பேரூராட்சி சார்பில் பிளாஸ்டிக் ஒழிப்பு விழிப்புணர்வு (படங்கள்)

பேராவூரணி ஜன.02-
பேராவூரணியில் பேரூராட்சி சார்பில் வியாபாரிகள், பொதுமக்களிடம் பிளாஸ்டிக் ஒழிப்பு விழிப்புணர்வு ஏற்படுத்தப்பட்டது.

தமிழகத்தில் சுற்றுச்சூழலுக்கு பாதிப்பு ஏற்படுத்தும் 14 வகையான
பிளாஸ்டிக் பொருட்களுக்கு ஜனவரி 1 முதல் தமிழக அரசு உற்பத்தி மற்றும் விற்பனைக்கு தடை விதித்துள்ளது. மேலும் இதுகுறித்து பொதுமக்களுக்கு விழிப்புணர்வு ஏற்படுத்தும் நடவடிக்கைகளும் எடுக்கப்பட்டு வருகிறது.

தஞ்சாவூர் மாவட்டம், பேராவூரணி தேர்வு நிலை பேரூராட்சி சார்பில், செயல் அலுவலர் மு.பொன்னுசாமி அறிவுறுத்தலின்படி, புதன்கிழமை அன்று தலைமை எழுத்தர் வீ.சிவலிங்கம் தலைமையில், பேரூராட்சி பணியாளர்கள், துப்புரவு மேற்பார்வையாளர்கள், துப்புரவு பணியாளர்கள் ஆகியோர் பேராவூரணி கடைவீதியில் உணவகங்கள், துணிக்கடை, மளிகைக் கடை, இறைச்சி மற்றும் மீன் விற்பனைக் கடைகள், காய்கறிக்கடை மற்றும் தேநீர் கடைகளில் அரசால் தடை செய்யப்பட்ட பிளாஸ்டிக் பொருட்களை விற்பனை செய்வதோ, பயன்படுத்துவதோ கூடாது என தெரிவிக்கப்பட்டு, சுற்றுச்சூழலுக்கு உகந்த மாற்றுப் பொருட்களை பயன்படுத்தவும், பொருட்கள் வாங்க கடைவீதிக்கு வரும் பொதுமக்கள் துணிப்பைகளை கொண்டு வரச் சொல்லுமாறும் அறிவுறுத்தப்பட்டது.

உணவகங்கள் மற்றும் தேநீர் கடைகளில் பார்சல்களை கட்ட கண்டிப்பாக பிளாஸ்டிக் பொருட்களை பயன்படுத்தக் கூடாது. தடை செய்யப்பட்ட பிளாஸ்டிக் பொருட்களை விற்பனை செய்வதோ, பயன்படுத்துவதோ குற்றமாகும். அவ்வாறு செய்தால் பொருட்கள் பறிமுதல் செய்யப்படும். மேலும் அபராதம் விதிக்கப்படும் என எச்சரிக்கப்பட்டது.

மேலும் தடை செய்யப்பட்ட, பயன்படுத்தக் கூடாத 25 கிலோ எடையுள்ள பிளாஸ்டிக் பொருட்கள் வியாபாரிகளிடமிருந்து கேட்டு பெறப்பட்டு, குப்பைக் கிடங்கிற்கு கொண்டு செல்லப்பட்டது.

 

மரண அறிவிப்பு ~ பரிதா அம்மாள் (வயது 75)

