மரண அறிவிப்பு ~ ரசூல் பீவி (வயது 82)

அதிரை நியூஸ்: ஜன.28
அதிராம்பட்டினம், மேலத்தெருவை சேர்ந்த மர்ஹும் கை.செ.மு முகமது முகைதீன் அவர்களின் மகளும், மர்ஹூம் அன்னபச்சி என்கிற எம்.எம்.எஸ் ஹாஜா முகைதீன் அவர்களின் மனைவியும், கை.செ.மு கமாலுதீன் அவர்களின் சகோதரியும், முகமது புஹாரி, மர்ஹூம் முகமது இக்பால், மர்ஹூம் ஜமால் முகமது ஆகியோரின் தாயாரும், காதர் சுல்தான், பஷிர் அகமது, மர்ஹூம் கமாலுதீன், பகுருதீன், மர்ஹூம் முத்து மரைக்காயர், அப்துல் கரீம் ஆகியோரின் மாமியாருமாகிய ரசூல் பீவி (வயது 82) அவர்கள் இன்று வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜிவூன்.

அன்னாரின் ஜனாஸா நாளை (29-01-2019) காலை 10 மணியளவில் பெரிய ஜும்மா பள்ளிவாசல் மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

தென்னை மரம் அறுக்கும் இயந்திரங்கள் மற்றும் துகளாக்கும் இயந்திரங்களை வாடகைக்கு பெறலாம்: ஆட்சியர் தகவல்!

தஞ்சாவூர் மாவட்டம், கஜா புயலால் சாய்ந்த தென்னை மரங்களை அப்புறப்படுத்துவதற்கு கனரக மரம் அறுக்கும் இயந்திரங்கள் மற்றும் துகளாக்கும் இயந்திரங்களை வாடகைக்கு பெற்றுக் கொள்ளலாம் என மாவட்ட ஆட்சித்தலைவர் ஆ.அண்ணாதுரை தெரிவித்துள்ளார்.

இதுகுறித்து மாவட்ட ஆட்சித் தலைவர் தெரிவித்துள்ளதாவது : -
கடந்த 16.11.2018 அதிகாலை வீசிய கஜா புயலால் தஞ்சாவூர் மாவட்டத்தில் மிக அதிக அளவில் தென்னை மரங்கள் வேரோடு சாய்ந்தும், முறிந்து விழுந்தும், பாதிக்கப்பட்டது. வேரோடு சாய்ந்த மற்றும் முறிந்து விழுந்த தென்னை மரங்களை அறுத்து அப்புறப்படுத்துவதற்கு ஏதுவாக வேளாண்மை பொறியியல் துறை மூலம் 300 கனரக மரம் அறுக்கும் இயந்திரங்களும், 13 துகளாக்கும் இயந்திரங்களும் பாதிக்கப்பட்ட தென்னை விவசாயிகளுக்கு வாடகைக்கு வழங்குவதற்காக அரசால் ஒதுக்கீடு செய்யப்பட்டுள்ளது.  கனரக மரம் அறுக்கும் இயந்திரத்தினை ஒரு மணி நேரத்திற்கு 85 ரூபாய் என்ற வாடகையிலும், டிராக்டருடன் பொருத்தப்படக்கூடிய தென்னை மட்டை துகளாக்கும் இயந்திரத்தினை ஒரு மணி நேரத்திற்கு 340 ரூபாய் என்ற வாடகையிலும் தென்னை விவசாயிகள் பெற்றுக் கொள்ளலாம். தஞ்சாவ10ர் வட்டாரத்தைச் சேர்ந்த தென்னை விவசாயிகள் 9486293697 என்ற தொலைபேசி எண்ணிலும், ஒரத்தநாடு வட்டாரத்தைச் சேர்ந்த தென்னை விவசாயிகள் 9047538290 என்ற தொலைபேசி எண்ணிலும், திருவோணம் வட்டாரத்தைச் சேர்ந்த தென்னை விவசாயிகள் 9442246951 என்ற தொலைபேசி எண்ணிலும், பட்டுக்கோட்டை வட்டாரத்தைச் சேர்ந்த தென்னை விவசாயிகள் 9443888352 என்ற தொலைபேசி எண்ணிலும், மதுக்கூர் வட்டாரத்தைச் சேர்ந்த தென்னை விவசாயிகள் 9443984339 என்ற தொலைபேசி எண்ணிலும், பேராவூரணி வட்டாரத்தைச் சேர்ந்த தென்னை விவசாயிகள் 9976193110 என்ற தொலைபேசி எண்ணிலும், சேதுபாவாசத்திரம் வட்டாரத்தைச் சேர்ந்த தென்னை விவசாயிகள் 8056860494 என்ற தொலைபேசி எண்ணிலும் தொடர்பு கொண்டு கனரக மரம் அறுக்கும் இயந்திரங்கள் மற்றும் துகளாக்கும் இயந்திரங்களை வாடகைக்கு பெற்றுக்கொள்ளலாம்.  இவ்வாறு மாவட்ட ஆட்சித் தலைவர் ஆ.அண்ணாதுரை தெரிவித்துள்ளார்.

