முன்னாள் மாணவர்களின் மெய்சிலிர்க்க வைத்த சந்திப்பு ! [ படங்கள் இணைப்பு ]

முத்துப்பேட்டை கொய்யா மஹாலில் இன்று முத்துப்பேட்டை கழக உயர்நிலைப்பள்ளியில் கடந்த 1974 ஆம் ஆண்டிற்கு முன்னதாக கல்வி பயின்ற மாணவர்களின் சந்திப்பு நிகழ்ச்சி நடைபெற்றது.

இந்நிகழ்ச்சியில் 100 க்கும் மேற்பட்ட முன்னாள் மாணவர்கள் கலந்துகொண்டனர். தாத்தாவாக புரோமஷன் பெற்றிருக்கும் இவர்கள் அனைவரும் தற்போது தொழில் அதிபராகவும், அரசு துறையில் பணி புரிபவராகவும், விவசாயி, அரசியல் பிரமுகர், சமூக ஆர்வலர் என பல்வேறு பொறுப்புகள் வகித்து, பல்வேறு பகுதிகளில் வசித்து வருகின்றனர், இவர்கள் அனைவரையும் ஒருங்கிணைக்கும் முயற்சி பல நாட்களாக நடைபெற்று வந்தது. இந்த முயற்சிக்கு பலனளிக்கும் விதத்தில் இன்று சந்திப்பு நடைபெற்றது.

இன்றைய சந்திப்பில் ஒருவருக்கொருவர் ஆரத்தழுவி தங்களின் வாழ்த்துகளை அன்புடன் பரிமாறிகொண்டனர். பள்ளி காலங்களில் நிகழ்ந்த மலரும் நினைவுகளை ஒவ்வொன்றாக பேசியது பார்ப்போர் அனைவரையும் மெய் சிலிர்க்க வைத்தது. இந்த சந்திப்பு ஆண்டு தோறும் தொடர்ந்து நடைபெற வேண்டும் என்ற ஆவலை கலந்து கொண்ட அனைவரும் தெரிவித்தனர். மக்கள் பொதுநல தொண்டு புரிவது குறித்தும், கல்வி பணி ஆற்றுவது குறித்தும் பேசப்பட்டது.

நிகழ்ச்சி ஏற்பாட்டினை முத்துப்பேட்டை தமிழ் இலக்கிய மன்ற செயலாளர் நா. இராசமோகன், முத்துப்பேட்டை சமூக ஆர்வலர்கள் சூனா ஈனா, கதர் சம்பந்தம் ஆகியோர் செய்து இருந்தனர். வெளியூர் மற்றும் வெளி நாடுகளில் வாழும் முன்னாள் மாணவர்கள் பலர் தொலைபேசியில் தொடர்பு கொண்டு சந்திப்பு நிகழ்ச்சிக்கு வாழ்த்து தெரிவித்ததாக ஏற்பாட்டாளர்கள் கூறினார்.

படங்களுடன் செய்தி தொகுப்பு : 
சூனா ஈனா - முத்துப்பேட்டை

அமைச்சர் வைத்திலிங்கம் நாளை அதிரை வருகை ! தற்கொலை செய்துகொண்ட மணி குடும்பத்துக்கு ரூ 3 லட்சம் நிதி உதவி !

அதிமுக பொதுச் செயலாளரும்,முன்னாள் முதல்வருமான  ஜெயலலிதா சிறையிலடைக்கப் பட்ட தகவல் அறிந்து அதிமுகவினர் பலர் தற்கொலை மூலமாக உயிரை மாய்த்துக் கொண்டனர். சிலர் அதிர்ச்சியில் மாரடைப்பில் காலமானார்கள்.

ஜெயலலிதா கைதால் பல்வேறு பகுதிகளில் உயிரிழந்த 193 பேரின் குடும்பத்திற்கு தலா ரூ. 3 லட்சம் நிதியுதவி வழங்கப்படும் என அதிமுக பொதுச் செயலாளரும், முன்னாள் முதல்வருமான ஜெயலலிதா அறிவிப்பு செய்தார்.

தற்கொலை செய்து கொண்ட உயிரிழந்தவர்களில் நமதூர் அதிரை பிள்ளையார் கோவில் தெருவை சேர்ந்த அ.தி.மு.க தொண்டர் M. மணி (வயது45),யும் ஒருவர். இவர் தஞ்சை ஆற்றின் பாலத்தின் தடுப்புசுவர் மீது ஏறி, ஜெயலலிதாவை விடுதலை செய்ய வேண்டும். ஜெயலலிதா வாழ்க என்று கோஷமிட்டபடி ஆற்றில் குதித்து தற்கொலை செய்துகொண்டார்.

இந்நிலையில் நாளை காலை அதிரைக்கு வருகை தரும் மாநில அமைச்சர் திரு. வைத்திலிங்கம் தற்கொலை செய்து கொண்ட மணி குடும்பத்தினரை நேரடியாக சந்தித்து ஆழந்த இரங்கலை தெரிவிக்க இருக்கிறார். அத்தோடு முன்னாள் முதல்வர் ஜெயலலிதா வழங்கும் ரூ. 3 லட்சம் நிதியுதவியை மணி குடும்பத்தினரிடம் ஒப்படைக்க இருக்கிறார்.

பட்டுக்கோட்டையில் எஸ்டிபிஐ கட்சியினர் நடத்திய கண்டன ஆர்ப்பாட்டம் !

தஞ்சை தெற்கு மாவட்ட எஸ்டிபிஐ கட்சியின் சார்பில், பட்டுக்கோட்டை தலைமை தபால் நிலையம் அருகே கண்டன ஆர்ப்பாட்டம் நடைபெற்றது.

