அதிரை மின்சாரவாரியத்தின் அலட்சிய போக்கை கண்டித்து சாலை மறியலில் ஈடுபட்ட பெண்கள் ! [ புகைப்படங்கள் ]

அதிரை மின்சாரவாரியத்தின் அலட்சிய போக்கை கண்டித்து அதிரை பொதுமக்கள் இன்று காலை சாலைமறியலில் ஈடுபட்டனர்.

அதிரை 11 வது வார்டுக்கு உட்பட்ட பகுதி பெரிய தைக்கால்தெரு நேற்று இரவு இந்த பகுதியில்உள்ள மின்கம்பத்தில் மின்கசிவு ஏற்பட்டுள்ளது. இதையடுத்து மின்சாரவாரிய அலுவலகத்தின் கவனத்துக்கு தொலைபேசியில் தொடர்பு கொண்டபோது, மறுமுனையில் எந்தவித பதிலும் கிடைக்கவில்லை. இதனால் ஆத்திரமடைந்த இந்தபகுதி மக்கள்  திரண்டு வந்து இன்று காலை 10 மணியளவில் ஈசிஆர் சாலையில் அமர்ந்து மறியலில் ஈடுபட்டனர். இதில் 50 க்கும் மேற்பட்டோர் கலந்துகொண்டனர். இதனால் இந்த சாலை வழியே செல்லும் வாகனங்கள் புறப்படுவதில் தாமதமாகின.

இதுகுறித்து இப்பகுதியை சேர்ந்த செய்யது நம்மிடம் கூறியதாவது....
நேற்று இரவு 9 மணியளவில் மின்கம்பத்தில் ஏற்பட்ட மின்கசிவை அடுத்து தொடர்ந்து மின்பொறி ஏற்பட்டுக்கொண்டு இருந்தன. மின்கம்பத்தை சுற்றி நீர்தேங்கி காணப்பட்டதால் அதன் அருகில் சென்ற பாம்பு ஒன்று மின்சாரம் தாக்கி இறந்துள்ளது. அதிர்ச்சியடைந்த நாங்கள் மின்சார வாரிய அலுவகத்திற்கு தொடர்புகொண்டபோது மறுமுனையில் எந்தவித பதிலும் கிடைக்க வில்லை. தொடர்ந்து முயற்சித்த போது டெலிபோனின் ரிசீவரை கீழே எடுத்து வைத்துள்ளனர். இதனால் அவர்களை தொடர்புகொள்ள இயலவில்லை. இரவு முழுதும் கண்விழித்த நாங்கள் அதன் அருகில் யாரையும் செல்லவிடாமல் பாதுகாத்து கொண்டிருந்தோம். ஆத்திரமடைந்த நாங்கள் திரண்டு வந்து ஈசிஆர் சாலையில் அமர்ந்து மறியலில் ஈடுபட்டோம் என்றார்.

இதையடுத்து தகவலறிந்த மின்சாரவாரிய ஊழியர் சம்பவ இடத்திற்கு விரைந்து வந்து மின்கசிவை சரிசெய்ததை அடுத்து மறியலில் ஈடுபட்ட அனைவரும் கலைந்து சென்றனர். இதனால் இந்த பகுதி முழுதும் சில மணிநேரங்கள் பரபரப்பாக காணப்பட்டன.