படித்தப் பள்ளிக்கு முன்னாள் மாணவனின் ஒரு கடிதம்...

அன்புள்ள ஆசிரியர்களுக்கு,

நலம் நலமறிய ஆவல் !

பல தலைமுறைகளைக் கண்ட காதிர் முகைதீன் மேல்நிலைப்பள்ளி பெருமையுள்ள பாரம்பரியம் மிக்கது. அதிரையின் நல்லடையாளங்களுள் ஒன்று. ஆயிரக்கணக்கான மாணவர்களின் அறியாமையைப் போக்கி கல்விக் கண்களுக்கு ஒளிதந்த ஒப்பற்ற பள்ளி. என் பள்ளியில் படித்தவர்கள் எல்லாரும் பாமர மக்களின், வறியவர்களின், உழைப்பாளிகளின் பிள்ளைகள். அவர்கள் குடும்பத்தின் வாழ்நிலையை உயர்த்தக் காரணமாயிருக்கிறது.

பள்ளிக்கூடங்களில் நாம் கல்வி கற்கும் நாட்கள் வெறும் நாட்கள் மட்டுமல்ல. இன்றைய பொழுதில் 20-30 ஆண்டுகளுக்கு முன்னர் படித்த மாணவர்களெல்லாம் உலகமெங்கும் சிதறிக்கிடந்தாலும் தாங்கள் படித்த பள்ளியை மறக்காமல் நெஞ்சம் நெகிழும் மலரும் ஒவ்வொரு நிகழ்வுகளையும் அவ்வப்போது அசைபோடுவதுண்டு.

சரி விசயத்துக்கு வருகிறேன்...

கடந்த சில நாட்களுக்கு முன்பு பன்னிரெண்டாம் வகுப்பு அரசுப் பொது தேர்வு எழுதிய மாணவர்களின் முடிவுகள் வெளியிடப்பட்டன. இதில் பெரும்பாலான மாணவர்கள் தேர்வில் தோல்வியைத் தழுவி சென்ற ஆண்டை வீட பள்ளியின் சதவீதம் குறையக் காரணமாக இருந்துள்ளனர். இதில் குறிப்பிட்ட சில பாடங்களில் மட்டுமே பெரும்பாலான மாணவர்கள் தோல்வியைத் தழுவியுள்ளனர். கடினம் எனக் கருதக்கூடிய பாடங்களில் தேர்ச்சியும், இலகுவானவை எனக் கருதக்கூடிய பாடங்களில் தோல்வியையும் தழுவியுள்ளதில் எங்கேயோ தவறு நடந்துள்ளது என்பது மட்டும் அறிய முடிகிறது.

சமூக மேம்பாட்டுக்கும், மாற்றத்துக்கும் வித்திடக்கூடியக் கல்வியை தனது கடமையெனக்கருதி, மாணவர்களுடைய அறிவுத்திறன் மற்றும் ஒழுக்கத்தை வளர்ப்பதோடு அவர்களின் எதிர்காலத்தையும் நிர்மாணிப்பதில் பெரும் பங்கு வகிப்பது ஆசிரியப் பெருமக்களாகிய நீங்களே !

கல்விக்காக அரசு வழங்குகின்ற மானியம், உதவித்தொகை மற்றும் இன்ன பிற சலுகைகள் ஆகியவற்றை மறந்து விடுகின்ற இன்றைய பெற்றோர்கள் 'நல்ல பள்ளியை நாடுகிறோம்' எனச் சொல்லி ஆங்கில பள்ளிகளின் மேல் மோகங்கொண்டு தங்களின் பொருளையும், நேரதையும் வீண் விரயமாக்கி வருகின்ற இன்றைய காலக்கட்டத்தில் மாணவர்களின் எண்ணிக்கை, அவர்களின் தேர்ச்சி விகிதம் ஆகியவற்றை உயர்த்துவதில் முக்கிய பொறுப்பு ஆசிரியர்களாகிய உங்களிடம் மட்டுமே என்பதை நினைவில் கொள்ள வேண்டும்.

கல்வி மறுக்கப்பட்டவர்களுக்கும் அடைக்கலம் தந்து, அவர்களின் நல்வாழ்வுக்கு அடித்தளமிட்டிருக்கிறது. ஏழை-பணக்காரர், உயர்ந்தவர்-தாழ்ந்தவர் என்ற பாகுபாடற்ற சமுதாய மாற்றத்தை உருவாக்கும், பிரதிபலன் பாராது தொண்டாற்றும், ஆற்றல்மிக்கது என்பதை நினைவில் கொள்ள வேண்டும்.

பள்ளியின் பாரம்பரியத்தை பாதுகாப்பது, உள்ளூர் மக்களின் கல்வியறிவை மலரச்செய்வது, மாணவர்களின் எதிர்காலத்தை நிர்ணயிப்பது போன்றவற்றின் முக்கிய பொறுப்பு ஆசிரியராகிய நீங்கள் மட்டுமே என்பதை உணர்ந்து சக ஆசிரியர்களுடன் ஒற்றுமையுடன் கைகோர்த்து உள்ளூர் பள்ளியை கல்வி, விளையாட்டு, சமூகத்தொண்டு போன்றவற்றில் மாவட்ட, மாநில அளவில் சாதனைப்பெற இன்று முதல் முயற்சியில் ஈடுபடுங்கள்.

நன்றி !

இப்படிக்கு,
கீழ்படிந்துள்ள முன்னாள் மாணவன்,
சேக்கனா M. நிஜாம்