பாதுகாப்பு பணியில் ஈடுபட்டுள்ள போலீசாரின் குறைகளை கண்டறிய அதிரை உள்ளிட்ட கடலோரப்பகுதியில் 'ஆபரேஷன் ஹம்லா' ஒத்திகை நிகழ்ச்சி !

கடலோர மாவட்டங்களில் பாதுகாப்பை உறுதிப்படுத்தவும், பாதுகாப்பு பணியில் ஈடுபட்டுள்ள போலீசாரின் குறைகளை கண்டறியவும் ஆண்டு தோறும் இருமுறை 'ஆபரேஷன் ஹம்லா' என்ற பெயரில் கடலோர மாவட்டங்களில் ஒத்திகை நிகழ்ச்சி நடத்தப்படுகிறது. இந்த ஆண்டிற்கான ஆபரேஷன் ஹம்லா ஒத்திகை நேற்று முன்தினம் இரவு தொடங்கியது.

தஞ்சை மாவட்டம்  அதிரை, சேதுபாவாசத்திரம் கடலோரப்பகுதியில் திருச்சி சரக டிஐஜி முகமது ஹனிபா உத்தரவின்பேரில் தஞ்சை எஸ்பி தர்மராஜ், பட்டுக்கோட்டை டிஎஸ்பி வெங்கடேசன், இன்ஸ்பெக்டர்கள் கணேசமூர்த்தி, தேவ தாஸ், ரவிச்சந்திரன், செங்கமலக்கண்ணன், கடலோர காவல் நிலைய இன்ஸ்பெக்டர் ஆனந்த் தலைமை யில் 125க்கும் மேற்பட்ட போலீசார் தீவிர பாதுகாப்பு பணியில் ஈடுபட்டனர். கடலில் 2 படகுகளில் சென்று மீனவர்களிடம் அடையாள அட்டை மற்றும் படகு பதிவு புத்தகங்கள் உள்ளதா, சந்தேகத்திற்கிடமான வகையில் படகுகள் செல்கிறதா என சோதனையிட்டனர். கிழக்கு கடற்கரைச் சாலைகளில் செல்லும் வாகனங்கள் அனைத்தும் சோதனைக்கு உட்படுத்தப்பட்டது.

Image Credit : Mohamed Ismail
News Source : Dinakaran