தஞ்சையில் TNPSC இளநிலை ஆய்வாளர் பணிக்கான போட்டித் தேர்வு: ஆட்சியர் ஆய்வு!

தஞ்சாவூர் மாவட்டம், தஞ்சாவூர் பெரியார் மணியம்மை கல்லூரி மற்றும் கமலா சுப்ரமணியம் மெட்ரிக் மேல்நிலைப்பள்ளியில் தமிழ்நாடு அரசு பணியாளர் தேர்வாணையத்தின் கூட்டுறவு சங்க இளநிலை ஆய்வாளர் ( Junior Inspector of Co-operative Societies )  பணிக்கான போட்டித் தேர்வு நடைபெற்றதை மாவட்ட ஆட்சித்தலைவர் ஆ.அண்ணாதுரை இன்று (27.01.2019) நேரில் பார்வையிட்டு ஆய்வு செய்தார்.

ஆய்விற்கு பிறகு மாவட்ட ஆட்சியர் தெரிவித்ததாவது; 
தேர்வு கண்காணிப்பில் ஈடுபடும் அலுவலர்கள் கவனமாக பணியாற்றவும், 100 சதவிகிதம் தவறுகள் நடைபெறாமல் கண்காணிக்கவும், தேர்வு எழுதுபவர்கள் தவறு செய்தால் அவர்கள் மீது கடும் நடவடிக்கை எடுக்கவும் உத்தரவிடப்பட்டுள்ளது.

இத்தேர்விற்கு 3791 நபர்கள் தேர்வு எழுத விண்ணப்பித்து இருந்தனர்.  இன்று நடைபெற்ற தேர்வில் 2541 நபர்கள் தேர்வு எழுதினர். 1250 நபர்கள் தேர்வு எழுத வரவில்லை.  67 சதவிகித நபர்கள் இத்தேர்வு எழுதினார்கள்.

தேர்வு தொடங்கிய அரை மணி நேரத்திற்கு பின்னர் தேர்வர்கள் யாரையும் தேர்வு அறைக்குள் அனுமதிக்கக் கூடாது எனவும், தேர்வர்கள் எவரும் செல்போன், ஐபேட், கால்குலேட்டர், டேபிளேட் மற்றும் அதிநவீன மின்னணு சாதனங்கள் பயன்படுத்தக்கூடாது என அறிவுறுத்தப்பட்டுள்ளது.  தேர்வு நடைபெறும் மையங்களில் அடிப்படை வசதிகளான குடிநீர் வசதி, மின் வசதி, செய்யப்பட்டுள்ளது. இவ்வாறு மாவட்ட  ஆட்சித் தலைவர் ஆ.அண்ணாதுரை தெரிவித்தார்.

ஆய்வின் போது வருவாய் கோட்டாட்சியர் சுரேஷ், வட்டாட்சியர் அருணகிரி ஆகியோர் உடன் இருந்தனர்.

திருச்சி இனாம்குளத்தூரில் பிரமாண்ட இஜ்திமா மாநாடு ~ லட்சக்கணக்கானோர் பங்கேற்பு!