அதிரை நியூஸ்: ஜன.02
அதிராம்பட்டினம், கடற்கரைத் தெருவைச் சேர்ந்த மர்ஹூம் மு.கா ஹாஜா முகைதீன் அவர்களின் மகளும், மர்ஹூம் அகமது ஹாஜா அவர்களின் மனைவியும், மர்ஹூம் எம்.கே ஜெய்னுலாபிதீன்,  மர்ஹும் எம்.கே நெய்னா முகமது, மர்ஹூம் எம்.கே பகுருதீன், ஹாஜி எம்.கே அய்னுதீன் ஆகியோரின் சகோதரியும், ஏ.எச் முகமது முகைதீன், ஏ.எச் இமாமூதீன் ஆகியோரின் தாயாரும், ஜபருல்லா அவர்களின் மாமியாரும், ஜெ. சபீக் அகமது, ஜெ. ராசிக் அகமது, ஜெ. ஆசிக் அகமது ஆகியோரின் பாட்டியாருமாகிய பரீதா அம்மாள் (வயது 75) அவர்கள் இன்று வஃபாத்தாகி விட்டார்கள்.

இன்னா லில்லாஹி வ இன்னா இலைஹி ராஜிவூன்.

அன்னாரின் ஜனாஸா நாளை (03-01-2019) காலை 9 மணியளவில் கடற்கரைத் தெரு ஜும்மா பள்ளிவாசல் மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துஆ செய்வோம்.

பொதக்குடியில் நடந்த மின்னொளி கால்பந்து போட்டியில் அதிரை WFC அணி சாம்பியன்!

அதிராம்பட்டினம், ஜன.02
பொதுக்குடி கூல் பிரண்ட்ஸ் சார்பில், 14-வது ஆண்டு மின்னொளி ஐவர் கால்பந்து தொடர் போட்டி பொதக்குடி விளையாட்டு மைதானத்தில் நேற்று முன்தினம் (டிச.31) மற்றும் நேற்று (ஜன.1) ஆகிய 2 தினங்கள் நடைபெற்றது.

இதில், அதிராம்பட்டினம், பொதக்குடி, கூத்தாநல்லூர், மன்னார்குடி, அத்திக்கடை, பூதமங்கலம் உள்ளிட்ட 50-க்கும் மேற்பட்ட அணிகள் கலந்துகொண்டு விளையாடின. இதில், பொதக்குடி, அதிராம்பட்டினம் WFC, கூத்தாநல்லூர் ஆகிய அணிகள் அரை இறுதி ஆட்டத்திற்கு முன்னேறியது.

இதையடுத்து, நேற்று (ஜன.1) இரவு நடந்த இறுதி போட்டியில் அதிராம்பட்டினம் WFC, பொதக்குடி கூல் பிரண்ட்ஸ் ஆகிய அணிகள் மோதின. விறு விறுப்பாக நடந்த ஆட்ட முடிவில் 1-0 என்ற கோல் கணக்கில் அதிரை WFC அணி வென்று, சாம்பியன் பட்டத்தை தட்டிச்சென்றது. முதல் பரிசாக ரூ.6100 வழங்கி அதிரை WFC அணிக்கு பாராட்டு தெரிவிக்கப்பட்டது. மேலும், முதல் கோல் அடித்து அணியின் வெற்றிக்கு உதவிய நட்சத்திர வீரர் அன்சர்கானுக்கு ரூ.500 சிறப்பு பரிசு வழங்கப்பட்டன.

 

நிவாரணம் மற்றும் தென்னை சேதம் குறித்த கணக்கெடுப்பு பணிகள் ஆட்சியர் ஆய்வு!

தஞ்சாவூர் மாவட்டம், சேதுபாவாசத்திரம், பேராவூரணி மற்றும் பட்டுக்கோட்டை ஒன்றியங்களில் கஜா புயல் நிவாரணப் பணிகள் மற்றும் தென்னை சேதம் குறித்த  கணக்கெடுப்பு பணிகளை மாவட்ட ஆட்சித்தலைவர் ஆ.அண்ணாதுரை இன்று (02.01.2019) நேரில் பார்வையிட்டு  ஆய்வு செய்தார்.

