இளம்பிறை எழுச்சி பேரணிக்கு கவிஞர் அதிரை தாஹா எழுதிய கவிதை !

முனீருல் மில்லத் அழைக்கிறார் !
அழைக்கிறார் ! அழைக்கிறார் !
தக்பீர் சொல்ல அலைக்கிறார் !
தரணி வெல்ல அழைக்கிறார் !

முஸ்லிம் லீக்கின் முன்னேற்ற கீதம் !
முழங்கிட நம்மை அழைக்கிறார் !

முனீருல் மில்லத் அழைக்கிறார் !
முன்னேறி வாதம்பி அழைக்கிறார் !

நாரே தக்பீர் ! அல்லாஹு அக்பர் !
முஸ்லிம் லீக் ! ஜிந்தா பாத் !
மஹல்லா ஜமாஅத் ! ஜிந்தா பாத் ! (அழை)

காயிதெ மில்லத் கண்டிட்ட பாதை
கர்ஜித் சிராஜுல் கொண்டிட்ட பாதை
இலட்சிய மெல்லாம் கண்டிடும் பாதை
இன்னுயிர் இஸ்லாம் காத்திட வாநீ ! (அழை)

முஹல்லா ஜமாஅத்தை ஒருங்கினைத் தாள்வோம்
ஒற்றுமைக் கயிற்றைப் பிடித்துயர் கொள்வோம்
பள்ளிவாசலே மையமே நமக்கு
பஞ்சு பஞ்சாய்ப் பிரிவதை ஒதுக்கு ! (அழை)

திருமணச் சட்டம் காத்திட்ட வீரர்
இறைவன் இல்லம் இணைத்திடும் தீரர்
பிறப்பும் இறப்பும் பராமரிக்கும்
சிறப்பில் உயர்ந்த சீரிய தலைவர் (அழை)

பைத்துல் மாலை நிறுவிய லீக்காம் !
பஞ்சம் துரத்திடும் ஏழையின் லீக்காம் !
வயிற்றுப் பிழைப்பு மட்டுமா வாழ்க்கை ?
வந்து பாரு லீக்கின் போக்கை ! (அழை)

மற்றவர் தயவை ஏன் நாடுகின்றாய்
மதிக்கும் ஷரீயத் பஞ்சாயத் திருக்க,
குற்றம் புரியும் பரம்பரையா நாம் ?
கொள்கையில் பிடிப்புக் கொண்டிட வேண்டி (அழை)

நபிபெருமானும் காட்டிய மருத்துவம்
நாடிடும் லீக்கைப் பாரடா !
அபிமான முடனே வந்துத்தாய்ச்சபை
அணுகி நலன்கள் கொள்ளடா ! (அழை)

உலகக் கல்வி ஒரு கண்ணாகும்
உயர்த்தும் மார்க்கக் கல்வியோ மறுகண்
பலபல இன்னல்கள் பட்டுமே லீக்கு
பலபல அமைப்பை செய்ததைக் காண (அழை)

கல்விக்கு கண்ணைத் திறந்தது இஸ்லாம்
கடைபிடித் தொழுகும் முஸ்லிம் லீக்கே !
கல்விக் குதவி, கற்றவர் மேதை
கண்டெடுக் கின்ற காட்சியைப் பார்க்க (அழை)

பெண்ணுக் குதவிப் பேசிடும் சங்கம்
ஏழைப் பெண்கள் திருமண முடிக்க
முஹல்லா ஜமாஅத்தை உருவாக்கித் தொண்டு
மும்முர மாகவே செய்யுமே லீக்கு ! (அழை)

முன்மாதிரியாய் முஹல்லா ஜமாஅத்
உழைத்தே உயர்வைக் காட்டிடு வோர்க்கே
"கண்ணியம்"-"விருதுகள்" கண்டு கொடுப்பதைக்
கண்டு களித்திடத் தாய்ச்சபை வாரீர் ! (அழை)

மலராய் மலர்ந்தே மாந்தியுண் தேனாய்
வார்த்தைகள் பேசிய வள்ளல் முஹம்மதின்
குலத்தவர் முஸ்லிம் குளிர்புன் முறுவல்
மலர்த்தும் நாங்களா "பயங்கர வாதிகள் !" (அழை)

மனிதன் மனிதனை வதைத்துக் கண்ணீர்
வடியச் செய்யும் மனிதாப மற்ற
புனிதமில் செயலைப் புறம்தள்ளி இஸ்லாம் !
மதநல்லிணக்கத்தை வளர்த்துக் காப்பது (அழை)

இளம்பிறை எழுச்சிப் பேரணி காண்பதும்
இளம்பிறை பச்சைக் கொடியது பறப்பதும்
வளம்பெற பாரதம் வாழ்த்துக்கள் கூறவே !
களம்கண்டு இந்தியா வெல்வதைக் கூறிட (அழை)

மதச்சார் பற்ற ஜனநாய சக்திகள்
மாண்புற வென்றிட, மதவெறி செத்திட
இதமாய் முழங்குவோம் சங்க நாதமே !
விழிப்புணர் வூட்டுவோம் ! அரசியல் வளம்பெற (அழை)

இறைவழி பாட்டில் வேற்றுமைக் களைவோம் !
இஸ்லாத்தில் இணக்க விதைகளை விதைப்போம் !
இயக்கங்கள் அனைத்திலும் ஒழுங்கினை அமைப்போம் !
இயங்குவோம் புதியசகாப்தம் திரள்வீர் ! (அழை)

தேசிய ஒருமைப் பாட்டுக்கே உழைப்போம் !
தேர்ந்த சமயநல் லிணக்கம் காண்போம் !
சிறுபான் மையினர் தன்மையைக் காப்போம் !
தாய்ச்சபை அழைக்கும் சங்கதி சொல்லிட   (அழை)

கவிஞர் மு. முஹம்மது தாஹா

குறிப்பு : இந்த கவிதை மணிச்சுடர் இதழில் கடந்த வாரம் வெளிவந்தது குறிப்பிடத்தக்கது.