இடிந்து விழும் நிலையில் குடிநீர் பம்பிங் ரூம் ! அச்சத்தில் பொதுமக்கள் !!

நடப்பு [ 2013-2014 ] ஆண்டில் அதிரை பேரூராட்சியின் பொதுநிதி ரூ 5.80 லட்சம் மதிப்பீட்டில் காட்டுக்குளம் மேட்டில் கட்டி முடிக்கப்பட்ட  குடிநீர் பம்பிங் ரூம் இடிந்து கீழே விழும் நிலையில் இருப்பதால் அப்பகுதியின் வசிக்கும் பொதுமக்கள் அச்சத்தில் உள்ளனர். அதிரை பேரூராட்சி நிர்வாகம் இது தொடர்பாக உடனடியாக கவனத்தில் எடுத்துக்கொண்டு துரித நடவடிக்கை மேற்கொள்ள வேண்டும் என பொதுமக்கள் கோரிக்கை விடுத்துள்ளனர்.

இதுகுறித்து 'சமூக ஆர்வலர்' KMA ஜமால் முஹம்மது நம்மிடம் கூறியதாவது...
'கடந்த சில மாதங்களுக்கு முன்பு காட்டுக்குள கரையில் அதிரை பேரூராட்சியின் சார்பில் அதிரையில் நிலவி வரும் குடிநீர் பற்றாக்குறையை போக்குவதற்காக கூடுதலாக போர்வெல் அமைத்து இதற்கு பம்பிங் ரூம் கட்டி இங்கிருந்து நேரடியாக பைப் மூலம் மேடான பகுதிகளுக்கு நேரடியாக குடிநீர் விநியோகம் செய்வதற்காக அமைக்கப்பட்டது.

இதில் கட்டி முடிக்கப்பட்ட குடிநீர் பம்பிங் கட்டிடம் அஸ்திவாரம் பலமாக இல்லாததால் அப்போதே இதுகுறித்து இந்த பணியை  எடுத்து நடத்திய காண்ட்ராக்டர், கட்டுமான ஊழியர்கள் கவனத்துக்கு எடுத்துச்சென்றேன். தற்போது காட்டுக்குளத்தில் ஆற்று நீர் நிரப்பட்டு போதுமான தண்ணீர் நிறைந்து காணப்படுகிறது. இதனால் மேட்டின் கரையில் உள்ள பம்பிங் கட்டிடம் மெதுவாக சரிந்து கீழே விடக்கூடிய அப்பாயச் சூழல் ஏற்பட்டுள்ளது. இந்த பகுதியில் வசிக்கும் பொதுமக்கள் அச்சத்தில் உள்ளனர். இது தொடர்பாக பேரூராட்சி நிர்வாகம் உடனடியாக கவனத்தில் எடுத்துக்கொண்டு துரித நடவடிக்கை மேற்கொள்ள வேண்டும்

அதிரை பேரூராட்சி நிர்வாகம் எவ்வித லாப நோக்கமின்றி பொதுநல நோக்கில் செயல்படும் தகுதியான நபர்களிடம் கட்டுமான பணிக்குரிய டெண்டர்களை ஒப்படைக்க வேண்டும். அப்போதுதான் இதுபோன்ற நிகழ இருக்கும் விபத்துகளை தவிர்க்க முடியும். கட்டுமானத்தின் போது தரமான பொருட்கள் பயன்படுத்தப்படுகிறதா ? என்பதையும், ஒப்பந்தத்தில் குறிப்பிட்டுள்ளபடி பணிகள் நடந்ததா என்பதையும் அவ்வபோது நடத்தும் ஆய்வுகள் மூலம் அறிந்துகொண்டால் இதுபோன்று தரமற்ற கட்டுமானங்களை தவிர்க்கலாம்.

மேலும் சாலைக்கும், குளத்திற்கும் எவ்வித தடுப்புகள் இல்லாத காரணத்தினால், குளத்தை ஆர்வத்துடன் பார்வையிட துடிக்கும் அப்பகுதியில் வசிக்கும் சிறுவர் சிறுமிகள், பள்ளி செல்லும் மாணவ மாணவிகள் குளத்தை ஒட்டிய மேட்டில் நடந்து செல்வதோ அல்லது குளத்தை பார்வையிட எட்டி பார்ப்பதையோ தவிர்க்கும்படி கேட்டுக்கொள்கிறேன். மேலும் அனைவரின் பார்வையில் படும்படி அப்பகுதியில் 'எச்சரிக்கை பலகை' வைப்பது வாகன விபத்தை தவிர்க்க உதவும்' என்றார்.