இந்தியளவில் சாதனை புரிந்த அதிரை சப் இன்ஸ்பெக்டர் ரவிச்சந்திரன் அவர்களின் மகனோடு ஒரு நேர்காணல் [ காணொளி ]

தஞ்சை மாவட்டம் ஆம்பலாப்பட்டு குடிக்காடு பகுதியைச் சேர்ந்தவர் ரவிச்சந்திரன். இவர் அதிரை போலீஸ் ஸ்டேஷனில் எஸ்.ஐ யாக பணியாற்றி வருகிறார். இவரது மனைவி பிரியா, இவர்களுக்கு ஷாலினி, வர்சின், ராகவேந்தன் ஆகிய மூன்று குழந்தைகள் உள்ளனர்.

இவர்களில் எட்டு வயதுடைய ராகவேந்தன், தஞ்சையிலுள்ள தூய இருதய பள்ளியில் மூன்றாம் வகுப்பு படித்து முடித்து, நடப்பாண்டு நான்காம் வகுப்புக்கு தேர்ச்சி பெற்றுள்ளார். சிறுவன் ராகவேந்தன் தஞ்சை யாகப்பா நகரிலுள்ள ஆலன் திலக் ஷோடோ ரியூ கராத்தே பள்ளியில் கடந்த ஓராண்டாக பயிற்சி பெற்று வருகிறார். இவருக்கு பயிற்சியாளர் சண்முகராஜ் பயிற்சியை அளித்து வருகிறார்.

ஏற்கனவே ராகவேந்தன் கராத்தேவில் நீல நிற பெல்ட் வாங்கியுள்ளார். கடந்த சில மாதங்களுக்கு முன் தஞ்சையில் நடந்த மாநில அளவிலான கராத்தே போட்டியில் இரண்டாமிடம் பெற்றார்.

இதைத்தொடர்ந்து கடந்த மாதம் 27ம் தேதி டில்லியில் நடந்த டால்கோ டோரா உள் விளையாட்டரங்கில் நடந்த தேசிய அளவில் கராத்தே போட்டியில் பங்கேற்று கட்டா பிரிவிலும் குழு பயிற்சி போட்டியிலும் முதலிடம் பிடித்து இரண்டு தங்க பதக்கங்களை பெற்று சாதனை படைத்துள்ளார்.

இதையடுத்து டில்லியில் தேசிய அளவில் நடந்த கராத்தே போட்டியில் கட்டா பிரிவு குழு பயிற்சி போட்டியில் இரண்டு தங்க மெடல்களை தட்டிப்பறித்த தஞ்சை சிறுவன் ராகவேந்தனுக்கு டோரன்மெண்ட் சேர்மன் சென்ஸில் சுசில் கவுல் தங்கப்பதக்கங்களை வழங்கினார். இதில் பயிற்சியாளர் சண்முகராஜ் உள்பட பலர் பங்கேற்றனர்.

இளம் வயதில் கராத்தே போட்டியில் சாதனை படைத்த சிறுவனுக்கு 'அதிரை நியூஸ்' சார்பாக பாராட்டுதலை அன்புடன் தெரிவித்துக்கொண்டு சிறுவனிடம் ஒரு நேர்காணலையும் பெற்றோம்.