அதிரையில் இன்டர்நெட் துண்டிப்பால் வங்கி பணி முடக்கம்: பொதுமக்கள் அவதி!

அதிரை ஈ.சி.ஆர் சாலையில் புதுப்பொலிவுடன் இயங்கி வருகிறது கனரா வங்கி. இந்த வங்கியில் அதிரை மற்றும் சுற்று வட்டாரப் பகுதிகளில் வசிக்கும் பொதுமக்கள், தொழில் அதிபர்கள், விவசாயிகள், தனியார் நிறுவன ஊழியர்கள், அரசு ஊழியர்கள் மற்றும் மகளீர் சுய உதவிக்குழு உறுப்பினர்கள் என ஆயிரக்கணக்கானோர் சேமிப்புகணக்கை வைத்துள்ளனர். தினமும் நூற்றுக்கணக்கான வாடிக்கையாளர்கள் வந்து செல்கின்றனர்.

இந்நிலையில் இன்று காலை வங்கிக்கு செல்லும் இன்டர்நெட் கேபிள் துண்டிப்பால் பணிகள் அனைத்தும் பாதிப்படைந்துள்ளது. இதனால் பணம் போட, எடுக்க வந்த வாடிக்கையாளர்கள் கடும் அவதிப்பட்டனர். பணம் எடுக்க வந்த பெரும்பாலானோர் சில மணி நேரங்கள் வங்கியின் வளாகத்தில் காத்திருந்தனர்.

இதுகுறித்து தொலைதொடர்பு ஊழியர்கள் தரப்பில் விசாரித்த வகையில்...
'நெடுஞ்சாலை துறையின் சார்பில் அதிரை பேருந்து நிலைய ஈசிஆர் சாலை முதல் 800 மீட்டர் வரையிலான பட்டுகோட்டை செல்லும் சாலையை மேம்படுத்தும் பணி கடந்த சில நாட்களாக மும்முரமாக நடைபெற்று வருகிறது. இந்த பணியின் ஒரு பகுதியாக சாலையின் குறுக்கே கழிவு நீர் செல்ல பாலம் அமைக்கும் பணி நடைபெற்றது. இதற்காக ஜேசிபி இயந்திரத்தின் மூலம் பள்ளம் தோண்டும் போது தொலைதொடர்பு கேபிள்கள் துண்டிக்கப்பட்டது. இதனால் இந்த கேபிள் வழியே செல்லும் அணைத்து தொலைத்தொடர்பு இணைப்புகளும் இயங்கவில்லை. இன்று காலை முதல் துண்டித்த கேபிள்களை கண்டறிந்து இணைக்கும் பணிகளில் நாங்கள் மும்முரமாக ஈடுபட்டு வருகிறோம். இன்று மாலைக்குள் இணைப்பு வழங்கப்படும்' என்றனர்.