ஆர்ப்பாட்டத்திற்கு எஸ்டிபிஐ கட்சியின் தஞ்சை தெற்கு மாவட்ட பொதுசெயலாளர் கே. சேக் ஜலாலுதீன் தலைமை வகித்தார். கண்டன உரையை எஸ்டிபிஐ கட்சியின் மாவட்ட செயற்குழு உறுப்பினர் ஜே. ஹாஜி சேக் நிகழ்த்தினார். எஸ்டிபிஐ கட்சியின் தஞ்சை தெற்கு மாவட்ட துணை தலைவர் அமானுல்லாஹ் நன்றியுரை ஆற்றினார்.

ஆர்பாட்டத்தில் இந்திய திருநாட்டின் வளங்களை தனியார், அந்நிய முதலாளிகளுக்கு தாரை வார்ப்பதை எதிர்த்தும், நாட்டை பிளவுபடுத்த துடிப்பதாக கூறி பாஜகவின் செயல்பாட்டை கண்டித்து கோஷங்கள் எழுப்பபட்டது. இதில் எஸ்டிபிஐ கட்சியினர் ஏராளமானோர் கலந்துகொண்டனர்.

[ 1 ] மழை வேண்டும் ! ஆனால் தண்ணீர் வேண்டாமா !?

இந்தக் கட்டுரையின் தலைப்பே வேடிக்கையானதாகத் தோன்றும். ஆனால் இன்று நாட்டில் நடக்கும் நிகழ்வுகளின் நிர்வாக அலங்கோலங்களின் அடையாளங்களையே   இந்தத் தலைப்பு வெளிச்சம் போடுகிறது. இதைப் பற்றி விவாதிக்கலாம்.

கடந்த சில வருடங்களாகவே தமிழகத்தில் மழை பொய்த்துவிட்டது. காவிரி நீரும் சரிவர வராததால் தமிழ்நாடு வறட்சியின் கோரப் பிடியில் சிக்கித் தவித்தது. நமது விவசாயிகளின் வாழ்வாதரங்களாகத் திகழும் தென்னை மரங்கள், மழை இல்லாத காரணத்தாலும்  நிலத்தடி நீர் உறிஞ்சப்பட்ட காரணத்தாலும் விதவைக் கோலத்தில் காட்சியளித்தன.

கரூர்,  பல்லடம் போன்ற பகுதிகளில் தென்னை,  வாழை முதலிய விவசாயங்கள் தோல்வியுற்றன. தென்னகத்தின் நெற்களஞ்சியமான காவிரி டெல்டா மாவட்டங்களில் விவசாய நிலங்கள் அச்சத்தின் காரணமாக தரிசுகளாகப் போடப்பட்டன. குடிநீருக்குக் கூட மக்கள் குடங்களைத் தூக்கிக் கொண்டு தூரந்தொலைகளுக்கு துரத்தப்படும் நிலைக்குத் தள்ளப்பட்டனர். தண்ணீர்ப் பஞ்சம் தாண்டவமாடியது. காலிக் குடங்களுடன் பொதுமக்கள், பல ஊர்களிலும்  சாலை மறியல்களில் ஈடுபட்டனர்.

அடிக்கிற தண்ணிக்கு
அங்கங்கே கடை இருக்கு
குடிக்கிற தண்ணிக்கோ
குடமெல்லாம் தவமிருக்கு  - என்று அடுக்குமொழிக் கோஷங்கள் முழங்கப்பட்டன.

பல ஊர்களில் மழைக்காக சர்வமதப் பிரார்த்தனைகள் நடத்தப்பட்டன. உயர்நீதிமன்றங்கள் தொடங்கி உச்சநீதிமன்றம் வரை நதிநீருக்காக மாநிலங்கள் வரிந்து கட்டிப் போராடின.

இந்த நிலையில் காவிரி நீர்ப் பிடிப்புப் பகுதிகளில் கனமழை பெய்ததன் காரணமாக உபரி நீர் வெளியேற்றப்பட்டு மேட்டூர் அணையும் நிறைந்து தண்ணீரும் திறந்துவிடப்பட்டது. மேட்டூர் அணையில் இருந்து திறந்து விடப்பட்ட காவிரி நீர், பல மாவட்டங்களைக் கடந்து, கடைமடையில் உள்ள நாகை மாவட்டம் வரை, பல லட்சம் ஏக்கர் பாசனத் திற்கு பயன்பட்டு வருவது பழக்கமான விஷயம்.  ஆனால் காவிரி நீர் கடந்து செல்லும் பகுதிகளில், ஆறுகள், வாய்க்கால்கள் உள்ளிட்ட நீர்நிலைகள் தூர்வாரப்படாமல் நீர்நிலைகளின் கொள்ளளவு அளவுக்கு மேட்டூரிலிருந்து வந்த தண்ணீரை நிரப்ப வழி இல்லாமல் வழிந்தோடி கண்முன்னே கடலில் கலந்து வீணானது. ‘நடந்தாய் வாழி காவேரி’ என்று சிலப்பதிகாரம் பாடியது. ஆனால் இன்றோ நிர்வாகச் சீர்கேடுகளால்  காவேரி நடக்க முடியாமல் முடக்கு நோய் வந்து முடங்கியது.

