அதிரை வாய்க்கால் தெருவில் தரமில்லா தார்சாலையால் பொதுமக்கள் ஆதங்கம் !

கடந்த சில நாட்களாகவே அதிரை பேரூராட்சியின் சார்பாக 13-வது வார்டுக்கு உட்பட்ட வாய்க்கால் தெருவின் முக்கிய பகுதிகளில் புதிய தார்சாலை  அமைக்கும் பணிகள் மும்முரமாக நடைபெற்று வருகின்றன. 

இது குறித்து அப்பகுதியில் வசிக்கும் பொதுமக்கள் சிலர் ஆதங்கப்பட்டு கருத்து தெரிவித்தனர்

'எங்களின் நீண்ட நாள் கோரிக்கை நிறைவேறி இருப்பது எங்களுக்கு மகிழ்ச்சியை தந்தாலும், போடப்பட்ட சாலையில் போதுமான தார் கலவையில் இல்லாத காரணத்தினால் வரும் மழைக்காலங்களில் ஆங்காங்கே குண்டும் குழியுமாக காட்சி அளிக்க இருப்பது உண்மை. ஒரு சில பகுதிகளில் தரமானதாக போடப்பட்ட அதே வேளையில் இந்த பகுதியில் பெயருக்கு போடப்பட்டுள்ளது. அதுவும் ஜல்லிகள் எல்லாம் மேலே பெயர்ந்து வருகின்றன என்ற ஆதங்கத்தை வெளிப்படுத்தினர்.

இது குறித்து 13-வது வார்டு உறுப்பினர் அப்துல் காதர் மற்றும் காண்ட்ராக்டர் சுல்தான் ஆகியோரிடம் விளக்கம் பெற்ற வகையில்...

பணிகள் நடந்து வருவதாகவும் இன்னும் முழுமையாக நிறைவு பெறவில்லை என்றும் சம்பந்தப்பட்ட பகுதிகள் கவனத்தில் கொண்டு சரிசெய்யப்படும் என்ற பதிலைத் தந்தனர்.