கீழே சாய்ந்து விழும் அபாய நிலையில் பிலால் நகர் குடியிருப்பின் முதல் மின்கம்பம் !

அதிரை மின்சார வாரிய எல்லைக்குட்பட்ட பகுதி பிலால் நகர். சுமார் 35 ஆண்டுகளுக்கு முன்பாக புதிதாக உருவாகிய இந்த பகுதியில் குடியிருப்புகள் வரத் துவங்கியது. இன்று ஆயிரத்திற்கும் மேற்பட்ட பொதுமக்கள் வசித்து வருகின்றனர்.

இந்நிலையில் முதல் குடியிருப்பு வந்தபோது குடியிருப்புதாரர் செலவில் சொந்தமாக போடப்பட்ட மின்கம்பம் தற்போது மிகவும் பழுதடைந்து காணப்படுகிறது. இதன் அடிப்பகுதி மிகவும் வலுவிழந்து கீழே சாய்ந்து விழுகின்ற அபாய நிலையில் இருப்பதால் மின்கம்ப இணைப்பில் உள்ள அனைத்து குடியிருப்புதாரர்களும் பெரும் அச்சத்தில் ஆழ்ந்துள்ளனர். எப்போது வேண்டுமானாலும் சாய்ந்து கீழே விழும் நிலையில் உள்ள இந்த மின்கம்பத்தால் அசம்பாவிதங்கள் ஏதும் நிகழாமல் இருக்க இந்த பகுதியில் புதிதாக மின்கம்பம் அமைத்து தர மின்சார வாரியம் உடனடி நடவடிக்கை எடுக்க வேண்டும் என பொதுமக்கள் கேட்டுக்கொண்டுள்ளனர்.