பட்டுக்கோட்டை ஒன்றியம், கரம்பயம் ஊராட்சியில் அமைந்துள்ள துணை மின் நிலையத்தில் பட்டுக்கோட்டை, சேதுபாவாசத்திரம், பேராவூரணி ஒன்றியங்களில் கஜா புயலால் சேதமடைந்த மின் மாற்றிகள் பழுது பார்க்கப்பட்டு, பொருத்தப்படும் பணி நடைபெற்று வருவதை பார்வையிட்ட மாவட்ட ஆட்சித் தலைவர் அவர்கள் துணை மின் நிலையத்தில் கஜா புயலால் சேதமடைந்த  மின்மாற்றிகளின் எண்ணிக்கை குறித்தும், தற்போது வரை சீர் செய்யப்பட்டுள்ள விவரங்கள் குறித்தும் மின்சாரத்துறை அலுவலர்களிடம் கேட்டறிந்து பணிகளை விரைந்து முடித்திடுமாறு உத்தரவிட்டார்.

பின்னர், சேதுபாவாசத்திரம் ஒன்றியம், கட்டயங்காடு ஊராட்சியில் கஜா புயலால் பாதிக்கப்பட்ட குடிசை வீடு குடியிருப்புகளுக்கு வழங்கப்பட்ட தமிழக அரசின் 27 நிவாரணப்பொருட்கள் அடங்கிய நிவாரண பெட்டகங்களை நேரில் பார்வையிட்டு அப்பகுதியில் உள்ள குடும்பத்தினர் அனைவரும் நிவாரணப் பொருட்கள் பெற்றுள்ளனரா எனவும், பாதிக்கப்பட்ட குடும்பங்களுக்கு நிவாரணப் உதவித் தொகை வங்கிக் கணக்கில் வரவு வைக்கப்பட்டுள்ளதா என்பது  குறித்தும் மாவட்ட ஆட்சித்தலைவர் அவர்கள் கேட்டறிந்தார்.  அப்போது சிலருக்கு 100 நாள் வேலைக்கான வங்கிக் கணக்கு இருந்தமையால், அவர்களிடம் வேறொரு வங்கிக் கணக்கை பெற்று நிவாரண தொகையினை வரவு வைத்திடுமாறு தொடர்புடைய அலுவலர்களை அறிவுறுத்தினார்.  அரசின் நிவாரண உதவித் தொகை பெற 100 நாள் வேலை திட்ட வங்கி கணக்குகளை கொடுக்க வேண்டாம் என பொது மக்களிடம் மாவட்ட ஆட்சித் தலைவர் தெரிவித்தார்.

தொடர்ந்து, செருபாலக்காடு ஊராட்சியில் கஜா புயலால் சேதமடைந்த தென்னை மரங்கள் குறித்த கணக்கெடுப்பு பணிகளை மாவட்ட ஆட்சித்தலைவர் அவர்கள் மேலாய்வு செய்து முழுவதுமாக சாய்ந்த மரங்கள் மற்றும் கொண்டை சாய்ந்த  மரங்களின் எண்ணிக்கை குறித்து வேளாண்மைத்துறை அலுவலர்களிடம் கேட்டறிந்தார். அப்பகுதியில் இருந்த தென்னை விவசாயிகளிடம் கஜா புயலுக்கு முன் தேங்காயின் விலை குறித்தும், தற்போது உள்ள விலை குறித்தும் மாவட்ட ஆட்சித் தலைவர்  கேட்டறிந்தார்.  செருபாலக்காடு ஊராட்சியில் திரு.மணியன் என்ற விவசாயின் தென்னந்தோப்பில் கஜா புயலால் சாய்ந்த சுமார் 20 வருட தென்னை மரம் மீண்டும் நடவு செய்யப்படுவதை நேரில் பார்வையிட்ட மாவட்ட ஆட்சித் தலைவர் விவசாயி மணியன் அவர்களை பாராட்டினார். 

