ரூ 55 லட்சம் மதிப்பீட்டில் அதிரையில் புதிய பத்திரப்பதிவு அலுவலகம் !

தமிழக அரசின் சார்பாக 2012-13 ஆம் ஆண்டு நிதியாண்டில் பதிவுத்துறை அலுவலகங்களில் இடைத்தரகர்களின் நடமாட்டத்தை கட்டுப்படுத்தவும், முறைகேடுகள் நிகழாமல் கண்காணிக்கவும் அனைத்து வசதிகளுடன் கூடிய ஒருங்கிணைந்த புதிய பதிவுத்துறை அலுவலகங்கள் தமிழகத்தின் சில பகுதிகளில் தொடங்க தமிழக அரசின் சார்பாக கடந்த ஆண்டு ஆணை பிறப்பிக்கப்பட்டது.

ஆணை பிறப்பிக்கப்பட்ட பகுதிகளில் நமது ஊர் அதிரையும் ஒன்றாக இருந்தது. இந்த கட்டிட பணிக்காக நமதூர் ஆலடித்தெரு பீனா மூனா குடும்பத்தைச் சேர்ந்த ஜஹபர் அலி அவர்கள் தனக்கு சொந்தமாக உள்ள [ ஷிஃபா மருத்துவமனை, இண்டேன் கேஸ் அலுவலகம் அருகே உள்ள தென்றல் நகர் என்ற இடத்தில் ] 5568 சதுர அடி மனைக்கட்டு நிலத்தை அரசுக்கு தானமாக வழங்கினார்.

அரசு இந்த கட்டுமானப் பணிக்காக ஆரம்பத்தில் ரூபாய் ஒரு கோடியே ஐந்து இலட்சம் மதிப்பீடு செய்து இருந்தது. நீண்ட இடைவெளிக்கு பிறகு தற்போது ரூபாய் 55 லட்சம் மதிப்பிட்டில் கட்டிடம் கட்டுவதற்குரிய பணியை இன்று காலை முதல் துவங்கியுள்ளது. இந்த பணிகள் அனைத்தும் மூன்று மாத கால அவகாசத்தில் நிறைவுறும் என எதிர்பார்க்கப்படுகிறது. கட்டுமானப்பணிகளுக்காக ஊழியர்கள் தங்குவதற்காக அதன் அருகே குடிசைகளும் போடப்பட்டுள்ளன.

இன்று முதல் நாள் நிகழ்ச்சியில் அரசு அலுவலர் கருணாகரன், பொறியாளர் கர்ணன், ஜஹபர் அலி, பிரின்ஸ் ராவுத்தர், பத்திர எழுத்தர் ராஜூ, சம்சுதீன் மற்றும் சம்பந்தப்பட்ட துறை அலுவலர்கள் ஆகியோர் கலந்துகொண்டனர்.

தற்போது சார்பதிவாளர் அலுவலகம் அதிரை ஆஸ்பத்திரி தெருவில் உள்ள வாடகை கட்டிடத்தில்தான் பல ஆண்டுகளாக இயங்கி வருவது குறிப்பிடத்தக்கது.