அதிரையில் வாக்காளர் அடையாள அட்டையில் ஆதார் எண்ணை சேர்க்கும் பணி தீவிரம் !

அதிரையில் வாக்காளர் அடையாள அட்டையில் ஆதார் எண்ணை சேர்க்கும் பணி தீவிரமாக நடைபெற்று வருகிறது. முதல் கட்டமாக கடந்த [ 12-04-2015 ] அன்று முகாம் நடைபெற்றது. இந்நிலையில் இரண்டாம் கட்டமாக இன்று காலை அதிரையில் உள்ள அனைத்து வாக்கு சாவடிகளிலும் சிறப்பு முகாம் நடைபெற்று வருகிறது. இதில் அரசு அலுவலர்கள் தேவையான தகவல்களை பொதுமக்களிடம் சேகரித்து வருகின்றனர். இதில் மாவட்ட வருவாய் அலுவலர் சிவ சவுந்திரவள்ளி முகாமிற்கு வருகை தந்து பணிகளை மேற்பார்வையிட்டார். அப்போது வட்டாட்சியர் சேதுராமன், துணை வட்டாட்சியர் கோபி, கிராம நிர்வாக அலுவலர் பால்ராஜ் ஆகியோர் உடனிருந்தனர்.

இதுகுறித்து தஞ்சை மாவட்ட ஆட்சியர் என். சுப்பையன் தெரிவித்திருப்பது:
தேசிய அளவில் வாக்காளர் பட்டியலை செம்மைப்படுத்தி விவரங்களை உறுதிப்படுத்தும் திட்டம் தொடங்கப்பட்டுள்ளது. இந்தத் திட்டத்தின் மூலம் வாக்காளர் அடையாள அட்டையுடன் ஆதார் அட்டை இணைக்கப்பட்டு பிழையற்ற தூய்மையான வாக்காளர் பட்டியல் தயார் செய்யப்படவுள்ளது.

இதற்காக ஏற்கெனவே ஏப். 12-ம் தேதி சிறப்பு முகாம் நடைபெற்றது. இதில், 46,595 பேரிடமிருந்து விவரங்கள் பெறப்பட்டன.

இதேபோல, மாவட்டத்தில் உள்ள அனைத்து வாக்கு சாவடி மையங்களிலும் இன்று சிறப்பு முகாம் நடைபெறவுள்ளது. இதில், வாக்காளர் அடையாள அட்டை எண், ஆதார் அடையாள அட்டை எண், சுய அல்லது குடும்ப உறுப்பினர்களின் செல்லிடப்பேசி எண், மின்னஞ்சல் முகவரி ஆகிய விவரங்களை வாக்கு சாவடி அலுவலரிடம் அளிக்க வேண்டும்.

இதில், 1.1.2015 அன்று தகுதி நாளாகக் கொண்டு 18 வயது நிறைவடைந்த வாக்காளர்கள் தங்களது பெயரை சேர்ப்பதற்குப் படிவம் 6-ஐயும், வாக்காளர்கள் தங்கள் பெயர் பல முறை வாக்காளர் பட்டியலில் இடம்பெற்றிருந்தால் நீக்கம் செய்வதற்குப் படிவம் 7-ஐயும், தங்களது விவரங்களைத் திருத்தம் செய்வதற்குப் படிவம் 8-ஐயும் அளிக்கலாம். மேலும், மே 10, 24-ம் தேதிகளில் இம்முகாம் நடைபெறவுள்ளது.