குப்பை அள்ளுவதில், மாற்று வழியை யோசிக்குமா பேரூராட்சி நிர்வாகம் ?

அதிரை பேரூராட்சிக்கு உட்பட்ட 21 வார்டு பகுதிகளின் சாலையோரத்தில் ஆங்காங்கே குமிந்து காணப்படும் குப்பை கூளங்கள் தினமும் பேரூராட்சி ஊழியர்களை கொண்டு அப்புறப்படுத்தப்பட்டு வருகின்றன. இந்நிலையில் குப்பை கூளங்களை அள்ளுவதில் ஏதேனும் தடங்கல் ஏற்பட்டால் அந்தந்த பகுதிகளில் கொட்டப்படும் குப்பைகள் தேங்கி ஆங்காங்கே சிதறியும் காணப்படுகிறது. இதனால் துர்நாற்றமும், கொசு உற்பத்தியும், சுகாதார சீர்கேடும் ஏற்பட்டு விடுகிறது.

யாரைக் குற்றஞ்சொல்வது !?
குப்பைகளை சாலையோரத்தில் ஏனோதானென்று கொட்டிவிட்டு செல்லும் பொதுமக்களின் குற்றம் என்கிறது ஒரு தரப்பு, இல்லையில்லை அதிரையின் பெரும்பாலன இடங்களில் குப்பை தொட்டிகளை வைக்காததும், சாலையோரத்தில் சிதறிக்கிடக்கும் குப்பைகளை கிளறிச்செல்லும் தெருக்களில் கேட்பாரற்று மேயும் மாடுகளை கட்டுபடுத்தாததும், குடியிருப்புகள் பெருகி வரும் நமதூரில் அதற்கு ஏற்றார் போல் போதுமான குப்பை அள்ளிச்செல்லும் வாகனங்கள் பேரூராட்சியிடம் இல்லாததும், ஊழியர்கள் பற்றாக்குறையும் குறிப்பிட்டு கூறுகின்றது மற்றொரு தரப்பு.

இதில் மற்றொரு விசயமும் கவனிக்கத்தக்கது, சரியான நேரத்தில் குப்பைகளை அப்புறப்படுத்தாமல் காலதாமதம் செய்யும் துப்புரவு பணியாளர்களும், அவ்வபோது இவர்கள் எடுத்துக்கொள்ளும் தொடர் விடுமுறைகளையும் குறை கூறுகின்றனர் பேரூராட்சியோடு நெருக்கமானவர்கள்.

குப்பைகள் அள்ளுவதில் தாமதமானால், பொதுமக்கள் முதலில் குறை கூறுவது, தங்களால் ஓட்டு போட்டு பேரூராட்சி அலுவலகத்தில் சேவையாற்ற அனுப்பி வைத்த மக்கள் பிரதிநிதிகளாகிய பேரூராட்சியின் வார்டு உறுப்பினர்கள் மற்றும் தலைவர், துணை தலைவர் ஆகியோரைத்தான் என்பதையும் மறுக்க இயலாது.

மாற்று வழி :
இதில் ஒருவரை ஒருவர் குற்றம் சொல்லிக்கொண்டு நமது ஊரை நாமே நாசப்படுத்திகொண்டு இருக்காமல் இதற்கு மாற்று வழியை யோசிப்பதே சிறந்தது என்பது பலரின் கருத்தாக இருக்கிறது. அதிரை பேரூராட்சி சார்பில் தற்போது பின்பற்றி வரும் குப்பை அள்ளிச்செல்லும் நடைமுறைகளை, சில மாதங்களுக்கு ஒத்தி வைத்துவிட்டு இதற்கு மாற்றாக சோதனை அடிப்படையில் மாற்று வழியை பின்பற்றினால் அந்தந்த பகுதிகளின் பிராதான சாலையோரத்தில் தேங்கி காணப்படும் குப்பை கூளங்கள் தேங்காமல் இருக்கும் என்பது சமூக ஆர்வலர்களின் கருத்தாக இருக்கிறது. இதற்காக அவர்கள் நம்மிடம் கூறும் ஆலோசனைகள் சற்று யோசிக்க வைக்கின்றன. இது குறித்து கூறும் போது 'கடந்த முறை பேரூர் மன்ற தலைவராக பொறுப்பு வகித்த காலஞ்சென்ற M.M.S. அப்துல் வஹாப் அவர்கள் சில காலங்கள் நடைமுறைபடுத்திய பேரூராட்சி துப்புரவு பணியாளர்கள் 'வீடு தேடி வந்து குப்பை அள்ளிச்செல்லும்' திட்டத்தை நடைமுறை படுத்தினார். இதில் சில நடைமுறை சிக்கல்கள் இருந்த போதிலும் அதிரையின் பிரதான பகுதிகளில் தேங்கிய குப்பை கூளங்கள் கணிசமாக குறைந்து இருந்தது. இதனால் நகரும் சுத்தமாக காணப்பட்டது என்கின்றனர். மேலும் கூறும் போது, இந்த திட்டம் வெற்றிகரமாக் செயல்படுத்திட பொதுமக்கள் - துப்புரவு பணியாளர்கள் ஆகியோரின் ஒத்துழைப்பு அவசியம் என்பதையும் வலியுறுத்தி கூறுகின்றனர்.

நமது பேரூராட்சியை நாமே தரத்திலும், சேவையிலும் உயர்த்தி செல்ல சிறந்த ஆலோசனைகளை வாசகர்கள் இங்கே வழங்கலாம். இங்கே பதியும் அனைத்து கருத்துரைகளும் சம்பந்தப்பட்டவர்களின் பார்வைக்கு எடுத்துச்செல்லப்படும்.