்தை நமக்கு தெரியாமலேயே சுரண்டும் வல்லமை படைத்தவர்கள் என்ற கூற்றும் உண்டு.

நாடே இப்படி என்றால் அதன் பிரஜை மட்டும் சளைத்தவர்களா என்ன? மன்னன் எவ்வழியோ மக்களும் அவ்வழியே என்ற சொல்லை மெய்ப்பிக்கும் வண்ணம் புளோரிடா மாகாணத்தை சேர்ந்த சுமார் 45 வயது மதிக்கத்தக்க மைக்கேல் கில்வாரி என்ற அமெரிக்கர் ஒருவர் போக்கா ராட்டோன் (Boca Raton) என்ற இடத்திலுள்ள கார் விற்பனையகத்திற்கு வருகை தந்தார். இங்கு 150 ஆயிரம் டாலர் மதிப்புடைய மாஸரெட்டி கிரேன் டிரிஸ்மோ (Maserati GranTurismo) என்ற விலைமதிப்புமிகு காரை சோதனை ஓட்டம் (Test Ride) செய்ய விரும்பியதை தொடர்ந்து வழமைபோல் விற்பனையாளர் ஒருவருடன் சோதனை ஓட்டம் செய்து பார்க்க அனுமதிக்கப்பட்டார்.

ஒரு கப்பற்தள (Marina) வேலட் வாகன நிறுத்துமிடத்தில் (Valet Parking) காரை நிறுத்திவிட்டு உள்ளே சென்றனர், அங்கு தனது பெண் நண்பரை அழைத்து புதிய காரை அவரிடம் காட்ட வேண்டும் சிறிது நேரம் இங்கேயே காத்திருங்கள் என்று விற்பனை பிரதிநிதியிடம் கூறி சென்றவர் பின்பு அங்கு திரும்பவே இல்லை. 30 நிமிட காத்திருப்புக்குப் பின் வேலட் வாகன நிறுத்துமிட பொறுப்பாளர்களிடம் விசாரித்த போது தான் தெரிந்தது ஆசாமி காருடன் கம்பி நீட்டிய விபரம்.

காவல்துறையின் 24 மணிநேர தேடுதல் வேட்டைக்குப்பின் கார் திருட்டு ஆசாமி சிக்கினாலும் இன்னும் காரை கண்டுபிடிக்க முடியவில்லையாம்.

வடிவேல் என்கிற தமிழ் சினிமா காமெடியனின் காட்சிகள் பல அரசியல் முதல் பல தளங்களிலும் சகட்டுமேனிக்கு அரங்கேறி வந்தாலும் சர்வதேச அளவிலும் தற்போது அரங்கேறியுள்ளது.

Source: Emirates 247
தமிழில்: நம்ம ஊரான் 

காதிர் முகைதீன் கல்லூரியில் அவசரகால முதலுதவி விழிப்புணர்வு கருத்தரங்கம் !

அதிராம்பட்டினம், பிப்-27
தஞ்சாவூர் மாவட்டம், அதிராம்பட்டினம் காதிர் முகைதீன் கல்லூரி இளைஞர் செஞ்சுலுவை சங்கம் சார்பில் அவசரகால முதலுதவி குறித்து விழிப்புணர்வு கருத்தரங்க நிகழ்ச்சி கல்லூரியில் திங்கட்கிழமை நடைபெற்றது.

நிகழ்ச்சிக்கு கல்லூரி முதல்வர் முனைவர் ஏ.எம் உதுமான் முகையதீன் தலைமை வகித்தார். கல்லூரி இளைஞர் செஞ்சுலுவை சங்க அலுவலர் மேஜர் டாக்டர் எஸ்.பி கணபதி வரவேற்றார்.

நிகழ்ச்சியில் மாவட்ட இளைஞர் செஞ்சுலுவை சங்க அமைப்பாளரும், பூண்டி புஸ்பம் கல்லூரி பேராசிரியர் பி. நடராஜன் கலந்துகொண்டு பேசுகையில்; மாணவர்கள் கல்வி கற்பதோடு பொதுநல சேவைகளில் ஈடுபட முன்வர வேண்டும். குறிப்பாக இரத்த தானம் செய்தல், சுற்றுச்சூழல் பாதுகாப்பு, அவசரகால முதலுதவி ஆகியவற்றில் தன்னார்வலராக செயல்பட வேண்டும். இந்தியன் செஞ்சுலுவை சங்கம் மூலம் செயல்படுத்தி வரும் அவசரகால முதலுதவிப் பணிகளை பொதுமக்களிடம் எடுத்துக்கூறி விழிப்புணர்வு ஏற்படுத்த வேண்டும்' என்றார். கருத்தரங்க முடிவில் பேராசிரியை டாக்டர் சித்ரா நன்றி கூறினார்.

இக்கருத்தரங்கில் கல்லூரி பேராசிரியர்கள், அலுவலக, ஆய்வகப் உதவியாளர்கள் மற்றும் 100 க்கும் மேற்பட்ட மாணவ, மாணவிகள் கலந்துகொண்டனர்.