சோழமண்டலத்தின்  அனைத்து ஆறுகளும்  மற்றும் பல்வேறு ஏரிகளும் , முட்புதர்கள், மண்மேடுகள், மற்றும் கழிவுநீர் ஒடைகளால் பாதிக்கப்பட்டுள்ளன.  அவ்வளவு ஏன் கரிகாலன் கட்டிவைத்த கல்லணையில் கூட தூர்வார வக்கற்ற நிர்வாகம்தான் நம்முடையது. தஞ்சாவூர் மாவட்டத்தில் வடலாறு, வெண்ணாறு, வெட்டாறு உள் ளிட்ட ஆறுகள், மிகவும் மோசமான நிலையில் நாணல்கள் மண்டிப்போய்  உள்ளன. இதேபோல் திருவாரூரில் ஒடம்போக்கி  ஆறு, பாமிணி ஆறு, முள்ளிஆறு உள்ளிட்ட பல்வேறு ஆறுகள் தூர்வாரப்படாமல் உள்ளன. இங்குள்ள ஏரிகள் மற்றும் குளங்களிலும் காட்டாமணக்கு, வெங்காய தாமரை, கொண்டை குளைச்சான் உள்ளிட்டவை அதிகளவில் வளர்ந்துள்ளன என்பதை அந்தப் பகுதிகளை பஸ்களில் கடந்து செல்வோர் கவலையுடன் காணலாம்.  தூர்வாரப்படாத நீர் நிலைகளால், கடைமடை வரை காவிரித் தண்ணீர் வந்து சேர்வது கேள்விக் குறியாகி இருந்தது.

ஆற்றிலே தண்ணீர்!  ஆனால் அந்தத் தண்ணீர் வந்து சேர வழி இல்லாததால் பட்டுக் கோட்டை, பேராவூரணி, மதுக்கூர் முதலிய கடைமடை பகுதிகளிலும் நாகை மாவட்டத்தில் வேதாரண்யம் முதலிய பகுதிகளிலும் புதுவை மாநிலம் காரைக்கால் பகுதிகளிலும் பல போராட்டங்கள் நடத்தப்பட்டன. மாவட்ட ஆட்சித்தலைவர் நடத்திய கூட்டங்களில் விவசாயிகள் இந்தக் குறையை எடுத்துச்சொல்லி அரசை இயங்கச் சொன்னார்கள். ஆனால் அரசு காதில் போட்டுக் கொள்ளவில்லை. கோபம்கொண்ட விரக்தியடைந்த விவசாயிகள் நாற்காளிகளைத் தூக்கி வீசிவிட்டு வந்த காட்சிகளையும் கண்டோம்.

காவிரியில் நீர் வருமா வராதா என்ற நிலையில் சரளமாகவே   காவிரியில் தண்ணீர் வந்தும் அந்தத் தண்ணீர்  எல்லாப் பகுதிகளுக்கும் சரிவரப் பகிர்வு செய்யப்படாமல், “ முள்ளு முனையிலே மூணு குளம் வெட்டினேன்- ரெண்டு குளம் பாழ்! ஒன்னிலே தண்ணியே இல்லே” என்கிற  நாட்டுப்பாடல் போல நாட்டு நிலையும் ஆனது.  மேட்டூரிலிருந்து தண்ணீர் வருவது அதிர்ஷ்டவசமாக நிற்கவில்லை.  விவசாயியின்     கண்ணிலிருந்து தண்ணீர் வருவதும் நிற்கவில்லை. விவசாயிகள் தண்ணீர் வந்த மகிழ்ச்சியைக் கொண்டாட முடியாமல்  விவசாயம் செய்யவே அச்சப்பட்டனர். இந்த நிலை ஏன்? சிந்திக்க வேண்டும்.

மேட்டூரிலிருந்து  நீர்  வந்த  நிலையில் கூட  மழை வேண்டி இறைவனை வேண்டிய மக்களின் குரல் இறைவனின் காதுகளில் கேட்டது. இந்த வருடத்தில் பெய்ய வேண்டிய வடகிழக்குப் பருவமழை  ஒரே நேரத்தில் போதும் போதுமென்கிற அளவுக்குத் தமிழகம் முழுதும் பெய்தது. ஆனாலும் பயன் என்ன ?

பெய்த மழையில் பெரும்பகுதி,  நீரை சேகரித்து வைக்க வழியில்லாமல் காட்டாறுகளாக வழிந்தோடின. வீராணம் , மதுராந்தகம், செங்கல்பட்டு போன்ற  பெரிய ஏரிகள் யாவும் தங்களது        கொள்ளளவுக்குரிய நீரை சேமிக்க முடியாமல் தங்கள் வீட்டுக்கு வலதுகால் எடுத்து வைத்து   புதுமணப்பெண்ணாக வந்த புதுவெள்ளத்தை ,  வரவேற்று பால்பழம் கொடுக்க இயலாத நிலையில் தண்ணீரின் பிறந்த வீடான கடலுக்கே வழி அனுப்பிவைத்தது பொதுப்பணித்துறை நிர்வாகம்.

கடைமடைப் பகுதிக்கு காவிரி நீர் வந்து குளங்கள் நிரம்புவது என்று அதிகபட்சமாக எதிர்பார்ப்பது கூட தவறாக இருக்கலாம். ஆனால் அதிகமாகப் பெய்த மழையின் காரணமாக குளத்தின் கரைகளைத் தொட்டுக் கொண்டு ஓடும் தண்ணீரைக் கூட குள்ங்களுக்குள் திசை திருப்பிவிட்டு அந்தக் குளங்களை நிரப்பாமல் இருக்கும் நிர்வாகத்தை என்ன சொல்வது?

அதிரையின் செடியன் குளத்தை ஒட்டி ஓடும் மழைத்தண்ணீர் வாய்க்காலை செடியன் குளத்துக்குள் திருப்பாததும்  முத்துப்பேட்டையில் பட்டறைக் குளத்தைத் தொட்டுக் கொண்டு ஓடும் கோரையாற்றுத் தண்ணீரை கண்டுகொள்ளாமல் கடலுக்குள் அனுப்பும் காட்சிகளையும்  காணும் போது நமது  இரத்தம் சூடாவதைத் தடுக்க இயலவில்லை.  இவைகள் உதாரணங்களே.

