ஆலடித்தெருவின் சுகாதார சீர்கேடும்... சாலையின் பாதுகாப்பின்மையும்...

அதிராம்பட்டினம் பேரூராட்சிக்குட்பட்ட 21-வது வார்டில் அமைந்துள்ள ஆலடித்தெரு, இங்கு வசிக்கக்கூடிய மக்கள் பல வருடங்களுக்கு முன்பே தங்களின் சொந்த செலவில் கழிவு நீர் குழாய்கள் அமைத்து பேரூர் மன்றத்திற்கோ பொது மக்களுக்கோ எந்தவித இடையூறும் இல்லாமல் சுத்தமாக பராமரித்துவருகிறார்கள்.

ஆனால் சில வருடங்களுக்கு முன்னால் அரசின் சார்பாக  கான்க்ரீட் சாலை அமைத்ததால் பேரூராட்சியின் செலவில் குழாய்கள் மட்டும் பதித்தார்கள், ஆனால் சரியான பாதுகாப்பான தொட்டி கட்டாததால் அவ்வப்போது தொட்டி உடைவதும் அதில் அடைப்பு ஏற்படுவதுமாக உள்ளது, பலமுறை இந்ததெருவாசிகளே அதை சீர் செய்துவிடுவார்கள், காரணம், சம்பதப்பட்ட பேரூராட்சி நிர்வாகத்தில் முறையிட்டால் அவர்களின் துரிதத்தன்மை கேள்விக்குறியே, மேலும் அங்கு அமைந்துள்ள முஹைதீன் ஜும்மா பள்ளியில் ஜும்மா நேரத்தில் அதிக தண்ணீர் புழக்கத்தினால் இந்த தெரு சாக்கடை ஆறு போல் காட்சியளிக்கும், தொழுகைக்கு வரக்கூடிய மக்கள் பெரும் அவதிக்குள்ளாகின்றனர். அசுத்தத்தை மிதித்துக்கொண்டு பள்ளியினுள் செல்லக்கூடிய சூழ்நிலையும் ஏற்படுகின்றது. மேலும் இந்த இடம் நான்கு முக்கங்களை கொண்ட வேகத்தடையில்லாத சாலை என்பதால் பல பக்கத்திலிருந்தும் வரக்கூடியவர்கள் பெரும் சிரமத்திற்கு அளாகின்றனர்.

வேகத்தடை வேண்டும்:
இதே இடம், நான்கு தெரு வழிச்சாலையாக உள்ளதால், இவ்வழியே பயனிக்கின்ற மோட்டார் வாகனிகள் மிக வேகமாக செல்கிறார்கள், எத்தனையோ முறை அசம்பாவிதங்கள் நடந்துள்ளது. பலமுறை சம்பதப்பட்ட வார்டு உறுப்பினரிடமும் பேரூராட்சித்தலைவரிடமும் எடுத்துச்சொல்லியும் நிறைவேற்றப்படவில்லை.

பேரூர் நிர்வாகம் செவிமடுக்குமா ?