ரமலான் சஹர் உணவுக்காக அதிரை மீன் மார்க்கெட்டுக்கு பிரத்தியகமாக விற்பனைக்கு வரும் கொடுவா மீன்கள் !

அதிரையை உள்ளடக்கிய காந்தி நகர், கரையூர் தெரு, ஏரிப்புறக்கரை மறவக்காடு, கீழத்தோட்டம் ஆகிய பகுதிகளில் மீன்பிடி துறைமுகங்கள் உள்ளன. இங்குள்ள மீனவர்கள் படகுகளில் கடலுக்குச் சென்று மீன்பிடித்து வருகின்றனர். இங்குள்ள கடல்பகுதிகளில் பிடிபடும் கொடுவா மீன்களை அதிரையின் பிரதான மார்க்கெட்டாக கருதப்படுகின்ற கடைத்தெரு பகுதியில் அமைந்துள்ள மீன் மார்க்கெட்டிற்கு கொண்டு வரப்பட்டு விற்கப்படுகின்றன. அதிக ருசியைத்தரும் கொடுவா மீனை அதிகமான வாடிக்கையாளர்கள் விரும்பி வாங்கிச்செல்கின்றனர்.

இது குறித்து மீன் வியாபாரி மொய்தீன் நம்மிடம் கூறுகையில்...
'அதிரையை சுற்றி காணப்படும் கடல் பகுதியிலிருந்து ஏலத்திற்காக இங்கு கொண்டுவரப்படும் கொடுவா மீன்களை வெளியூர்களிலிருந்து வரும் மொத்த வியாபாரிகள் வாங்கிச்செல்வதால் உள்ளூர் வியாபாரம் பாதிப்படைகிறது. புனித ரமலான் மாதத்தில் சஹர் உணவுக்காக கொடுவா மீன்னை விரும்பி சாப்பிடும் உள்ளூர் மக்களுக்கு பெருத்த ஏமாற்றமாக இருந்து வந்தது. இதை கருத்தில் கொண்டு நேரடியாக துறைமுகத்திற்கு சென்று பிரத்தியகமாக கொடுவா மீன்களை விற்பனைக்காக வாங்கி வந்துள்ளோம். இந்த மீன்களை உள்ளூர் மக்களுக்கு மாத்திரம் குறைந்த விலையில் விற்பனை செய்ய முடிவு செய்துள்ளோம். மொத்தமாகவும், சில்லறையாகவும் விற்பனை செய்யும் கொடுவா மீன்களை உள்ளூர் மக்கள் ஆர்வமாக வாங்கிச்செல்கின்றனர்' என்றார்.