அதனை தொடர்ந்து, நாட்டாணிக்கோட்டை ஊராட்சியில் கஜா புயலால் சேதமடைந்த தென்னை மரங்களின் கணக்கெடுப்புகள் குறித்து மேலாய்வு (Super check) மேற்கொண்ட  மாவட்ட ஆட்சித் தலைவர் அவர்கள் கணக்கெடுப்பு பதிவுகளை அடங்கல், புல எண் மற்றும் இதர வருவாய்த்துறை ஆவணங்களுடன் ஒப்பிட்டு சரி பார்த்தார்.   தற்போது வரை, பாதிக்கப்பட்டவர்களின் வங்கிக் கணக்கில் வரவு வைக்கப்பட்டுள்ள நிவாரணத் தொகை குறித்தும், வரவு வைக்கப்பட வேண்டியவர்களின் எண்ணிக்கை குறித்தும், வேளாண்மைத்துறை மற்றும் வருவாய்த்துறை அலுவலர்களிடம் கேட்டறிந்து நிவாரணப் பணியை விரைந்து முடித்திட அனைத்து அலுவலர்களுக்கும் மாவட்ட ஆட்சித்தலைவர் உத்தரவிட்டார்.

ஆய்வின் போது, வேளாண்மைத்துறை இணை இயக்குநர் நெடுஞ்செழியன், துணை இயக்குநர் ஜஸ்டின், வேளாண்மைத்துறை மற்றும் வருவாய்த்துறை அலுவலர்கள் உடன் இருந்தனர்.

அதிராம்பட்டினம் பகுதியில் பேக்கிங் இயந்திரம் உதவியுடன் ரயில் தண்டவாளம் பலப்படுத்தும் பணி!

அதிராம்பட்டினம், ஜன.02
அதிராம்பட்டினம் பகுதியில் பேக்கிங் இயந்திரம் உதவியுடன் ரயில் தண்டவாளத்தை பலப்படுத்தும் பணி நடந்து வருகிறது.

காரைக்குடி ~ திருவாரூர் இடையேயான, 147 கி.மீ., துார மீட்டர் கேஜ் பாதையில், காரைக்குடி முதல் பட்டுக்கோட்டை வரையிலான 73 கிலோ மீட்டர் பாதையில் பணிகள் நிறைவடைந்துள்ளது. அதன் எஞ்சிய பகுதியான, பட்டுக்கோட்டை ~ திருவாரூர் வரையிலான 76 கிலோ மீட்டர் அகல ரயில் பாதை பணிகள் தற்போது முழு வீச்சில் நடைபெற்று வருகிறது.

இந்த வழித்தடத்தில், பட்டுக்கோட்டையில் இருந்து அதிராம்பட்டினம், முத்துப்பேட்டை, தில்லைவிளாகம் வழியாக திருத்துறைப்பூண்டி வரையிலான சுமார் 50 கிலோ மீட்டர் தூரத்தில் புதிதாக அமைக்கப்பட்டுள்ள ரயில் பாதையில், பேக்கிங் இயந்திரம் மூலம் தண்டவாளத்தின் இருபுறங்களிலும் உள்ள ஜல்லிகளை நெருக்கி பலப்படுத்தும் பணி நடந்து வருகிறது. இப்பணிகள் தற்போது அதிராம்பட்டினம் பகுதியில் நடந்து வருகிறது.

'பட்டுக்கோட்டை ~ திருத்துறைப்பூண்டி வரையிலான அகல ரயில் பாதை பணிகளை வரும் ஜனவரி மாதத்துக்குள் முடிக்க திட்டமிடப்பட்டு உள்ளதாகவும், கஜா புயலின் காரணமாக ரயில் நிலையங்களில் ஏற்பட்டுள்ள சேதப்பகுதிகள் அனைத்தும் துரிதமாக சீர் செய்யப்பட்டு வருதாகவும், தில்லைவிளாகம், முத்துப்பேட்டை, அதிராம்பட்டினம் ஆகிய ரயில் நிலையங்களின் கட்டுமானப்பணிகள் விறுவிறுப்பாக நடந்து வருவதாகவும், இந்த வழித்தடத்தில் முதல் கட்ட சோதனை ஓட்டத்தை வரும் ஜனவரி மாத நிறைவில் நடத்த இருப்பதாகவும், பின்னர், சிறப்பு ரயிலைப் பயன்படுத்தி அதிவேக சோதனை ஓட்டத்தை நடத்த இருப்பதாகவும், அப்போது, தென் மண்டல ரயில்வே பாதுகாப்பு ஆணையர் ஆய்வு நடத்துவார்' என்று ரயில்வே வட்டாரங்கள் தெரிவித்தது.