அதிரை நியூஸ்: ஜன.27
ஜன.26, 27, 28 ஆகிய 3 நாட்கள் நடைபெறும் தமிழ்நாடு இஜ்திமா மாநாடு திருச்சி அருகே, இனாம்குளத்தூரில் பிரமாண்டமாக நடைபெற்று வருகிறது.

நேற்று (ஜன.26) சனிக்கிழமை காலை பஜ்ர் தொழுகைக்கு பிறகு சிறப்பு துஆவுடன் இஜ்திமா மாநாடு தொடங்கியது. அதைத்தொடர்ந்து மார்க்க அறிஞர்களின் சொற்பொழிவுகள் நடைபெற்றன.

இந்த மாநாடு இன்றும் (ஞாயிற்றுக்கிழமை), நாளையும் (திங்கட்கிழமை) தொடர்ந்து நடக்கிறது. மாநாட்டில், இறைவன் கட்டளையை நிறைவேற்றி இறைத்தூதர் நபிகள் நாயகத்தின் (ஸல்) வாழ்க்கை முறையை பின்பற்றி அனைவரும் வாழ வேண்டும், மறுமை வாழ்வை நினைத்து அதற்கு தகுந்தாற்போல் எப்படி வாழ வேண்டும், சகோதரத்துவம், மனிதநேயம், மனிதாபிமானம், நல்லொழுக்கம், ஒற்றுமை, பிறருக்கு உதவும் மனப்பான்மை, அனாதைகளை ஆதரித்தல், ஏழை ~ எளியோருக்கு உதவுதல், மகளிருக்குரிய உரிமை மற்றும் சலுகைகளை இஸ்லாமியம் அருளியபடி முறையாக கொடுத்து அவர்களை கவுரவப்படுத்துவது, குழந்தை வளர்ப்பு முறை பற்றி போதித்தல், வணிகத்தில் நேர்மை, கொடுக்கல் ~ வாங்கலில் நேர்மை, மது இல்லா வாழ்வு, உயரிய பண்பாட்டோடு வாழ்வது, இழிவு பேசுவதை தவிர்த்து வாழ்வது குறித்து தினமும் சொற்பொழிவு நடைபெறுகிறது.

பல்வேறு பகுதிகளில் இருந்து வந்துள்ள பிரபல மார்க்க அறிஞர்கள் சொற்பொழிவு ஆற்றுகின்றனர். இதேபோல பஜ்ர், லுஹர், அஸர், மஹ்ரிப், இஷா ஆகிய 5 வேளை தொழுகையும் மாநாடு திடலில் நடைபெறுகிறது.

மாநாட்டில் திருமணம்:
வளர்ந்து வரும் நாகரிக உலகில் பிரமாண்டமான முறையில் திருமணங்கள் நடைபெற்று வரும் நிலையில், அதற்கு மாறாக நபிவழி சுன்னத் என்பதன் அடிப்படையில் எளிமையான முறையில் இன்று (ஞாயிற்றுக்கிழமை) மாலை மாநாட்டு திடலில் 200-க்கும் மேற்பட்டவர்களுக்கு எவ்வித ஆடம்பரமும் இன்றி எளிய முறையில் திருமணம் நடைபெற்றது.

மாநாட்டில் கலந்து கொள்வதற்கு வசதியாக தமிழகத்தின் பல்வேறு மாவட்டங்களில் இருந்து அரசு சார்பில் சிறப்பு பஸ்கள் இயக்கப்பட்டு வருகின்றன. வட மற்றும் தென் மாநிலங்களில் இருந்து வரும் ரெயில்கள் இனாம்குளத்தூர் ரெயில் நிலையத்தில் நின்று செல்வதால் ரெயில் மூலமும் அதிக அளவில் முஸ்லிம்கள் வந்த வண்ணம் உள்ளனர்.

