செக்கடி குளம் - ஆலடிக்குளம் - காட்டுக்குளம் ஆகியவற்றிற்கு ஆற்று நீர் வருகை ! [ படங்கள் இணைப்பு ]

கடந்த சில நாட்களாக அதிரையில் பெய்த தொடர் மழையால் அதிரை மற்றும் சுற்றுவட்டார பகுதிகளின் நீர் மட்டம் சற்று உயர்ந்திருக்க கூடும். கடந்த மாதம் சிஎம்பி வாய்க்காலின் இணைப்பில் உள்ள அனைத்து குளங்களுக்கும் தண்ணீர் திறந்து விட ஏற்பாடு செய்யப்பட்டு இருந்தது. முதலாவதாக அதிரை பகுதிகளுக்கு குடிநீர் வழங்குவதில் முக்கிய நீர் ஆதாரப் பகுதியாக இருந்து வரும் காட்டுகுளத்திற்கு சிஎம்பி வாய்க்கால் வழியாக ஆற்று நீர் வந்தடைந்தது. இதை தொடர்ந்து மரைக்கா குளத்திற்கு தண்ணீர் வந்தது.

இந்நிலையில் இரண்டாவது முறையாக ஆற்று நீர் சிஎம்பி வாய்க்காலின் இணைப்பில் உள்ள குளங்களுக்கு வந்து கொண்டிருக்கிறது. முதலாவதாக காட்டுகுளத்திற்கும். இதனை தொடர்ந்து செக்கடி குளம், ஆலடிகுளங்களுக்கு தண்ணீர் வந்து கொண்டிருக்கிறது. சிஎம்பி வாய்க்காலில் ஏற்பட்டுள்ள அடைப்புகளை அதிரை வாழ் சமூக ஆர்வலர்கள், அப்பகுதி இளைஞர்கள் முன்னின்று சரிசெய்து வருகின்றனர். மீண்டும் ஆற்று நீர் அதிரை பகுதியில் வந்து கொண்டிருப்பது உள்ளூர் மக்களுக்கு மகிழ்ச்சியை ஏற்படுத்தியுள்ளது. இன்னும் தின தினங்களுக்கு தண்ணீர் வரத்து இருக்கும் என கூறப்படுகிறது.