 

அதிராம்பட்டினத்தில் ரோட்டரி சங்கம் சார்பில் சாலைப் பாதுகாப்பு விழிப்புணர்வு நிகழ்ச்சி!

அதிராம்பட்டினம், ஜன.01
அதிராம்பட்டினம் ரோட்டரி சங்கம், காவல் துறை சார்பில் சாலைப் பாதுகாப்பு குறித்த விழிப்புணர்வு நிகழ்ச்சி செவ்வாய்க்கிழமை நடைபெற்றது.

நிகழ்ச்சிக்கு, அதிராம்பட்டினம் ரோட்டரி சங்கத் தலைவர் எம்.கே சம்சுதீன் தலைமை வகித்தார். செயலாளர் இசட். அகமது மன்சூர், பொருளாளர் எஸ். சாகுல் ஹமீது ஆகியோர் முன்னிலை வகித்தனர்.

நிகழ்ச்சியை, அதிராம்பட்டினம் காவல் உதவி ஆய்வாளர் முருகானந்தம் தொடங்கி வைத்தார். நிகழ்ச்சியில், இருசக்கர வாகனங்களில் செல்வோர் தலைக்கவசம் கட்டாயம் அணிய வேண்டும். மது அருந்தி வாகனம் ஓட்டக் கூடாது, செல்லிடப்பேசியில் பேசிக் கொண்டு வாகனம் ஓட்ட வேண்டாம், நான்கு சக்கர வாகனங்களில் ஷீட் பெல்ட் கட்டாயம் அணிய வேண்டும் என்பன உள்ளிட்ட விழிப்புணர்வு வாசகங்கள் அடங்கிய துண்டுப் பிரசுரங்கள் விநியோகிக்கப்பட்டன. மேலும், பட்டுக்கோட்டை, முத்துப்பேட்டை, கிழக்கு கடற்கரைச்சாலை வழியாக வரும் வாகனங்களின் முகப்பு விளக்குகளில் கருப்பு ஸ்டிக்கர் ஒட்டப்பட்டது.

இந்நிகழ்ச்சியில், அதிராம்பட்டினம் காவல் உதவி ஆய்வாளர்கள் பொன்னியின் செல்வன், செந்தில்குமார், பிரதீப் மற்றும் அதிராம்பட்டினம் ரோட்டரி சங்க நிர்வாகிகள், உறுப்பினர்கள் கலந்துகொண்டனர்.

 

 

 

 

 

 

 

அதிரையில் துப்புரவுத் தொழிலாளியின் வங்கி கணக்கில் நூதன முறையில் பண மோசடி!

அதிராம்பட்டினம், ஜன-01,
தஞ்சை மாவட்டம், அதிராம்பட்டினம் கிழக்கு கடற்கரைச்சாலை மத்திய வங்கி கிளை வாடிக்கையாளரின் வங்கிக் கணக்கில் நூதன முறையில் ரூ. 30 ஆயிரம் மோசடி செய்திருப்பது பெரும் அதிர்சியை ஏற்படுத்தியுள்ளது.

