தூய்மைபடுத்தும் பணியில் மும்முரமாக ஈடுபடும் 15 வது வார்டு கவுன்சிலர் அப்துல் லத்திப் !

அதிரை தேர்வு நிலை பேரூராட்சியின் நிர்வாக எல்லைக்கு  உட்பட்ட காட்டுப்பள்ளி தெரு பகுதியில் தேங்கி நின்ற கழிவு நீர் வாய்க்கால் மற்றும் செடியன் குளக்கரையின் இருபுறமும் மண்டிக்கிடந்த முட்புதர்களையும் தூய்மை படுத்தும் பணியில் அதிரை பேரூராட்சியின் 15 வது வார்டு உறுப்பினர் அப்துல் லத்திப் மும்முரமாக ஈடுபட்டார். இதனால் இந்த பகுதியில் வாழும் பொதுமக்கள் மிகுந்த மகிழ்ச்சியடைந்துள்ளனர்.

இதுகுறித்து அதிரை பேரூராட்சியின் 15 வது வார்டு உறுப்பினர் அப்துல் லத்திப் நம்மிடம் கூறுகையில்....
'அதிரை பேரூராட்சி மற்றும் இப்பகுதியில் வாழும் சில தன்னார்வலர்களின் பொருளாதார உதவியால் கழிவு நீர் வாய்க்கால் தூர் வாரப்பட்டது. இதற்காக இன்று காலை முதல் ஜேசிபி இயந்திரத்தை வாடகைக்கு எடுத்து பணிகள் தொடர்ந்து நடைபெற்று வருகிறது.

மேலும் செடியன் குளக்கரையின் இருபுறமும் ஏராளமான முட்புதர்கள் மண்டி காணப்பட்டன. இப்பகுதியில் புழங்கும் பொதுமக்களும், குளக்கரையின் மீது செல்லும் வாகனங்களும் மிகுந்த சிரமத்திற்கு உள்ளாகி வந்தது. இதை கருத்தில் கொண்டு இருபுறமும் மண்டிகாணப்படும் முட்புதர்களை ஜேசிபி இயந்திரத்தை கொண்டு அப்புறப்படுத்தி வருகிறோம். இந்த பணிகள் நாளையும் தொடரும். பொதுமக்கள் மிகுந்த வரவேற்பு அளித்துள்ளனர்' என்றார்.