பிரமாண்ட பந்தல்:
திருச்சி ~ திண்டுக்கல் தேசிய நெடுஞ்சாலையில் ஆலம்பட்டிபுதூரில் இருந்து இனாம்குளத்தூர் வரை லட்சக்கணக்கானோர்  அமரும் வகையில் பிரமாண்ட பந்தல் அமைக்கும் பணி சில நாட்களுக்கு முன்பு தொடங்கியது.

வாகனங்கள் நிறுத்துவதற்கும் பல ஏக்கர் பரப்பளவில் ஏற்பாடு செய்யப்பட்டது. குடிநீர் வசதி, குளியல் அறை, உணவு, கழிவறை, தூங்குவதற்கான இடம், ஆம்புலன்ஸ், தீயணைப்பு வாகனம் என அனைத்து ஏற்பாடுகளும் செய்யப்பட்டன. மாநாட்டு திடல் மற்றும் மக்கள் வந்து செல்லும் பகுதி முழுவதும் மின்விளக்குகள் அமைக்கப்பட்டன. இவை பார்ப்பதற்கு இரவை பகலாக்கும் வகையில் உள்ளது.

மாநாட்டில் கலந்து கொள்வதற்காக தமிழகம் மட்டுமின்றி ஆந்திரா, கேரளா, கர்நாடகா, உத்தரபிரதேசம், தெலுங்கானா, டெல்லி, பீகார் உள்பட பல்வேறு மாநிலங்களில் இருந்தும் இலங்கை, சவுதி, மலேசியா, சிங்கப்பூர் உள்ளிட்ட பல்வேறு வெளி நாடுகளில் இருந்தும் லட்சக்கணக்கான முஸ்லிம்கள் வந்து குவிந்தனர்.

சிறப்பு துஆ:
மாநாடு நாளை (ஜன.28) திங்கட்கிழமை பகல் லுஹர் தொழுகையுடன் நிறைவுபெற உள்ளது. முன்னதாக, உலக அமைதி, ஆரோக்கியம், பாதுகாப்பு, மறுமை வாழ்வு சிறக்க ஆகியவற்றை வலியுறுத்தி சிறப்பு பிரார்த்தனை நடைபெறும். இதில், 10 லட்சத்திற்கும் மேற்பட்டோர் பங்கேற்பார்கள் என எதிர்பார்க்கப்படுகிறது.

இதற்கு முன்பாக, தமிழ்நாட்டில் தஞ்சாவூர் மாவட்டம், அதிராம்பட்டினத்தில் கடந்த 1983 ஆம் ஆண்டும், மேல்விஷாரத்தில் 1997 ஆம் ஆண்டும் பிரமாண்ட இஜ்திமா மாநாடு நடைபெற்றது. இதில் லட்சக்கணக்கானோர் பங்கேற்றது குறிப்பிடத்தக்தக்கது.

போக்குவரத்தை சீர்படுத்தும் பணியில் இஸ்லாமிய தன்னார்வல இளைஞர்கள்:
மாநாட்டில் கலந்து கொள்வதற்காக ஆயிரக்கணக்கான வாகனங்கள் ஒரே நேரத்தில் வந்ததால் பொதுமக்களுக்கு பாதிப்பு ஏற்படாத வகையில் இஸ்லாமிய தன்னர்வல இளைஞர்கள் வாகனங்களை ஒழுங்குபடுத்தியதோடு அதற்காக ஒதுக்கப்பட்ட இடங்களில் நிறுத்துமாறு அறிவுறுத்தினர்.

14 மண்டலங்கள்:
மாநாட்டில்,  தமிழகத்தின் தென் ஆற்காடு (01), கோவை (02), வெளி மாநிலங்கள் (03), இராமநாதபுரம் (04), சேலம் (05), மதுரை (06), புதுக்கோட்டை (07), திருநெல்வேலி (08), பாரா ஜமாத் (09), திருச்சி (10), தஞ்சாவூர்(11), வட ஆற்காடு (12 ), செங்கல்பட்டு (13), சென்னை (14) என 14 மண்டலங்களுக்கான இடங்கள் ஒதுக்கப்பட்டன. இப்பகுதிகளில் அந்தந்தப் பகுதிகளைச் சேர்ந்தோர் அமர்ந்து இருந்தனர்.

