காதிர் முகைதீன் மேல்நிலைப்பள்ளியின் முன்னாள் மாணவர் இந்நாள் மாணவர்களுக்கு பாடம் நடத்தினார்!

அதிரை சேதுரோட்டை சேர்ந்தவர் அப்துல் ஹமீது. இவரது மகன் தமீம் அன்சாரி ( வயது 38 ). கடந்த 1986 ம் ஆண்டு முதல் 1993 ம் ஆண்டு வரையிலான கல்வியாண்டில் நமதூர் காதிர் முகைதீன் ஆண்கள் மேல்நிலைப்பள்ளியில் நடுநிலை, உயர்நிலை கல்வி பயின்றார். பொறியாளரான இவர் தற்போது அமெரிக்காவில் பணிபுரிந்து வருகிறார். விடுமுறைக்காக தாயகம் திரும்பிய இவர் காதிர் முகைதீன் ஆண்கள் மேல்நிலைப்பள்ளியின் மாணவர்களிடையே 'அதிரை முதல் அமெரிக்கா வரை தமக்கு ஏற்பட்ட அனுபவங்கள் குறித்தும், கல்வி கற்றலின் அவசியம், புதுமையில் கவனம் செலுத்துதல் உள்ளிட்டது குறித்து பாடம் நடத்தினார். இவர் எடுத்த பாடத்தை மாணவர்கள் ஆர்வத்துடன் கூர்ந்து கவனித்தனர்.

தான் படித்த பள்ளியில் முன்னாள் மாணவர் ஒருவர் ஆர்வத்துடன் இந்நாள் மாணவர்களுக்கு பாடம் நடத்தியதை பள்ளி தலைமை ஆசிரியர் மஹபூப் அலி வெகுவாக பாராட்டினார். அப்போது பள்ளியின் இயற்பியல் ஆசிரியர் அஷரப் அலி, சாதிக் அலி ஆகியோர் உடனிருந்தனர்.

முன்னதாக பள்ளி தலைமை ஆசிரியர் மஹபூப் அலி பள்ளியின் முன்னாள் மாணவர் தமீன் அன்சாரி குறித்து அறிமுக உரை ஆற்றினார்.

இதுகுறித்து பள்ளி தலைமை ஆசிரியர் மஹபூப் அலி நம்மிடம் கூறுகையில்:
'பள்ளிக்கு பெருமை சேர்க்கும் வகையில் பள்ளியின் முன்னாள் மாணவர் தமீம் அன்சாரி அவர்களின் வளர்ச்சி மகிழ்ச்சியை ஏற்படுத்தியுள்ளது. இவர் இன்று மாணவர்களிடேயே ஆற்றிய உரை மிகவும் பயனுள்ளதாக அமைந்தது. மனதார பாராட்டுகிறேன். இவரை போல் பள்ளியில் கல்வி பயின்ற முன்னாள் மாணவர்கள் பலர் பல்வேறு நாடுகளில் பல்வேறு பொறுப்பு வகித்து வருகின்றனர். அவர்களும் பள்ளியை தொடர்பு கொண்டு 'பள்ளியில் கல்வி பயின்று வரும் மாணவர்கள் மத்தியில் தங்கள் வாழ்வில் ஏற்பட்ட அனுபவங்கள் உள்ளிட்ட கல்வி தொடர்பான முக்கிய அறிவுரைகளை வழங்கலாம். இவற்றை நாங்கள் வரவேற்கிறோம். பள்ளி நிர்வாகம், சக ஆசிரியர்கள் வழிகாட்டுதலுடன் பள்ளியின் தலைமை ஆசிரியர் என்ற முறையில் முழு ஒத்துழைப்பு வழங்க தயாராக இருக்கிறேன்' என்றார்.