வரம் வேண்டிப் பெற்ற மழையால் வந்த நீர் தங்கும் இடமெங்கும் ஆக்கிரமிப்புகள் , அரசு கட்டிடங்கள், பேருந்து நிலையங்கள், காட்டாமணக்குச் செடிகள், காட்டுக் கருவைப் புதர்கள். தங்க இடமின்றி தண்ணீர் வெள்ளமாக தாவிப் பாய்ந்தது கடல் நோக்கி.

இதுவும் போக பல நகரங்கள் தண்ணீரில் மிதந்தன. குறிப்பாக தமிழகத்தின் தலை நகர் சென்னை தண்ணீரில் மிதக்கிறது என்று தலைப்புச் செய்திகளை வெளியிட்டன பத்திரிகைகள்.  குடியிருப்புப் பகுதிகளில் உள்ளே இருப்போர் வெளியே செல்ல முடியாமலும் வெளியூர்களில் இருந்து வந்தோர் வீட்டுக்குள் செல்ல முடியாமலும் வெள்ளம் சூழ்ந்து நின்றகாட்சிகள் தொலைக் காட்சிகளில்.

தாழ்வான  நிலப் பகுதிகளில் வீடு கட்டி குடியேறியவர்கள் தங்களின் வீட்டுக்குள் மீன் பிடித்தால் கூட பரவாயில்லை. ஆனால் பாம்புகளையும்  பிடித்தார்களே இந்த நிலைக்கு என்ன காரணம்? எந்த மழைக்காக தவம் இருந்தோமோ அந்த மழையால் வந்த வெள்ளத்தை வெறுக்கும் நிலைக்குத் தள்ளப் பட்டோம். காரணங்கள் என்ன?  

சென்னையைப் பொறுத்தவரை , பெரிய ஏரிகளை எல்லாம் தூர்த்து வீட்டுமனைகளாக்கி விற்று நகரமயமாக்கிவிட்டோம். “ நீரின்றி அமையாது உலகு “ என்று குறள் எழுதிய வள்ளுவருக்கான வள்ளுவர் கோட்டம் கட்டப்பட்டிருப்பது ஒரு காலத்தில் லேக் ஏரியா ( Lake Area ) என்று அழைக்கப்பட்ட நுங்கம்பாக்கம் ஏரியைத் தூர்த்துத்தான் என்பது வேதனையான உண்மை. அதே போல மாம்பலம் பகுதியிலும் ஒரு ஏரி இருந்தது இன்று அதன் அடையாளம் கூட யில்லை என்று பழம்பெரும் சென்னைவாசிகள் சொல்கிறார்கள். சென்னை நகரைச் சுற்றியுள்ள  ஆவடி , பொன்னேரி போன்ற பகுதிகளின் ஏரிகளும் ரியல் எஸ்டேட்காரர்களால் கபளீகரம் செய்யப்பட்டுவிட்டன.  இப்படிப் பெய்யும் மழையைத் தாங்கி தங்களிடம் சேர்த்துவைக்கும் நீர்நிலைகளை அழித்துவிட்டு குடியிருப்புப் பகுதிகளைக் கூட்டிக் கொண்டே போனால் தலைநகரம் தண்ணீரில் தத்தளிக்காமல் என்ன செய்யும்.   பொழியும் மழைநீர் எங்கே செல்லும்?

‘தமிழ்நாட்டில் இருந்த 39,200 கண்மாய்களில் 10 சதவிகிதம் அழிந்து போய்விட்டன’ என்று அதிரவைக்கிறது சர்வதேச நீர் மேலாண்மை மையத்தின் தகவல். இதன்படி, தமிழகத்தின் முக்கிய நகரங்களிலுள்ள கண்மாய்கள், ஏரிகளின் இன்றைய  நிலைமை என்னவென்று பார்த்தோமானால் மதுரையில் உள்ள மாட்டுத்தாவணி பேருந்து  நிலையம் , புதிய நீதிமன்றக் கட்டிடம் , சட்டக்கல்லூரி ஆகியவை கட்டப்பட்டிருப்பது ஒரு காலத்தில் தல்லாகுளம் என்ற  ஏரியாக இருந்த இடங்களில்தான்.  விழுப்புரம் மாவட்ட ஆட்சித்தலைவர் அலுவலகம் கட்டப்பட்டிருப்பதும் ஒரு ஏரியில்தான். அவ்வளவு தூரம் போகவேண்டாம். இன்று பட்டுக் கோட்டையில் இருக்கும் பேருந்து நிலையம் கூட ஒருகாலத்தில் குளமாக இருந்ததுதான்.

எப்போதும் இல்லாத அளவிற்கு இந்த வருடம் வடகிழக்குப் பருவமழை அதிகமாகப் பெய்துள்ளது. இதுவரை தமிழகம் முழுவதும் 31 செ.மீ. மழை பெய்திருக்கிறது. இந்தப் பருவத்தில் வழக்கமாகப் பெய்யும் மழையைவிட இது  அதிகம் என்று வானிலை மைய அதிகாரிகள் கூறுகிறார்கள். ஆனாலும் தஞ்சாவூர், திருவாரூர் , நாகை ஆகிய  டெல்டா மாவட்ட விவசாயிகள் கைகளைப் பிசைந்துகொண்டு இருக்கிறார்கள்.

எப்படி சம்பா நெல்லைக் காப்பாற்றி மகசூல் எடுக்கப் போகிறோம் எனத் தெரியவில்லை என்று விவசாயிகள் புலம்புகிறார்கள். மழைக்காக தவமிருந்தவர்களின் வயிற்றில் பாலை வார்க்கவேண்டிய தண்ணீர் அவர்களை பரிதவிக்கவைத்து இருக்கிறது.