3 வேளை உணவு: 
ஒவ்வொரு மண்டலங்களுக்கும் தனித்தனியாக உணவுக்கூடங்கள் அமைக்கப்பட்டு அதில், இரவு, காலை, பகல் ஆகிய 3 வேளைகளுக்கான உணவு பரிமாறப்பட்டது. இப்பணிகளில் தன்னார்வ களப்பணியாளர்கள் ஈடுபட்டனர்.

மருத்துவ முதலுதவி:
மாநாட்டில் மருத்துவ முதலுதவிக்காக மருத்துவர்கள் அடங்கிய குழுவினர், ஆம்புலன்ஸ் வசதி ஏற்பாடு செய்யப்பட்டு இருந்தது.

வழிகாட்டல்:
மாநாட்டு வருகையாளர்களுக்கு வழிகாட்ட பிரதான சாலைப் பகுதிகளில் 'வழிகாட்டி பதாகைகள்' ஆங்காங்கே வைக்கப்பட்டு இருந்தன.

ஸ்டால்கள்:
மாநாட்டில் இஸ்லாமிய மார்க்க நூல்கள், தொப்பி, அத்தர், பழங்கள், சிப்ஸ், குளிர் பானங்கள், தின்பண்டங்கள், பேக்கரி கேக் வகைகள், பட்டர் பிஸ்கட்ஸ், மலைத்தேன், பனங்கருப்பட்டி, மசாலா பவுடர், சூப், சுண்டல் ஆகியவை விற்பனைக்காக தனி ஸ்டால்கள் அமைக்கப்பட்டு இருந்தது.

 

 

 

 

 

 

பட்டுக்கோட்டை ~ திருவாரூர் அகல ரயில் பாதை பணியை துரிதப்படுத்த கோரிக்கை!

பட்டுக்கோட்டை, ஜன.27
பட்டுக்கோட்டை வட்ட இரயில் பயணிகள் நல சங்கத்தின் சனவரி மாத கூட்டம் இன்று 26.01.2019 சனிக்கிழமை பட்டுக்கோட்டை நிலா ஸ்கூலில் நடைபெற்றது. கூட்டத்திற்கு சங்க தலைவர் என். ஜெயராமன் தலைமை வகித்தார்.

கூட்டத்தில் கீழ்க்கண்ட தீர்மானங்கள் நிறைவேற்றப்பட்டன:
பட்டுக்கோட்டை - திருவாரூர் அகல ரயில் பாதை அமைக்கும் பணிகளை துரிதப்படுத்தி, இந்த ஆண்டு மார்ச் மாதத்தில் இரயில் சேவைகளை தொடங்க வேண்டும்.

காரைக்குடி, பட்டுக்கோட்டை, திருவாரூர் வழித்தடத்தில் கீழ்க்கண்ட இரயில்களை இயக்க வேண்டும்:
சென்னை - காரைக்குடி கம்பன் விரைவு இரயிலை மீண்டும் இத்தடத்தில் இயக்கவேண்டும். மயிலாடுதுறை - திருவாரூர் - காரைக்குடி, நாகூர் - திருவாரூர் - காரைக்குடி, திருவாரூர் - விருதுநகர் பயணிகள் இரயிலை தினந்தோறும் இத்தடத்தில் இயக்க வேண்டும்.

சென்னை - இராமேஸ்வரத்திற்கு பகல் நேரத்தில் விரைவு ரயிலை இயக்க வேண்டும். அதிகாலையில் இருமுனைகளில் இருந்தும் இந்த இரயில்களை இயக்க வேண்டும்.

இராமேஸ்வரம் - திருப்பதிக்கு வாரம் இருமுறை விரைவு இர‌யி‌ல், கன்யாகுமாரி /இராமேஸ்வரத்திலிருந்து வட மாநிலங்களில் இருந்து இப்பகுதியில் பணிபுரியும் தொழிலாளர்கள், வியாபாரிகள் பயன்பெறும் வகையில் சென்னை, மும்பை வழியாக அஜ்மீருக்கு பட்டேல் எக்ஸ்பிரஸ் என்ற பெயரில் எக்ஸ்பிரஸ் ரயில் விட வேண்டும்.

