எம்.எல்.ஏ.வை கயிற்றால் கட்டி வைத்து நடத்திய போராட்டத்தால் பெரும் பரபரப்பு !

உத்திரபிரதேச மாநிலத்தில் தொடர் மின் வெட்டால் ஆத்திரமடைந்த கிராம மக்கள் எம்.எல்.ஏ.வையும், கவுன்சிலரையும் பிடித்து கயிற்றில் கட்டி வைத்து போராட்டத்தில் ஈடுபட்ட சம்பவம் பெரும் பரபரப்பை ஏற்படுத்தியது.

உத்திரபிரதேச மாநிலத்தின் சந்தவ்லி மாவாட்டத்தில் உள்ள முகல் சராய் பகுதி மக்கள் தொடர் மின்வெட்டாலும், போதிய குடிநீர் வசதி இல்லாததாலும் அவதியடைந்து வந்தனர்.

இது குறித்து மாவட்ட நிர்வாகத்திடம் பலமுறை புகார் அளித்தும் பலன் இல்லாததையடுத்து அப்பகுதிக்கு வந்த பகுஜன் சமாஜ் கட்சியைச் சேர்ந்த அத்தொகுதியின் எம்.எல்.ஏ பப்பான் சிங் சவுகானையும் கவுன்சிலர் கயாமுதினையும் சிறைபிடித்தனர். பலமணி நேரம் அவர்களை கயிற்றில் கட்டிவைத்து கிராம மக்கள் ஆர்ப்பாட்டத்தில் ஈடுபட்டனர்.

தகவல் அறிந்து சம்பவ இடத்திற்கு வந்த காவல்துறை கண்காணிப்பாளர் முனிராஜ், எம்.எல்.ஏ மற்றும் கவுன்சிலரை விடுதலை செய்வது தொடர்பாக கிராம மக்களிடம் பேச்சு வார்த்தை நடத்தினார்.

விரைவில் அனைத்து பணிகளையும் முடித்து தருவதாக எம்.எல்.ஏ மற்றும் காவல்துறை கண்காணிப்பாளர் கொடுத்த வாக்குறுதியை இருவரையும் விடுவித்தனர்.

எம்.எல்.ஏ கிராம மக்கள் மீது எந்தவித புகாரும் அளிக்காததால் போலீஸார் யாரும் மீதும் வழக்கு பதிவு செய்யாமல் திரும்பிச் சென்றனர்.

நன்றி: தினமணி