“இந்த முறை நல்ல மழை பெய்கிறது, ஆனால், இந்த மழையை எங்களால் இப்போது மட்டும்தான் பயன்படுத்த முடியும். மழைநீரை சேமித்துவைத்துப் பயன்படுத்த எந்த வசதியுமில்லை. இந்த மழைநீர் வடிவதற்கான சரியான வடிகால்கள் இல்லாத காரணத்தினால் மழைநீர் தேங்கி நின்று பயிர்கள் அழுகும் அபாயமும் உள்ளது" என்கிறார் திருவாரூர் மாவட்ட விவசாயிகள் சங்கத் தலைவர் திரு.  சுந்தரமூர்த்தி.      ( தினமணி )

இவ்வளவு மழைபெய்தும்  இன்னும் எதிர்காலத்தின் தேவைப்படும் தண்ணீர் தேவைகளுக்கு மறுமழையையோ,  புயல் சின்னத்தையோ, வளி மண்டலமேலடுக்கு சுழற்சியையோ அல்லது கர்நாடகத்தையோதான் எதிர்பார்த்து இருக்க வேண்டிய நிலைமை இருக்கிறது. காரணம் சேமிக்க வேண்டிய நீரை கடலுக்கு அனுப்பிவிட்டு அடுத்தவரிடம் கையேந்தும்  நிலையில் நாமும் நமது நிர்வாகமும் இருப்பதுதான். நம்மால் மழை நீரை போதுமான அளவு சேமிக்க முடியாதது ஏன் ?

“ தமிழ்நாட்டில் இருந்த 39, 200 கண்மாய்களில் 10% கண்மாய்கள் ஆக்கிரமிப்பு காரணமாகவும், நகரமயமாதல் காரணமாகவும் அழிந்து போய்விட்டன. மொத்தக் கொள்ளளவில் 22% நீரை சேர்த்துவைக்க திறனுள்ள தமிழக கண்மாய்கள் தற்போது 30% தூர்ந்து போயுள்ளதால், 15% மட்டுமே தேக்க முடிகிறது" என்ற அதிர்ச்சித் தகவலை வெளியிட்டுள்ளார், சர்வதேச நீர் மேலாண்மை மையத்தின் (International Water Management Institute ) இயக்குனரான பழனிச்சாமி.

அவர் மேலும் கூறும்போது , “ தமிழகத்தில் நீர்ப்பிடிப்புப் பகுதிகளில் மட்டுமே அணைகள் கட்டப்பட்டுள்ளன. தமிழகத்தில் நீர்ப்பிடிப்புப் பகுதிகள் குறைவு என்பதால் புதிய அணைகள் கட்ட வாய்ப்பில்லை. ஆனால், அதை ஈடுசெய்ய தமிழகத்தின் அனைத்துப் பகுதிகளிலும் கண்மாய்கள் பரவலாக உள்ளன. சிறு மற்றும் குறு விவசாயிகளில் பெரும்பாலானோர் கண்மாய் பாசனத்தைத்தான் நம்பியுள்ளனர். கிராமங்கள் மட்டுமில்லாமல், நகரங்களிலும் இதே நிலைதான் உள்ளது. நகரங்களில் அதிக அளவு மழை பெய்யும் போது, வடிகாலாகவும் உபரி நீரின் சேமிப்பு வங்கியாகவும்  கண்மாய்கள் பயன்பட்டதால் நகரங்கள் வெள்ளப் பாதிப்பிலிருந்து தப்பின.

ஆனால், தற்போது நகரங்களில் இருந்த கண்மாய்கள் குடியிருப்புப் பகுதிகளாகவும், பஸ் ஸ்டாண்டுகளாகவும் மாறியதன் விளைவு, ஒருநாளின் சின்ன மழையைக் கூடத் தாங்க இயலாமல்  நகர்ப்பகுதிகள் வெள்ளக்காடாகின்றன. “

எப்போது எந்த ஒரு சிறிய ஊரும் வளர்ச்சி பெற்று அங்கு புதிய அரசாங்கக் கட்டிடங்களோ நகர்ப் புறக் குடியமைப்பு அடுக்குமாடிக் கட்டிடங்களோ கட்டப்பட வேண்டுமானால் அனைவரும் கை வைப்பது ஏரிகள் மற்றும் குளங்கள் உள்ள இடங்களைத்தான். ஏதாவது போராட்டம் என்றால் தொடர்பு இருக்கிறதோ  இல்லையோ கல்லால் அடி  படுவது பரிதாபத்துக்குரிய பஸ்கள்தானே ! அதைப் போலத்தான் இதுவும்.

ஒரே நேரத்தில் வடிகாலாகவும் உபரிநீரின் சேமிப்பு நிலையங்களாகவும் செயல்பட்ட நீர்நிலைகள் தூர் வாரப்பட்டு பராமரிக்கப்படாததன் விளைவுகள் காரணமாக தமிழ்நாட்டில் வெள்ளம்! ஓடைகள் உடைப்பு! ஹெலிகாப்டரில் காப்பாற்றப்பட்ட மக்கள் ! என்றெல்லாம் செய்திகள் வருகின்றன.
செய்யக் கூடாதத்தை செய்வதாலும் செய்யவேண்டியதை செய்யாமல் விடுவதாலும் வருவது சீரழிவுதான் என்பதை எப்போதுதான் நிர்வாகம் உணரும்?

ஊர்ப்பெயர்களில் ஆறுமுகநேரி, பொன்னேரி, நாங்குனேரி, பாகனேரி  , விளாத்திகுளம், குருங்குளம், கருங்குளம், அருங்குளம் ,  பரம்பிக்குளம் , காரைவாய்க்கால், ஆழிவாய்க்கால் , திருவையாறு, அடையாறு, கொள்ளிடம்   காரைமடை,  சேத்துமடை என்கிற நீர்நிலைகளின் பெயர்களை  ஊர்களுக்கு சூட்டி மகிழ்ந்த நாடு தமிழ்நாடு. இதிலிருந்தே நமது முன்னோர்கள் அதிகம் படிக்காதவர்களாக இருந்தாலும் அறிவியல்ரீதியான பாசனமுறைக்கு எவ்வளவு முக்கியத்துவம் கொடுத்தனர் என்பதை உணரமுடியும்.