திருவனந்தபுரத்திலிருந்து வேளாங்கண்ணி, காரைக்காலுக்கு வாரம் இருமுறை விரைவு ரயில், கன்யாகுமாரி - ஹௌராவிற்கும், கன்னியாகுமரி - ஜம்முதாவிக்கு மகாத்மா காந்தி பெயரில் விரைவு இர‌யி‌ல், இராமேஸ்வரம் - புதுடெல்லிக்கு அப்துல் கலாம் பெயரில் விரைவு இர‌யி‌ல், சென்னை - மானாமதுரை சிலம்பு எக்ஸ்பிரஸ் இரயிலை வாரம் இருமுறை இத்தடத்தில் இயக்க வேண்டும்.
             
மேற்கண்ட கோரிக்கைகளை நிறைவேற்ற, இரயில்வே அமைச்சர், நாடாளுமன்ற உறுப்பினர்கள், அரசியல் பிரமுகர்கள், இரயில்வே உயர் அதிகாரிகள் ஆகியோரை நேரில் சந்திக்க முடிவு செய்யப்பட்டது. கூட்டத்தில் செயலாளர் வ. விவேகானந்தம், துணை தலைவர் கா. லெட்சுமிகாந்தன், துணை செயலாளர் ஜே.பிரின்ஸ் விஜயகுமார், பொருளாளர் பி. சுந்தரராஜூலு ஆகியோர் கலந்து கொண்டனர்.

 

 

 

 

திடக்கழிவு மேலாண்மை குப்பை சேகரிப்பு வாகனம்: எம்.எல்.ஏ தொடங்கி வைத்தார்!

பேராவூரணி ஜன,27-
பேராவூரணி பேரூராட்சி அலுவலகத்தில் குடியரசு தினத்தையொட்டி சனிக்கிழமை அன்று சட்டமன்ற உறுப்பினர் மா.கோவிந்தராசு, பேராவூரணி பேரூராட்சி தலைமை எழுத்தர் வி.சிவலிங்கம் முன்னிலையில்
தேசியக்கொடியை ஏற்றி வைத்து பள்ளி மாணவ, மாணவிகளுக்கு இனிப்பு வழங்கினார்.

தொடர்ந்து, பேராவூரணி தேர்வு நிலை பேரூராட்சிக்கு, சட்டமன்ற உறுப்பினர் மேம்பாட்டு நிதியில் இருந்து தூய்மை பாரதம்-திடக்கழிவு மேலாண்மை திட்டத்தின் கீழ் பேரூராட்சிக்குட்பட்ட 18 வார்டுகளிலும் குப்பைகளை சேகரிப்பதற்காக துப்புரவு தொழிலாளர்கள் பயன்படுத்த ஏதுவாக ரூ 2.5 இலட்சம் மதிப்பீட்டில் 7 மூன்று சக்கர சைக்கிள்கள் வாங்கப்பட்டுள்ளது. இதனை கொடியசைத்து தொடங்கி வைத்தார்.

பின்னர் சட்டமன்ற உறுப்பினர் மா.கோவிந்தராசு தனது தொகுதி மேம்பாட்டு நிதியில் ரூ 13 இலட்சம் மதிப்பீட்டில் ஆதனூரில் அமைக்கப்பட்டுள்ள, 60 ஆயிரம் லிட்டர் கொள்ளளவு கொண்ட, ஆழ்துளைக்கிணறுடன் இணைந்த மேல்நிலை நீர்த்தேக்க தொட்டியையும் பொதுமக்கள் பயன்பாட்டிற்கு திறந்து வைத்தார்.

நிகழ்ச்சியில் மாநில கயறு வாரியத்தலைவர் எஸ்.நீலகண்டன், பேரூராட்சி தலைமை எழுத்தர் வி.சிவலிங்கம், கூட்டுறவு சங்க தலைவர்கள் உ.துரைமாணிக்கம், ஆர்.பி.ராஜேந்திரன் மற்றும் பால்.ஏ.பக்கர், கோவி.இளங்கோ, கொன்றை கணேசன், எஸ்.வி.பி.ரவிசங்கர், பாசறை கணேசன் மற்றும் பலர் கலந்து கொண்டனர்.

