மறைந்து வரும் தொப்பித்தொழில் !? ஒரு சிறப்புப் பார்வை !

ஒரு காலத்தில் இந்தத் தொப்பியும் நமது ஆடைகளில் ஒன்றாக அதிக பட்சம் பேர்களால் அணியப்பட்டு வந்தது. அந்த காலகட்டத்தில் தொப்பிக்கு நல்ல வரவேற்ப்பு இருந்தது.தொப்பி அணிந்திருப்பவர்கள்தான் தொழுகையாளியாக கருதப்பட்டு வந்தனர்.தொப்பி அணிந்து செல்பவர்களுக்கு ஒரு தனி மரியாதை இருந்தது என்று கூட சொல்லலாம். இன்னும் சொல்லப் போனால் இஸ்லாமியர்களின் அடையாளங்களில் ஒன்றாகக் கூட தொப்பி கருதப்பட்டு வந்தது.அந்த அளவுக்கு தொப்பிக்கு முதலிடம் கொடுக்கப்பட்டு வந்தது.

இஸ்லாமியர்களுக்கென பிரத்தியேக அமைப்புடன் தயாரிக்கப்படும் இந்ததொப்பி சென்னை மாநகருக்கு அடுத்தபடியாக நாகூர், காரைக்கால், அதிராம்பட்டினம், காயல்பட்டினம், கீழக்கரை ஆகிய ஊர்கள் தொப்பிக்கு பிரசித்திபெற்று விளங்கியது. இந்த ஊர்களில் தான் தொப்பிகள் தயாரிக்கப்பட்டு விற்பனை செய்யப்பட்டு வந்தது.

தொப்பிகளில் ஜின்னா கேப், மலாய் கேப், ராம்பூரி, ஒவல்தொப்பி, துருக்கித்தொப்பி, வரித்தொப்பி,,பின்னல் தொப்பி, தப்லீக் தொப்பி, ஹாஜித் தொப்பி, ஓமன்தொப்பி, உள்ளன் தொப்பி [ மாப்பிள்ளைத் தொப்பி ] கருப்பு,நேவிபுளு, சிவப்பு, பச்சை நிறத்திலான வெல்வெட் தொப்பிகள் மற்றும் சிறுவர்களுக்கென கலர்த்தொப்பி,டிசைன் தொப்பி,ரேந்தை தொப்பி, ஜரிகைத் தொப்பிகளென்று என்று பலவித ரகங்கள் புழக்கத்தில் இருந்தன. வண்ணவண்ண தோற்றத்திலான தொப்பிகள் அணியப்பட்டு நகரை வலம் வந்தனர். ஒவ்வொன்றும் அதற்கேற்றார்போல் விலை உள்ளதாக இருக்கும். அவரவர் வசதிக் கேற்றாற்போல் வாங்கிச் செல்வார்கள். ஒவ்வொன்றும் வெவ்வேறு அமைப்புக்களில் அதன் தோற்றத்தை வெளிப்படுத்தி பார்க்க அழகாக இருக்கும்.தொப்பி விற்பனை சிறப்பாக இருந்ததால் இத்தொழில் செய்து வந்தவர்களும் மிக சந்தோசத்துடன் வியாபாரம் செய்து வந்தார்கள்.

மதரஸா,மக்தப் பள்ளிகளுக்கு ஓதச் செல்லும் சிறுவர்கள் முதல் பெரிய ஆலிம்கள் வரை அணியப்பட்டு வந்த தொப்பி இன்றைய சூழ்நிலையில் விருப்பமில்லாத ஒன்றாகி ஒருசிலரின் தலையில் மட்டுமே ஒட்டிக் கொண்டிருக்கிறது.

ஒரு நேரத்தில் நமதூரில் கல்யாண மாப்பிள்ளைக்கென ஸ்பெஷல் தொப்பியாக மாப்பிள்ளைத் தொப்பி என்று மிக பிரபல்யமாக இருந்தது. அதுவும் காலப் போக்கில் மறையத்தொடங்கி விட்டது.கால போக்கில் தொப்பி அணிபவர்களின் எண்ணிக்கையும் கணிசமாக குறைந்து விட்டதால் இத்தொழிலை செய்து வந்தவர்கள் பெரிதும் பாதிப்படைந்துள்ளனர்.

கல்யாணம், சுன்னத்து [ ஹத்னா ] மற்றும் வீட்டு விசேஷ காரியங்களுக்கு ஆடைகளுடன் தொப்பிக்கும் முக்கியத்துவம் கொடுத்துஅணியப்பட்டு வந்தன. ஒருநேரத்தில் சிறந்ததொழிலாக நல்ல வருமானம் தரக்கூடிய தொழிலாக இருந்த இத்தொழில்தொப்பி போடும் மோகம் குறைந்து விற்பனைக் குறைவாகி போதிய வருமானம் இல்லாததால் இத்தொழில் செய்பவர்களால் தனது முன்னோர்கள் செய்த இந்தத் தொப்பித் தொழிலை தொடர்ந்து செய்ய முடியாத நிலை ஏற்பட வாய்ப்பு உள்ளது.

மேலும் இத்தொழிலை பண்டு தொட்டு செய்தவர்களே இன்று வரை செய்து கொண்டிருக்கிறார்களே தவிர புதிதாக செய்வதற்கு பிறருக்கு ஆர்வமோ, அனுபவமோ இல்லை என்பதே உண்மை. ஆகவே இனிவரும் காலங்களில் நமது நன்னதியினருக்கு நாம் அறிந்து அணிந்த பழைய மாடல் தொப்பிகளெல்லாம்  என்னவென்று தெரியாமல் புகைப்படங்களில் மட்டுமே பார்க்கும்படி ஆகிவிடும் போல் இருக்கிறது.