அதிரையில் நடந்த அட்டுழியம் ! கொள்ளையர்கள் வெறிச்செயல் !! [ படங்கள் இணைப்பு ]

அதிரை ஆப்பக்காரத்தெருவை சேர்ந்தவர் சுப்பிரமணி பத்தர் இவருடைய மகன்கள் ராதாகிருஷ்ணன் [ வயது 50 ], சேகர் [ வயது 45 ] அண்ணன் தம்பிகளான இவர்கள் இருவரும் ஆஸ்பத்திரி தெருவில் கடந்த சில வருடங்களாக பேபி ஜுவல்லரி என்ற பெயரில் நகைகடை நடத்தி வருகின்றனர்.

இன்று இரவு 9.30 மணியளவில் வழக்கம்போல் இருவரும் கடையை அடைத்துவிட்டு நகைகளை இருசக்கர வாகனத்தில் வீட்டிற்கு எடுத்துச்சென்றனர். சிறிது தூரம் சென்றதும் திடீரென இருசக்கர வாகனத்தின் பின்தொடர்ந்து வந்த இரண்டு மர்ம நபர்கள் இவர்களுடைய வாகனத்தில் மோதியதில் கீழே சாய்ந்தனர். அப்போது அவர்கள் கையில் வைத்திருந்த நகைகளை பறிப்பதற்காக மர்ம நபர்கள் வைத்திருந்த ஆயுதத்தால் இருவரையும் சரமாரியாக தாக்க தொடங்கியதில் ராதாகிருஷ்ணனுக்கு தலையில், கைககளில், முதுகில் பலத்த வெட்டு காயங்களும், சேகருக்கு கையிலும், முதுகிலும் காயங்கள் ஏற்பட்டது.

இரத்த வெள்ளத்தில் உயிருக்கு போராடிய ராதாகிருஷ்ணன், சேகர் ஆகியோரை அருகில் நின்றவர்கள் அரசு மருத்துவமனைக்கு கொண்டு சென்றனர். அங்கே இருவருக்கும் டாக்டர் சீனிவாசன் சிகிச்சையளித்தார். இதில் பலத்த காயமடைந்த ராதாகிருஷ்ணனை தீவிர சிகிச்சை அளிப்பதற்காக த.மு.மு.க ஆம்புலன்ஸ் மூலம் தஞ்சைக்கு கொண்டு செல்லப்பட்டுள்ளது. த.மு.மு.க மற்றும் நகை கடைகளின் உரிமையாளர்கள் உள்ளிட்ட அதிரை இளைஞர்கள் பலர் உடனிருந்து உதவினார்கள்.

தகவலறிந்த பட்டுக்கோட்டை டிஎஸ்பி செல்லபாண்டியன் தலைமையில் அதிரை போலீசார் மருத்துவமனைக்கு விரைந்து வந்து நடந்த சம்பவம் குறித்து கேட்டறிந்தனர். மேலும் சம்பவ இடத்தையும் நேரில் பார்வையிட்டனர். நகைகளை போட்டுவிட்டு தப்பியோடிய மர்ம நபர்கள் குறித்து தீவிரமாக விசாரித்து வருகின்றனர். மருத்துவமனையில் கூட்டம் அதிகமாக கூடியதால் இந்த பகுதி முழுதும் பெரும் பரபரப்பாக காணப்பட்டது.