அதிரையில் அறுந்து கிடந்த மின்கம்பியை மிதித்தவர் மின்சாரம் தாக்கி பரிதாப பலி !

கட்டிமேட்டை சேர்ந்தவர் இஸ்மாயில் ராவுத்தர். இவரது மகன் ரபீக் அஹமது ( வயது 50 ) அதிரை வண்டிப்பேட்டையில் உள்ள டீ கடையில் டீ மாஸ்ட்டராக பணியாற்றி வருகிறார். இன்று அதிகாலை பட்டுக்கோட்டை சாலை வாட்டர் டேங் அருகே நடந்து சென்ற போது சாலையில் அறுந்து கிடந்த மின்கம்பியை மிதித்தவர் சம்பவ இடத்திலேயே பரிதாபமாக உயிரிழந்தார்.

இதுகுறித்து ரபீக் அஹமது மைத்துனர் சாகுல் ஹமீது அதிரை காவல்நிலையத்தில் அளித்த புகாரின் பேரில் இன்ஸ்பெக்டர் சந்திர சேகரன், சிறப்பு சப் இன்ஸ்பெக்டர்கள் ஜீவானந்தம், அய்யாதுரை மற்றும் காவல்துறையினர் சம்பவ இடத்திற்கு விரைந்து சென்று விசாரணை மேற்கொண்டனர். இறந்த உடலை கைப்பற்றி பிரத பரிசோதனைக்காக தமுமுக ஆம்புலன்ஸ் வாகனத்தில் அதிரை அரசு மருத்துவமனைக்கு அனுப்பி வைத்தனர். அதிகாலை நிகழ்ந்த இந்த சம்பவத்தால் இந்த பகுதியில் பெரும் பரபரப்பு ஏற்பட்டது. இறந்த ரபீக் அகமதுக்கு ஆயிசா கனி என்ற மனைவியும், ரஜீப் ரஹ்மான் என்ற மகனும் உள்ளனர்.

மின்வாரிய ஊழியர்களின் அலட்சியம்தான் இந்த சம்பவத்துக்கு காரணம் என்று பொது மக்கள் குற்றம் சாட்டினர். அதிரையின் பெரும்பாலான இடங்களில் மின்கம்பிகள் அறுந்து கீழே விழும் நிலையில் இருந்து வருவதை உரிய நேரத்தில் புகார் தெரிவித்தும் சரிசெய்வதில்லை என்று அவர்கள் குற்றம்சாட்டினர்.