இது பற்றி இன்னும் நிறைய விவாதிக்க வேண்டும். இறைவன் நாடினால் அடுத்த வாரம்...

வனராஜா கோழி குஞ்சுகள் விற்பனை !

பட்டுக்கோட்டை மற்றும் அதிரை சுற்று வட்டார பகுதிகளில் வனராஜா ரக கோழி குஞ்சுகள் விற்பனையாகி வருகிறது. சுமார் 6 கிலோ எடையை கொண்டுள்ள பெரிய சேவலை காட்டி அதன் அருகிலேயே கூண்டில் அடைக்கப்பட்ட கோழிக்குஞ்சுகளை சைக்கிளில் வைத்து ஆந்திரா சித்தூரை சேர்ந்த கண்ணன் விற்பனை செய்து கொண்டிருந்தார்.

இது குறித்து கண்ணன் நம்மிடம் கூறியதாவது... 
இந்த கோழி உருவத்தில் சற்று பெரிதாக இருக்கும். இது வனராஜா என்ற பிராய்லர் கோழி வகையை சேர்ந்தது. ஆந்திராவை பூர்விகமாக கொண்டது. கோழி, சேவல் குஞ்சுகள் செட்டாக விற்பனை செய்யப்படுகிறது. 10 குஞ்சுகள் ரூ 100 க்கு விற்கிறோம். நான்கரை மாதத்தில் முழு வளர்ச்சி அடைந்து விடும். கோழிகளின் வளர்ப்பை பொறுத்து தினந்தோறும் தலா ஒரு முட்டையை பெற முடியும். அதன்பின் இறைச்சிக்காகத்தான் பயன்படுத்த முடியும். என்றார்.

துபாயில் வினோதம் !

அளவுக்கு அதிகமாக உடல் குண்டாகி பல்வேறு அவதிக்குள்ளாவதை தவிர்க்கும் வகையில் உடல் பருமனை குறைப்பவர்களை ஊக்குவிக்கும் வகையில் துபாயில் அரசு ஒரு கிலோ குறைத்தால் 1 கிராம் தங்கம் என்ற திட்டத்தை மக்களுக்கு சென்ற வருடம் அறிமுகப்படுத்தியது. இவ்வருடம் 13 வயதுகுட்பட்ட குழந்தைக‌ளும், குடும்பத்தினர்களும் பங்கேற்கும் வகையில் அவர்களுக்கு இத்திட்டத்தில் கூடுதல் முக்கியத்துவம் அளிக்கப்பட்டது.

நிர்ணயிக்கப்பட்ட காலத்திற்குள் குறைந்த பட்சம் 2 கிலோ உடல் எடையை குறைக்க வேண்டும் என்ற அடிப்படையில் பரிசு  வழங்கப்படுகிறது. குழந்தைகள் ஒரு கிலோ குறைத்தால் 2 கிராம் தங்கம் என அறிவிக்கப்பட்டிருந்தது.

இதில் இவ்வருடம் 15,000 ஆயிரத்திற்கு மேற்பட்டோர் பங்கேற்றிருந்தனர். இதில் 7350 பேர் தங்கத்தை பெற தகுதி பெற்று உள்ளனர். இதில் 200க்கு மேற்பட்ட குழந்தைகளும் பரிசு பெற உள்ளனர். சுமார் 40 கிலோ வரை தங்கம் பரிசாக வழங்கப்பட உள்ளது. சென்ற வருடத்தை காட்டிலும் இவ்வருடம் கூடுதலானோர் பரிசு பெற உள்ளனர். இதற்கான பரிசளிப்பு விழா வரும் டிசம்பர் மாதம் நடைபெற இருக்கிறது.

Source : Khaleejtimes

சிஎம்பி லேன் - மிலாரிக்காடு - நடுவிக்காடு கிராம இணைப்பு சாலை ஆய்வு !

அதிரை பேரூராட்சியின் 21 வது வார்டு பகுதிக்கு உட்பட்ட சிஎம்பி லேன் பகுதியில் முறையான கழிவு நீர் வாய்க்கால் அமைக்கப்படாததால்.அந்த பகுதியின் வீடுகளில் புழங்கும் கழிவு நீர் அங்கு காணப்படும் சாலைகளிலும், அருகே உள்ள பொதுப்பணித்துறைக்கு சொந்தமான சிஎம்பி வாய்க்காலிலும் கலந்து விடுகிறது. இதனால் கழிவு நீர் தேங்கி துர் நாற்றம் வீசி சுகாதார சீர்கேடு ஏற்பட்டு வந்தது.

கடந்த சில நாட்களாக அதிரையில் பெய்த தொடர் மழையால் அப்பகுதியில் காணப்படும் பட்டுக்கோட்டை ஊராட்சி ஒன்றிய நிர்வாகத்தின் கீழ் வரும் அதிரை - மிலாரிக்காடு நடுவிக்காடு கிராம இணைப்பு சாலை பல ஆண்டுகளாக பராமரிக்கப்படாமல் பழுதடைந்து குண்டும் குழியுமாக காட்சி அளித்து வந்தது.

