குமியும் குப்பைகள் ! குமுறும் பேரூராட்சித்தலைவர் !! [ காணொளி ]

'ஒரு பிளாஸ்டிக் பையை சராசரியாக நாம் பயன்படுத்திக் கொள்ளப்படும் நேரம் வெறும் 20 நிமிடங்கள் மட்டுமே. ஆனால் அது மக்குவதற்கு ஆகும் காலமோ நூற்றுக்கணக்கானஆண்டுகள்' என்பது ஆய்வு அறிக்கைகள்.

பிளாஸ்டிக் பைகளைத் தவிர்த்து சுகாதாரமான, மாசுபாடற்ற சுற்றுச்சுழல் பாதுகாப்பைப் பெற வேண்டும் என்ற உயரிய விழிப்புணர்வு கருத்துகளுடன் நமதூர் பேரூராட்சி நிர்வாகத்தால் ப்ளாஸ்டிக் பை மற்றும் அதன் தொடர்புடைய மக்காத பொருட்களை விற்பனை செய்வதற்கும், பயன்படுத்துவதற்கும் கடந்த இரண்டு ஆண்டுகளுக்கு முன்பு தடை செய்யபட்டதோடு மட்டுமல்லாமல் அவற்றை மீறுவோர் மீது கடும் நடவடிக்கையும் எடுக்கப்பட்டு வந்தன.

தடை குறித்த அரசின் ஆணை நகல் எண் : 132 / 2012 Dated 16-08-2012 அன்று தஞ்சை மாவட்ட அரசிதழிலும் வெளியிடப்பட்டன.

அதில்,

முதல் தடவை மீறுவோர் மீது ரூபாய் 250/-ம்

இரண்டாவது தடவை மீறுவோர் மீது ரூபாய் 500/-ம்

மூன்றாவது தடவை மீறுவோர் மீது ரூபாய் 1000/-ம்

மேலும் தொடர்ந்து மூன்று முறைக்கு மேல் மீறினால் குற்றவியல் சட்டத்தின் கீழ் வழக்கு தொடர நடவடிக்கை மேற்கொள்ளப்படும் என்றும் அதில் குறிப்பிடப்பட்டுள்ளது.

நாளடைவில் பொதுமக்களின் போதிய ஒத்துழைப்பு மற்றும் மீறுவோர் மீது பேரூராட்சியின் போதிய நடவடிக்கைகள் சற்று குறைந்து காணப்பட்டதால் பிளாஸ்டிக் பைகளின் பயன்பாடுகள் நகரில் மீண்டும் தலை தூக்க ஆரம்பித்தன. இதனால் பிளாஸ்டிக் பைகளின் குப்பைகள் ஆங்காங்கே மலைபோல் குமிந்து காணப்பட்டதோடு மட்டுமல்லாமல் சுகாதாரத்திற்கு பெரும் அச்சுறுத்தலாகவே இருந்து வருகின்றன.

இதுகுறித்து அதிரை பேரூராட்சித் தலைவர்  S.H. அஸ்லம் அவர்களை 'அதிரை நியூஸ்' சார்பாக நகரின் மத்திய பகுதியில் குமிந்து காணப்படும் குப்பை அருகே சந்தித்து அவர்களின் கருத்தைப்பெற்றோம்.