அதிரையில் மகனின் புதிய தொழில் நிறுவனத்தை நெகிழ்ச்சியுடன் திறந்து வைத்த தாய் ! ( படங்கள் )

அதிராம்பட்டினம், பிப்-27
தஞ்சாவூர் மாவட்டம், அதிராம்பட்டினம் பேருந்து நிலையம் எதிரே உள்ள ஜக்கரியா வணிக வளாகத்தில் கடந்த 11 ஆண்டுகளாக 'சூப்பர் டிஜிட்டல் ஸ்டுடியோ' என்ற தொழில் நிறுவனத்தை நடத்தி வருபவர் அப்துல் ரஹ்மான். இதன் மற்றுமொரு அங்கமாக 'சூப்பர் திருமண அழைப்பிதழ் ஷோரும்' என்ற பெயரில் திருமண அழைப்பிதழ்களுக்கான பிரத்யோக ஷோரூமை புதிதாக தொடங்கி உள்ளார்.

இன்று திங்கட்கிழமை காலை இதன் திறப்பு விழா நிகழ்ச்சி நடைபெற்றது. இந்நிகழ்ச்சியில் நிறுவன உரிமையாளர் அப்துல் ரஹ்மானின் தாய் நபீசா அம்மாள் தனது மகனின் புதிய தொழில் நிறுவனத்தை மனம்நிறைந்த நெகிழ்ச்சியோடு திறந்து வைத்து வாழ்த்தினார். இந்நிகழ்ச்சியில் ஊர் பிரமுகர்கள், உறவினர்கள், நண்பர்கள் பலர் கலந்துகொண்டு வாழ்த்தினர்.

இதுகுறித்து நிறுவன உரிமையாளர் அப்துல் ரஹ்மான் கூறுகையில்;
'சூப்பர் டிஜிட்டல் ஸ்டுடியோ' ஒரு அங்கமாக ''சூப்பர் திருமண அழைப்பிதழ் ஷோரும்" திறக்கப்பட்டுள்ளது. என் மீது அதிக பாசம் கொண்டுள்ள எனது தாய் அவர்களை வைத்து புதிய ஷோரூமை திறந்தது எனக்கு மிக மகிழ்ச்சியை தருகிறது.

இந்நிறுவனத்தில் திருமணங்கள், விழாக்கள் உள்ளிட்ட சுப நிகழ்ச்சிகளுக்கான அனைத்து வகை அழைப்பிதழ்கள் குறைந்த கட்டணத்தில், வாடிக்கையாளர்கள் விருப்பத்திற்கேற்ற நவீன டிசைன்களில் தரமானதாக தயார்செய்து உரிய நேரத்தில் விநியோகம் செய்ய உள்ளோம். மேலும் ரெடிமேட் கார்டுகள், மல்டி கலர் கார்டுகள், வாழ்த்து அட்டைகள், லட்டர் பேடு, கவர், வால்போஸ்டர், விசிடிங் கார்டு உள்ளிட்டவை தயார் செய்து தரப்படும்.  அதிராம்பட்டினம் மற்றும் சுற்றுப்புற பகுதியினர் எங்களது நிறுவனத்திற்கு தொடர்ந்து ஆதரவளிக்க வேண்டும்' என்றார்.

தொடர்புக்கு: 9976329344 

 

 

 

 

துருக்கியில் பூமிக்கு அடியில் 600 வாசல்களுடன் 18 மாடி நகரம் (படங்கள்)

அதிரை நியூஸ்: பிப்-27
நம்முடைய காலத்தில் பூமிக்கு மேல் விண்ணை முட்டும் கட்டிடங்கள் எழுப்பப்படுவதை பார்த்து வருகின்றோம் ஆனால் சுமார் 1000 வருடத்திற்கு முன்வாழ்ந்த நமது முன்னோர்கள் பூமிக்கு அடியில் 18 மாடி உயரத்திற்கு ஓரு வீட்டையல்ல ஒரு நகரையே சகல வசதிகளுடன் உருவாக்கும் வல்லமையை பெற்றிருந்துள்ளனர்.

துருக்கியின் இன்றைய டெரின்கியூ (Derinkuyu) நகரில் அடியில் சுமார் 85 மீட்டர் ஆழத்திற்கு குடைந்தெடுத்து நிர்மாணிக்கப்பட்ட இந்நகரில் சுமார் 20 ஆயிரம் பேர் ஒரே நேரத்தில் வசிக்கலாம். மேலும் அவர்களுக்கு தேவையான உணவுகள் சேமிப்பு வசதிகள், கால்நடைகள், தொழுவங்கள், சமையலறைகள், தேவாலயம், கல்லறை, பள்ளி வகுப்பறைகள், சமுதாயக் கூடம், கிணறுகள் என நன்கு திட்டமிட்டு அமைக்கப்பட்டுள்ளதுடன் தேவையேற்படின் ஒவ்வொரு தளத்தையும் மூடிக்கொள்ள பிரம்மாண்ட பாறைகளால் அமைந்த கதவுகள், இந்நகரத்தைச் சுற்றி எந்நேரமும் வெளியே சென்று வருவதற்கு வசதியாக சுமார் 600 மறைவான வாயில்கள் என தேவையான அடிப்படை வசதிகளுடன் அமைக்கப்பட்டுள்ளது.