இந்த பகுதியில் வாழும் சமூக ஆர்வலர்கள் - பொதுமக்கள் பலர் பல்வேறு காலகட்டங்களில் சம்பந்தபட்டோரிடம் தொடர் கோரிக்கை வைத்து வந்தனர். கடந்த திங்கட்கிழமை கூட இந்த பகுதியில் வாழும் ஆர்வலர்கள் தஞ்சை சென்று மாவட்ட ஆட்சியரிடம் பழுதடைந்த சாலையை சீரமைத்து தர கோரிக்கை விடுத்தனர்.

இந்நிலையில் மாவட்ட ஆட்சியரின் ஆணைக்கிணங்க, பட்டுக்கோட்டை ஊராட்சி ஒன்றிய பெருந்தலைவர் சரோஜா மலைஅய்யன் அறிவுறுத்தலின் பேரில் சாலை ஆய்வாளர் ராஜேஷ் இன்று காலை மிலாரிக்காடு பகுதியிலிருந்து விகேஎம் ஸ்டோர் வழியாக வண்டிப்பேட்டை சிஎம்பி லேன் பகுதி வரை உள்ள சாலையின் நீளத்தை அளவீடு செய்தார். இதில் 1213 மீட்டர், சாலையின் நீளம் இருப்பது கண்டறியப்பட்டுள்ளது. இதைஅடுத்து அரசு பொறியாளரால் திட்ட மதிப்பீடு போடப்பட்டு, சாலை போடும் பணி விரைவில் துவங்கும் என எதிர்பார்க்கப்படுகிறது.

இன்றைய பணியை அதிமுகவின் தஞ்சை தெற்கு மாவட்ட சிறுபான்மை நல பிரிவு செயலாளர் அப்துல் அஜீஸ் உள்ளிட்ட அப்பகுதியினர் ஆர்வத்துடன் பார்வையிட்டு அலுவலருக்கு வேண்டிய உதவிகளை செய்தனர்.

களத்திலிருந்து நூவன்னா

குண்டும் குழியுமாக காட்சியளித்த பேருந்து நிலைய பகுதியில் 'டஸ்ட் கிராவல்' நிரப்பல் ! நெடுஞ்சாலை துறையினர் நடவடிக்கை !!

அதிரையில் கடந்த சில நாட்களாக பெய்த தொடர் மழையால் பேருந்து நிலைய பகுதியில் மழைநீர் தேங்கி நின்றது. இந்த பகுதியின் வர்த்தகர்களும், மாணவ மாணவிகளும், வாகன ஓட்டிகளும் மிகவும் சிரமத்துக்குள்ளாகி வந்தனர்.

இதுகுறித்து பல்வேறு தரப்பிலும் நெடுஞ்சாலை துறையினரிடம் தொடர் கோரிக்கை வைக்கப்பட்டது. சீரமைத்து தருவதாக வாக்குறுதி அளித்து இருந்தனர். அதன்படி கடந்த [ 27-10-2014 ] அன்று பழுதடைந்த பேருந்து நிலைய பகுதியை நேரடியாக பார்வையிட்டனர். அன்றைய தினம் அதிரையில் மீண்டும் கனமழை பெய்ததால் வெள்ளம் சூழ்ந்துள்ள பேருந்து நிலைய பகுதியை சீரமைப்பு செய்வதில் சிக்கல் நீடித்தது.

இந்நிலையில் இன்று காலை நெடுஞ்சாலை துறையினர் குண்டு குழியுமாக காட்சியளித்து வந்த பேருந்து நிலைய பகுதி சாலையின் பள்ளமான பகுதியில் 'டஸ்ட் கிராவல்', ஜல்லி கொட்டி நிரப்பினர். இது ஒருபுறமிருக்க அதிரை பேரூராட்சியின் சார்பில் பேருந்து நிலையத்தை சுற்றி மழைநீர் தேங்காமல் இருக்கவும், சீராகச்செல்வதற்கும் வடிகால் வசதி செய்யப்பட்டது. இதற்காக ஜேசிபி இயந்திரத்தை கொண்டு தூர் வாரப்பட்டது. பணிகளை அதிரை பேரூராட்சி தலைவர், துணை தலைவர், செயல் அலுவலர், வார்டு உறுப்பினர்கள் உள்ளிட்டோர் மேற்பார்வையிட்டனர்.

மரண அறிவிப்பு !

மேலத்தெருவை சேர்ந்த மர்ஹூம் ப.அ அப்துல் ஹமீது அவர்களின் மகளும், மர்ஹூம் ஹாஜா முகைதீன் அவர்களின் மனைவியும், குண்டுமணி வீட்டை சேர்ந்த முஹம்மது மரியம் அவர்கள் இன்று வஃபாத்தாகி விட்டார்கள்.

இன்னாலில்லாஹி வ இன்னா இலைஹி ராஜிவூன்

அன்னாரின் ஜனாஸா இன்று மாலை அஸ்ர் தொழுதவுடன் பெரிய ஜும்மா பள்ளி மையவாடியில் நல்லடக்கம் செய்யப்படும்.

அன்னாரின் மறுமை வாழ்வு சிறக்க துவா செய்வோம்.

மதுக்கூரில் SDPI கட்சியின் நிர்வாகிகள் ஆலோசனை கூட்டம் !

மதுக்கூரில் நேற்று SDPI கட்சியின் நிர்வாகிகளின் ஆலோசனை கூட்டம் நடைபெற்றது. கூட்டத்திற்கு நகர செயலாளர் அசார்தீன் தலைமை வகித்தார். இதில் சிறப்பு அழைப்பாளராக மாவட்ட தலைவர் Z. முஹமத் இலியஸ் கலந்து கொண்டார்.

