அதிரையில் கொட்டும் மழையில் கடைகள் பூட்டு உடைத்து ரூ 74 ஆயிரம் கொள்ளை !

அதிராம்பட்டினம், ஜூலை 26
அதிராம்பட்டினத்தில் கொட்டும் மழையில் கடைகளின் பூட்டை உடைத்து ரூ 74 ஆயிரம் கொள்ளையடிக்கப்பட்டது. மற்றொரு கடையில் கொள்ளை முயற்சி நடந்தது.

தஞ்சாவூர் மாவட்டம், அதிராம்பட்டினம், பட்டுக்கோட்டை சாலையில் மளிகை கடை நடத்தி வருபவர் அப்துல் ரஹ்மான். நேற்றிரவு 10 மணியளவில் கடையை பூட்டிவிட்டு வீட்டுக்கு சென்று விட்டார். அப்போது கனமழை பெய்து கொண்டிருந்ததால் கடையிலிருந்த பணத்தை வீட்டுக்கு எடுத்துச் செல்லாமல் கல்லாவிலேயே வைத்துச் சென்றுவிட்டார். நள்ளிரவில் கன மழை பெய்து கொண்டிருந்த போது இவரது கடையில் பூட்டை கடப்பாரையால் உடைத்த திருடர்கள், கல்லாவில் இருந்த ரூ  60 ஆயிரத்தை கொள்ளையடித்துச் சென்றுவிட்டனர்.

இதே போல் இந்த கடையின் அருகில் அதிராம்பட்டினத்தை சேர்ந்த அப்துல் ஜப்பார் என்பவர் நடத்திவந்த குழந்தைகளுக்கான பொருட்கள் விற்கும் கடையின் பூட்டை உடைத்து கல்லாவில் இருந்த ரூ 14 ஆயிரத்தை கொள்ளையடித்துச் சென்றுவிட்டனர்

பின்னர் அதிராம்பட்டினம் காவல் நிலையம் அருகில் மோகன்லால் என்பவர் நடத்தி வந்த எலெட்ரிக்கல் கடை பூட்டையும் உடைத்து கொள்ளையர்கள் உள்ளே புகுந்தனர். ஆனால் அங்கு பணம் ஏதும் சிக்கவில்லை. இன்று காலை கடை திறக்க வந்தவர்கள், கதவின் பூட்டுகள் உடைக்கப்பட்டு பணம் கொள்ளையடிக்கப்பட்டு இருப்பதை பார்த்து அதிர்ச்சியடைந்தனர்.

இதுகுறித்து அதிராம்பட்டினம் காவல் நிலையத்தில் புகார் அளித்ததின் பேரில் போலீசார் வழக்கு பதிவு செய்து விசாரணை நடத்தி வருகின்றனர். அதிராம்பட்டினத்தில் ஒரே நேரத்தில் 3 கடைகளில் கொள்ளை நடந்த சம்பவம் அப்பகுதியில் பெரும் பரபரப்பை ஏற்படுத்தி உள்ளது.