தஞ்சாவூர் மாவட்டம், அதிராம்பட்டினம் வாழைக்கொல்லை பகுதியை சேர்ந்தவர் அசோகன் (வயது 85). இவரது மனைவி பாஞ்சாலி (வயது 83). இருவரும் அதிராம்பட்டினம் பேரூராட்சி ஒப்பந்த துப்புரவுப் பணியாளர்கள். அசோகன், அதிராம்பட்டினம் கிழக்கு கடற்கரைக்சாலையில் இயங்கும் அரசுடமையாக்கப்பட்ட மத்திய வங்கி கிளையில் சேமிப்பு கணக்கு வைத்துள்ளார். இவரது வங்கி கணக்கிலிருந்து நூதன முறையில் ரூ. 30 ஆயிரம் மோசடி செய்யப்பட்டுள்ளது பெரும் அதிர்ச்சியை ஏற்படுத்தியுள்ளது.

இதுகுறித்து அசோகன் கூறியது;
நான், அதிராம்பட்டினம் கிழக்கு கடற்கரைக்சாலையில் இயங்கும் அரசுடமையாக்கப்பட்ட மத்திய வங்கி கிளையில் சேமிப்பு கணக்கு வைத்துள்ளேன். கடந்த மாதம் டிச.6 ந் தேதி எனது வங்கிக் கணக்கில் இருந்து அடுத்தடுத்து ரூ.4999, ரூ.4999, ரூ.9999, ரூ.9999 என மொத்தம் ரூ.29,996 மோசடி செய்யப்பட்டுள்ளது. அதிர்ச்சியடைந்த நான் சம்பந்தப்பட்ட வங்கிக் கிளைக்கு நேரில் சென்று விவரம் கேட்டதற்கு, ஆமாம் பணம் எடுக்கப்பட்டுள்ளது என்றனர்.

எனது வங்கி கணக்கு பற்றிய விவரங்கள் நான் யாரிடமும் கூறாத நிலையில், பணம் மோசடி நடந்திருப்பது ஆச்சரியத்தை ஏற்படுத்தியுள்ளது. எனது மருத்துவ சிகிச்சைக்காக கடந்த சில ஆண்டுகளாக நானும், எனது மனைவியும் சிறுக சிறுக சேமித்து வைத்திருந்த பணம் பறிபோனது எங்களுக்கு மன உளைச்சலை ஏற்படுத்தியுள்ளது. இனி எனது மருத்துவ சிகிச்சையை மேற்கொள்ள பணத்திற்கு நான் என்ன செய்வேன் என்றார் வருத்தத்துடன்.

இதுகுறித்து 'சமூக ஆர்வலர்' எம்.ஓ செய்யது முகமது புஹாரி கூறும் அறிவுரை;
'இதுபோன்ற நூதன முறையில் பண மோசடி செய்யும் சம்பவம் பல்வேறு பகுதிகளில் தொடர்ந்து நடக்கிறது. அண்மைகாலமாக அதிராம்பட்டினம் மற்றும் சுற்றுப்புற பகுதியில் அதிகரித்துள்ளது பெரும் அதிர்ச்சியை ஏற்படுத்துகிறது. வங்கி அலுவலர் எனக் கூறி டெலிபோனில் பேசும் நபர்களிடம்  நம்மை பற்றிய விவரங்கள் அல்லது வங்கி தொடர்பான எவ்வித தகவலும் தெரிவிப்பது தவறு. மேலும்,  தங்களது ஏடிஎம் கார்டுகளை அறிமுகமில்லாத நபர்களிடம் வழங்கி ஏடிஎம் மெஷின்களில் பணம் எடுத்து தர அறிவுறுத்த வேண்டாம். இவை ஆபத்தை விளைவிக்கும். மோசடி அழைப்புகளை தவிர்க்க வேண்டும். தொடர்ந்து அழைப்பு வரும் பட்சத்தில் அருகில் உள்ள காவல்துறையின் உதவியை நாடலாம். அல்லது ஏடிஎம் அட்டையின் பின்புறமுள்ள அவசர அழைப்பு எண்ணை தொடர்புகொண்டு புகார் தெரிவிக்கலாம்.