போர்களால் சூழ்ந்திருந்த பைஸாந்தியப் பேரரசின் ஆட்சிகாலமான (Byzantine Era) கி.பி 780 – 1180 ஆண்டுகளில் கட்டப்பட்ட இந்த நிழவறை நகரம் போர்க்காலங்களில் மக்களை காக்கும் பதுங்கு குழிகளாகவே (Bunkers) திகழ்ந்திருக்கலாம் என வரலாற்று ஆய்வாளர்கள் யூகிக்கின்றனர்.

இதைபோல் துருக்கியின் கப்படோசியா (Cappadocia) பிராந்தியத்தில் காணப்படும் பிற நிலத்தடி நகரங்களையும் பல மைல் தூரத்திற்கு பூமிக்கடியில் செல்லும் சுரங்கப்பாதையின் மூலமும் இணைத்துள்ளனர்.

1963 ஆம் ஆண்டு துருக்கியர் ஒருவர் தனது வீட்டை செப்பனிடுவதற்காக தோண்டியபோது எதேச்சையாக தன் வீட்டுக்கு அடியில் இந்நகரத்தை கண்டுபிடித்தார். தற்போது சுற்றுலாவாசிகளின் வசதிக்காக மின்மயப்படுத்தப்பட்டுள்ள இந்நகரின் பெரும்பாலான பகுதிகளுக்கும் செல்ல சுற்றுலாவாசிகள் அனுமதிக்கப்படுகின்றனர், சில பகுதிகளில் கட்டிடத்தின் பாதுகாப்பு கருதி அனுமதி மறுக்கப்பட்டுள்ளது.

Source: Mirror / Msn
தமிழில்: நம்ம ஊரான் 

 

 

 

 

 

 

 

அதிரை, முத்துப்பேட்டை பகுதிகளில் நாளை ( பிப். 28 ) மின்தடை !

அதிராம்பட்டினம், பிப்-27
அதிராம்பட்டினம், முத்துப்பேட்டை பகுதிகளில் நாளை செவ்வாய்கிழமை (பிப். 28 ) மின்சார விநியோகம் இருக்காது.

மதுக்கூர் துணை மின் நிலையத்தில் பராமரிப்புப் பணிகள் நடைபெறவுள்ளதால், இங்கிருந்து மின்சாரம் பெறும் அதிராம்பட்டினம், துவரங்குறிச்சி, தாமரங்கோட்டை, முத்துப்பேட்டை ஆகிய பகுதிகளில் நாளை செவ்வாய்கிழமை காலை 9 மணி முதல் மாலை 5 மணி வரை மின்சார விநியோகம் இருக்காது என மதுக்கூர் மின் வாரிய உதவி செயற்பொறியாளர் ஆர். ஜெய்சங்கர் தெரிவித்துள்ளார்.

காதிர் முகைதீன் கல்லூரியில் தேசிய அளவிலான பயிலரங்கம் ( படங்கள் )

அதிராம்பட்டினம், பிப்-26
தஞ்சாவூர் மாவட்டம், அதிராம்பட்டினம் காதிர் முகைதீன் கல்லூரி விலங்கியல் துறை சார்பாக தேசிய அளவிலான பயிலரங்கம் ஞாயிற்றுக் கிழமை நடைபெற்றது.

பயிலரங்க நிகழ்ச்சிக்கு கல்லூரி முதல்வர் ஏ.எம்.உதுமான் முகையதீன் தலைமை வகித்து உரை நிகழ்த்தினார். சிறப்பு விருந்தினராக கலந்துகொண்ட மயிலாடுதுறை ஏ.வி.சி கல்லூரி முதல்வர் ஆர். நடராஜன்
பயிலரங்கு நிகழ்ச்சியை தொடங்கிவைத்து பேசுகையில்; புள்ளியல் பாடம், அதன் அவசியம் மற்றும் எஸ்.பி.எஸ்.எஸ் பேக்கேஜ் ல் கணக்கீடும் முறை குறித்து எடுத்துரைத்தார்.

விலங்கியல் துறைத்தலைவர் பி. குமாரசாமி வரவேற்று பயிலரங்கு பற்றிய மைய கருத்துகளை எடுத்துரைத்தார். பயிலரங்க முடிவில் அமைப்புச் செயலர் முனைவர்.ஓ.சாதிக் நன்றி கூறினார். நிகழ்வுகளை முனைவர் ஏ.அம்சத் தொகுத்து வழங்கினார்.

இதில் கல்லூரி அனைத்து துறைத்தலைவர்கள், பேராசிரியர்கள், அலுவலகப் பணியாளர்கள், ஆராய்ச்சி மாணவர்கள், 50க்கும் மேற்பட்ட கல்லூரி மாணவ, மாணவிகள் கலந்துகொண்டனர்.