 

 

 

மரண அறிவிப்பு ~ அகமது பாத்திமா (வயது 84)

அதிரை நியூஸ்: ஜன.27
அதிராம்பட்டினம், புதுமனைத்தெருவை சேர்ந்த மர்ஹும் முகமது அசனா லெப்பை அவர்களின் மகளும், மர்ஹூம் மு.க.வா முகமது சம்சுதீன் அவர்களின் மனைவியும், அகமது அன்சாரி, முகமது இக்பால், முகமது பாக்கர், அப்துல் ரெஜாக் ஆகியோரின் தாயாரும், மு.க.வா முஜம்மில் அவர்களின் மாமியாருமாகிய அகமது பாத்திமா (வயது 84) அவர்கள் இன்று அதிகாலை மகனார் முகமது இக்பால் புதுத்தெரு வடபுறம் இல்லத்தில் வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜிவூன்.

அன்னாரின் ஜனாஸா இன்று (27-01-2019) பகல் லுஹர் தொழுதவுடன் தக்வா பள்ளிவாசல் மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

அதிராம்பட்டினத்தில் முஸ்லீம் லீக் அலுவலகம் புனரமைப்புக்கு பின் மீண்டும் திறப்பு (படங்கள்)

அதிராம்பட்டினம், ஜன.26
அண்மையில் வீசிய கஜா புயலால் அதிராம்பட்டினம் கடைத்தெரு பகுதியில் உள்ள இந்திய யூனியன் முஸ்லீம் லீக் அலுவலகம் சேதமடைந்ததையடுத்து, அதன் புனரமைப்பு பணிகள் கடந்த சில வாரங்களாக தீவிரமாக நடந்து வந்தது. இந்நிலையில், இதன் பணிகள் நிறைவுற்றதையடுத்து, இதன் திறப்பு விழா நிகழ்ச்சி இன்று சனிக்கிழமை மாலை நடைபெற்றது.

விழாவிற்கு, அக்கட்சியின் அதிராம்பட்டினம் பேரூர் தலைவர் கே.கே ஹாஜா நஜ்முதீன் தலைமை வகித்தார். துணைத்தலைவர் மு.காதர் முகைதீன் முன்னிலை வகித்தார்.

சிறப்பு விருந்தினராக கலந்துகொண்ட அக்கட்சியின் தஞ்சை தெற்கு மாவட்ட பொருளாளர் மதுக்கூர் அப்துல் காதர் அலுவலகத்தை திறந்து வைத்து வாழ்த்துரை வழங்கினார். பின்னர், அலுவகலத்தில் முஸ்லீம் லீக் கட்சி கொடி ஏற்றி வைத்தார். சிறப்பு அழைப்பாளர் இந்திய யூனியன் முஸ்லீம் லீக் கட்சி மாநில துணைத்தலைவர் எஸ்.எஸ்.பி நசுருதீன் கலந்துகொண்டு வாழ்த்துரை வழங்கினார். விழாவில், சிறப்பு அழைப்பாளராக கலந்துகொண்ட ஹாஜி அதிரை அப்துல் காதர் உலக அமைதிக்காக சிறப்பு பிரார்த்தனை செய்தார்.

முடிவில், அக்கட்சியின் துணைச் செயலாளர் அபுபக்கர் நன்றி கூறினார். இவ்விழாவில், மாவட்ட ஊடகப்பிரிவு பொறுப்பாளர் ஏ.சாகுல் ஹமீது, மதுக்கூர் பேரூர் தலைவர் என்.எம் அப்துல் அஜீஸ், பொருளாளர் ஏ.சேக் அலாவுதீன், துணைச்செயலாளர் ஏ.ஆர் நூர்தீன் உள்ளிட்ட முஸ்லீம் லீக் கட்சி நிர்வாகிகள் பலர் கலந்துகொண்டனர்.