வங்கி வாடிக்கையாளர்கள் நூதன மோசடிகளில் சிக்கி ஏமாறுவதை தவிர்க்கும் பொருட்டு வங்கிகள் சார்பில் அனைத்து பகுதிகளிலும் ஆட்டோ ஒலிப்பெருக்கி அறிவிப்பு மூலம் எச்சரிக்கை செய்யவேண்டும். மேலும் வாடிக்கையாளர்கள் பார்வையில் படும்படி சம்பந்தபட்ட வங்கிகளின் முன்புற பகுதிகளில் விழிப்புணர்வு அறிவிப்பு தட்டி வைக்க வேண்டும்.' என்றார்.

சவுதியில் 2018 ம் ஆண்டில் 5 லட்சத்திற்கும் மேற்பட்டோர் வேலை இழப்பு !

அதிரை நியூஸ்: ஜன. 01
சவுதியில் கடந்த 2017 ஆம் ஆண்டை விட 2018 ஆம் ஆண்டில் 5 லட்சத்திற்கும் மேற்பட்டோர் வேலையை விட்டுச் சென்றுள்ளனர்

கடந்த 2017 ஆம் ஆண்டின் கடைசி 3 மாதங்களில் சவுதி அரேபியாவில் 9,367,593 பேர் வேலையில் இருந்துள்ளனர் ஆனால் நடப்பு 2018 ஆம் ஆண்டு அதே காலகட்டமான கடைசி 3 மாதங்களில் 8,813,236 மட்டுமே வேலையில் இருப்பது தெரிய வந்துள்ளது. இதன் மூலம் சவுதியர்கள் மற்றும் வெளிநாட்டினர் என சுமார் 554,357 பேர் இதுவரை வேலையை விட்டுச் சென்றுள்ளதாக சமூக காப்புறுதிக்கான பொது அமைப்பு (General Organization for Social Insurance - GOSI) தெரிவித்துள்ளது.

ரியாத் மாகாணத்தில் 3.2 மில்லியன் பேரும், மக்காவில் 1.5 மில்லியன் பேரும், கிழக்கு மாகாணத்தில் 1.3 மில்லியன் பேரும் பணியில் உள்ளனர். இவற்றில் சமூக காப்புறுதிக்கான பொது அமைப்பின் சந்தாதாரர்களாக 1.9 மில்லியன் சவுதிக்களும், 7.4 மில்லியன் வெளிநாட்டு ஊழியர்களும் உள்ளனர். இவற்றில் சவுதி மற்றும் வெளிநாட்டு ஆண்களின் எண்ணிக்கை சுமார் 8.5 மில்லியன், பெண்களின் எண்ணிக்கை 810,216.

சமூக காப்புறுதிக்கான பொது அமைப்பு என்ற இந்த இன்ஷூரன்ஸ் நிறுவனத்தின் அறிக்கையின்படி, கடந்த 3 மாதங்களில் மட்டும் 7,776 பணியிட விபத்துக்கள் நேர்ந்துள்ளதாகவும், இந்த விபத்துக்களில் தனியார் நிறுவனங்களை சேர்ந்த 16 பேர் இறந்துள்ளதாகவும் தெரிவிக்கப்பட்டுள்ளது.

இவற்றில் மேலிருந்து தவறி விழுந்து காயமடைந்தவர்களின் எண்ணிக்கை 2,221 பேர். பிறர் சாலை விபத்துக்கள் மற்றும் அதீத சோர் போன்றவை பிற காரணங்களால் காயமடைந்துள்ளனர். பல்வேறு மருத்துவமனைகளிலும் இன்னும் சிகிச்சை பெற்றுவருவோரின் எண்ணிக்கை 3,372 பேர்.

சவுதி ஆண்கள் 427 பேர், சவுதி பெண்கள் 92 பேர், வெளிநாட்டு ஆண்கள் 7,186 பேர் மற்றும் வெளிநாட்டு பெண்கள் 72 பேர் பணியிட விபத்துக்களால் காயமடைந்துள்ளனர்.

Source: Saudi Gazette
தமிழில்: நம்ம ஊரான்