பாலைவனமாகப்போகும் அதிரை !? ஒன்றிணைந்து போராட முடிவுசெய்த சமூக ஆர்வலர்கள் !!

அதிரையின் ஒவ்வொரு பகுதிகளிலும் காணப்படும் குளங்கள் ஒவ்வொன்றும் பல தலைமுறையைக் கண்டு ஒரு வரலாற்றை எடுத்துச்சொல்லும் அளவுக்கு விசேஷமானவை. இன்றும் ஏதாவது ஒரு குளத்தைக் நாம் காண நேரிட்டால் நமது நெஞ்சம் துடிதுடித்து அக்குளத்தில் நீராடத்தோணும். அதில் குளித்து மகிழ்வோரைக் கண்டு நமது உள்ளம் பூரிப்படையும் ஆனந்தமடையும்.

இக்குளங்களில் உள்ளூர் மக்கள் நீராடி மகிழ்வதற்கு மாத்திரமல்ல, ஆடு மாடுகள், பறவைகள் நீர் அருந்தி செல்வதற்கும், சுற்றுச்சூழல் பாதுகாப்பிற்கும் பயன்தரக்கூடியதாகவும், நீர் ஆதாரத்தை நம்மூருக்கு வாரி வழங்கக் கூடியவையாகவும் இருந்து வருகின்றன.

கோடை காலங்களில் நமக்கு தேவையான தண்ணீர் கிடைக்காதபோது, தாகத்தால் தவித்து விடுகிறோம். குடிக்க மட்டுமல்லாமல் குளிக்க, துணி துவைக்க, பாத்திரம் கழுவ, சமையல் செய்ய என அன்றாடம் தேவைப்படும் தண்ணீரின் அளவு சற்று கூடிக்கொண்டேதான் போகும்.

அதிரை மற்றும் அதனை சுற்றியுள்ள ஏரளாமான கிராமங்களில் ஏரிகளும் குளங்களும் நீரின்றி வறண்டு காணப்பட்டு வருகின்றன. இதனால் இந்த பகுதியில் நடைபெற்று வந்த விவசாயமும் குறைந்து விளை நிலங்கள் அனைத்தும் மனைக்கட்டு நிலங்களாக மாறி வருகின்றன. மேலும் நிலத்தடி நீரும் 150 அடிக்கு கீழ் சென்றுவிட்டன. கடல் அருகாமையில் காணப்படுவதால் நிலத்தடி நீரில் கடல் நீர் உட்புகும் அபாயமும் உள்ளது.

அதிரை மற்றும் அதனை சுற்றியுள்ள கிராமங்களில் போதிய நீர் ஆதாரம் குறைந்து எதிர்காலத்தில் பாலைவனமாகிவிடும் சூழல் அமைந்துவிடுமோ என்று அச்சமடைந்த நமதூர் சமூக ஆர்வலர்கள் விழித்துதெழுந்து ஒன்றிணைந்து போராட முடிவு செய்தனர். இந்த முயற்சிக்கு N.M. முஹம்மது அப்துல்லாஹ் மற்றும் M.S. அஹமது அமீன் ஆகியோர் முதன்முதலாக வித்திட்டு அதிரையில் வாழும் ஏனைய சமூக ஆர்வலர்களை ஒன்றிணைக்க முயற்சித்தனர். இதற்காக அதிரை பேரூராட்சி தலைவர் அஸ்லம் அவர்களின் உதவியையும் நாடினர்.

உடனடியாக இவற்றை அரசின் கவனத்துக்கு எடுத்துச்செல்ல வேண்டும் என எண்ணிய இவர்கள் வீணாக கடலில் கலந்துவரும் நீர்ஆதாரத்தை நமதூருக்கு கொண்டு வருவதற்குரிய வழிமுறைகளை அக்கம் பக்கம் கிராமங்களில் வசிக்கும் சமூக ஆர்வலருடன் இணைந்து செயல்திட்டங்களை தீட்டினார்கள்.

இதற்காக நேற்று மாலை அதிரை பைத்துல்மால் அலுவலகத்தில் கூட்டப்பட்ட முதல் கூட்டத்தில் அதிரையில் வசிக்கும் பெரும்பாலான சமூக ஆர்வலர்கள் கலந்துகொண்டு மக்கள் நலன் சார்ந்த பிரச்சனையை எவ்வாறு இணைந்து போராடலாம் ? இந்த பிரச்சனையை எந்த முறையில் அரசின் கவனத்துக்கு எடுத்துச்செல்லலாம் ? என்பது குறித்து ஆலோசித்தனர். இறுதியில் எதிர்வரும் திங்கட்கிழமை காலை மாவட்ட ஆட்சியரை சந்தித்து முறையிடுவது என முடிவு செய்துள்ளனர். இதற்காக 15 நபர்கள் கொண்ட குழுவினர்கள் நியமனம் செய்யப்பட்டுள்ளனர்.

இந்தக்கூட்டதில் சம்சுல் இஸ்லாம் சங்க தலைவர் ஹாஜி உமர், அதிரை நல்வாழ்வு பேரவை தலைவர் அக்பர் ஹாஜியார், அதிரை பேரூராட்சி தலைவர் அஸ்லம், அதிரை பைத்துல்மால் செயலர் அப்துல் ஹமீது, சமூக ஆர்வலர்கள் ஜமீல் M. ஸாலிஹ், முத்துசாமி உள்ளிட்ட அதிரையில் வசிக்கும் சமூக ஆர்வலர்கள் இந்தக்கூட்டத்தில் கலந்துகொண்டு ஆலோசனைகளை வழங்கினார்கள்.

நீரின்றி காணப்படும் குளங்கள் பற்றிய தலையங்கம் கடந்த [ 28-10-2013 ] அன்று அதிரை நியூஸ் தளத்தில் செய்தியாக வெளியிடப்பட்டது. அதில் பதிந்துள்ள நமதூர் குளங்களின் புகைப்படங்கள் சில....