கூட்டத்தில் கிழக்கு மேற்கு கிளை நிர்வாகிகள் கலந்து கொண்டு கட்சியின் செயல்பாடுகள் குறித்தும், பட்டுக்கோட்டையில் எதிர்வரும் [ 31-10-2014 ] அன்று நடைபெறும் ஆர்ப்பாட்டம் குறித்து விவாதிக்கபட்டது. இறுதியாக கிழக்கு கிளை பொறுப்பாளர் எஸ்ஜே ஷாகுல் ஹமீத் நன்றி கூறினார். இதில் நகர எஸ்டிபிஐ கட்சியினர் கலந்துகொண்டனர்.

பட்டுக்கோட்டையில் அரசு அலுவலக மாடியில் இருந்து கீழே விழுந்த வாலிபர் சாவு ! தள்ளிவிட்டதில் இறந்தாரா ? போலீஸ் விசாரணை !

பட்டுக்கோட்டையில் மாடியிலிருந்து கீழே விழுந்ததில் காயமடைந்த இளைஞர் உயிரிழந்தார்.

திருவாரூர் மாவட்டம், பெருகவாழ்ந்தான் காவல் சரகம், தெற்கு நாணலூர் கிராமத்தைச் சேர்ந்த விவசாயக் கூலித் தொழிலாளி சிவசுப்பிரமணியனின் மகன் மாதவன் (20). இவர் பட்டுக்கோட்டை அறந்தாங்கி சாலையிலுள்ள ஸ்டிக்கர் கடையில் வேலை பார்த்து வந்தார். இந்நிலையில், செவ்வாய்க்கிழமை மாலை அதே பகுதியிலுள்ள பத்திரப் பதிவாளர் அலுவலக மாடி வராந்தாவிலிருந்து மாதவன் கீழே விழுந்ததில் பலத்த காயமடைந்தார். உடனடியாக 108 ஆம்புலன்ஸ் மூலம் தஞ்சை மருத்துவக் கல்லூரி மருத்துவமனைக்கு கொண்டு செல்லும் வழியில் மாதவன் இறந்தார்.

இதுகுறித்து மாதவனின் தந்தை சிவசுப்பிரமணியன் அளித்த புகாரின் பேரில்
பட்டுக்கோட்டை நகர காவல் நிலைய போலீஸார் வழக்குப் பதிந்து விசாரணை மேற்கொண்டனர். இதில் செவ்வாய்க்கிழமை முற்பகல் நண்பர்கள் அழைப்பதாகக் கூறி மாதவன் கடையிலிருந்து வெளியே சென்றதும், மாலையில் அவர் பத்திரப் பதிவு அலுவலக மாடி வராந்தாவிலிருந்து கீழே விழுந்ததும் தெரிய வந்தது.

இதையடுத்து, காதல் பிரச்னை காரணமாக மாதவன் மாடியிலிருந்து கீழே குதித்து தற்கொலை செய்து கொண்டாரா அல்லது வேறு பிரச்னைக்காக யாரேனும் அவரை மாடியிலிருந்து கீழே தள்ளிக் கொலை செய்தனரா என்ற கோணத்திலும் விசாரணை நடந்து வருவதாக போலீஸ் வட்டாரங்கள் தெரிவித்தன.

நன்றி : தினமணி

அதிரை ஜாவியா மஜ்லீஸ் நிறைவு நாளில் பங்கேற்க அழைப்பு !

அதிரை ஜாவியாவில் கடந்த ஒரு மாதமாக நடைப்பெற்று வருகின்ற புகாரி ஷரீப் மஜ்லிஸ் வருகின்ற 06-11-2014 வியாழக்கிழமை அன்று நிறைவு பெறுகிறது. அன்றைய தினம் சுபுஹு தொழுதவுடன் திக்ரு மஜ்லிஸு ஆரம்பமாகி மார்க்க அறிஞர்களின் சொற்பொழிவுடன் காலை 8.00 மணிக்கு துஆவுடன் நிறைவுபெறும். அதுசமயம் உள்ளூர் மற்றும் வெளியூர் வாழ் அன்பர்கள் மஜ்லீஸில் கலந்து கொண்டு சிறப்பிக்க ஜாவியா நிர்வாகம் சார்பாக அழைப்பு விடப்பட்டுள்ளது. நிறைவு நாளன்று கலந்துகொள்ளும் அனைவருக்கும் வழக்கம் போல் உணவு பொட்டலங்கள் தயாரித்து வழங்க முடிவு செய்யப்பட்டுள்ளது. இதற்காக 7 ஆயிரம் உணவு பொட்டலங்கள் ஏற்பாடு செய்யப்பட்டு வருகிறது.

அதிரையில் கொசு மருந்து அடிக்கும் பணி துவக்கம் !

அதிரை பேரூராட்சிக்குட்பட்ட பகுதியில் டெங்கு கொசுக்களை ஒழிக்க கொசு மருந்து அடிக்கும் பணி இன்று முதல் துவங்கியது.

கடந்த சில நாட்களாக தமிழகத்தில் பரவலாக தொடர் மழை பெய்தது. மழை காலங்களில் வழக்கமாக ஏற்படும் தொற்று நோயை தடுக்கும் வகையில் பேரூராட்சி, நகராட்சி பகுதிகளில் கொசு மருந்து அடிக்கும் பணிகளை அரசு தீவிரப்படுத்தியுள்ளது.

இந்நிலையில், டெங்கு கொசுக்களை ஒழிக்கும் பொருட்டு அதிரை பேரூராட்சிக்கு உட்பட்ட பேருந்து நிலைய பகுதிகளில் கொசு மருந்து அடிக்கும் பணி துவங்கியது. இதற்காக ஊழியர்கள் கொசு ஒழிக்கும் இயந்திரத்தின் உதவியோடு கொசு மருந்தை அடித்து வருகின்றனர். இதனால் இந்த பகுதி சிறிது நேரம் ஒரே புகை மண்டலமாக காட்சியளித்தது.

செய்தி மற்றும் படங்கள் :
அதிரை மைதீன்