அதிரையில் வெள்ள பாதிப்பு - ஒரு நேரடி ரிப்போர்ட் ! [ படங்கள் இணைப்பு ]

தமிழகத்தில் வடகிழக்கு பருவமழை கடந்த 17-ந் தேதி தொடங்கியதை அடுத்து அதிரையில் கடும் வெயிலையும், சூட்டையும், வறட்சியையும் சந்தித்து வந்த பொதுமக்களுக்கு பெரும் வரப்பிரசாதமாக இந்த தொடர் மழை அமைந்து இருந்தது. கடந்த சில நாட்களாக அதிரை மற்றும் சுற்றுவட்டார பகுதிகளில் பெய்த தொடர் மழையால் அதிரை நகரின் தாழ்வான பகுதிகளில் வெள்ளம் சூழ்ந்து காணப்படுகிறது.

வங்க கடலில் உருவான குறைந்த காற்றழுத்த தாழ்வு நிலை தொடர்ந்து நீடிப்பதால் இன்னும் சில தினங்களுக்கு மழை தொடர்ந்து நீடிக்கும் என எதிர்ப்பார்க்கப்படுகிறது. இந்த தொடர் மழையால் அதிரை காதிர் முகைதீன் ஆண்கள் மேல் நிலைப்பள்ளியின் விளையாட்டு மைதானம், பிலால் நகர், புதுத்தெரு, முத்தம்மாள் தெரு, பேருந்து நிலையம் உள்ளிட்ட பகுதிகள் வெள்ளத்தால் கடுமையான பாதிப்படைந்துள்ளது. பிலால் நகர், முத்தம்மாள் தெரு, புதுதெரு ஆகிய பகுதிகளில் காணப்படும் குடிசைகளில் வெள்ளம் சூழ்ந்துள்ளது.

நகரில் பொதுமக்களின் நடமாட்டம் வெகுவாக குறைந்த காணப்பட்டது. பிரதான பகுதிகளில் நடைபெறும் அன்றாட வியாபாரங்கள் பெருமளவு முடங்கி காணப்பட்டன. தஞ்சை மாவட்டத்தில் உள்ள பள்ளிகளுக்கு நேற்றும், இன்றும் விடுமுறை அளிக்கப்பட்டுள்ளது. அதிரையில் நேற்றுகாலை 8 மணியுடன் முடிவடைந்த 24 மணிநேரத்தில் பதிவான மழைஅளவு 20.3 மில்லி மீட்டர் பதிவாகி இருக்கிறது. வானம் மேகம் மூட்டத்துடன் காணப்படுகிறது. குளிர்ந்த காற்றும் வீசிவருகின்றன. அவ்வப்போது சாரல் மழையும் பெய்து வருகிறது.

அதிரையின் முக்கிய பகுதிகளில் தண்ணீர் ஆங்காங்கே தேங்கி காணப்படுகின்றன. பிராதன சாலைகளிலிலும் தண்ணீர் தேங்கி காணப்படுகிறது. நல்ல மழை பெய்தும் பெரும்பாலான குளங்களில் போதுமான தண்ணீர் வரத்து வந்து சேரவில்லை. வழக்கமாக தண்ணீர் வரும் வடிகால் வாய்க்கால்களில் ஏற்பட்டுள்ள ஆக்கிரமிப்புகள் அடைப்புகளே காரணம் என கூறப்படுகிறது. அதிரை பேரூராட்சி ஊழியர்கள் கொட்டும் மழையில் நகரில் ஆங்காங்கே தேங்கி கிடக்கும் குப்பை கூளங்களை துரிதமாக அப்புறப்படுத்தி வருகின்றனர்.

நகரில் ஆங்காங்கே தேங்கி காணப்படும் மழை நீரை அந்தந்த பகுதியில் வசிக்கும் இளைஞர்கள் தன்னார்வத்துடன் அப்புறப்படுத்த முன்வர வேண்டும் என பொதுமக்கள் கோரிக்கை விடுத்துள்ளனர். மழைகால தொற்று நோய் பரவுவதை தடுக்கும் நோக்கில் குடிநீரை சூடு படுத்தி பருக வேண்டும் எனவும், மின்விபத்தை தடுக்கும் நோக்கில் ஈரமாக காணப்படும் மின் சாதனப் பொருட்களை கவனத்துடன் கையாள வேண்டும் என சமூக ஆர்வலர்கள் வேண்டுகோள் விடுத்துள்ளனர்.

படங்கள் : சாஜித்