10 வது வார்டு உறுப்பினர் சகோதரி சபுரன் ஜெமிலா அவர்களின் கோரிக்கை நிறைவேற்றம் !

அதிரைப் பேரூராட்சியின் 10 வது வார்டுக்கு உட்பட்ட பகுதிகளில் ஒன்று பேருந்து நிலையம் ஈசிஆர் சாலையிலிருந்து செல்லும் தைக்கால் ரோடு ஆகும். இந்த சாலை ஆஷாத் நகர் [ தரகர் தெரு ], கடற்கரைத்தெரு, காந்தி நகர் உள்ளிட்ட பகுதிகளுக்கு செல்லும் பிரதான சாலையாக இருந்து வருகிறது. இந்த சாலையை ஒட்டி அமைந்துள்ள கழிவு நீர் வாய்க்காலில் ஆங்காங்கே காணப்படும் அடைப்புகளால் மழைகாலங்களில் நீர் தேங்கி காணப்பட்டு வந்தன. இதனால் இந்தப்பகுதியில் துர்நாற்றம் வீசி சுகாதார சீர்கேடும் ஏற்பட்டு வந்தது. 

இதையடுத்து அப்பகுதியின் 10 வார்டு உறுப்பினர் சகோதரி சபுரன் ஜெமிலா மற்றும் பட்டுக்கோட்டை வட்டார இளைஞர் காங்கிரஸ் துணைத்தலைவர் அதிரை மைதீன் ஆகியோர் அப்பகுதியில் வசிக்கும் பொதுமக்களோடு சேர்ந்துகொண்டு, பேரூராட்சி நிர்வாகம் வடிகால் வாய்க்காலில் சுத்தம் செய்யும் பணிகளில் ஏற்படும் கால தாமதத்தைக் கண்டித்து சாலை மறியல் போராட்டத்திற்கான அறிவிப்பை கடந்த சில மாதங்களுக்கு முன்பு துண்டு பிரசுரமாகவும், நாளிதழ் மற்றும் 'அதிரை நியூஸ்' தளத்திலும் செய்தியாக வெளியிட்டனர்.

இதைத்தொடர்ந்து அவசரமாக கவனத்தில் எடுத்துக்கொண்ட அதிரை பேரூராட்சி நிர்வாகத்தினர் சம்பந்தபட்டோரை நேரில் அழைத்து பேச்சுவார்த்தை நடத்தினர். இதில் பாதிப்புக்குள்ளான பகுதிகள் அனைத்தையும் கவனத்தில் எடுத்துக்கொண்டு வருகின்ற இரண்டு மாதத்திற்குள் சரிசெய்து கொடுப்பதாக எழுத்து மூலம் கையொப்பமிட்டு உறுதி செய்ததையடுத்து கடந்த [ 13-06-2013 ] அன்று நடைபெற இருந்த சாலை மறியல் போராட்டமும் கைவிடப்பட்டது.

இதைத்தொடர்ந்து அதிரை பேரூராட்சி நிர்வாகம் சார்பாக ரூபாய் 3.30 இலட்சம் நிதி உதவின் கீழ் புதிதாக வாடிகால் வாய்க்கால் அமைக்கும் பணியில் ஊழியர்களை மும்முரமாக ஈடுபடுத்தியுள்ளது. இதற்காக கடந்த சில நாட்களாக பணிகள் மும்முரமாக நடைபெற்று வருகின்றன. இதனால் அப்பகுதி மக்களின் நீண்ட நாள் கோரிக்கை நிறைவேறியதில் மகிழ்ச்சியை தெரியப்படுத்தியுள்ளனர். 

பணிகள் விரைவாக நிறைவேறியதில் சபுரன் ஜெமிலா அவர்கள் தனது நன்றியை அதிரை பேரூராட்சி தலைவர் அஸ்லம், செயல் அலுவலர், இதர வார்டு உறுப்பினர்கள், ஒத்துழைப்பு நல்கிய பொதுமக்கள் ஆகியோருக்கு அன்புடன் தெரிவித்துக்கொண்டார்.