வாக்காளர் பட்டியலில் ஆதார் அட்டை இணைப்பதற்கு சிறப்பு முகாம் !

தஞ்சை மாவட்டத்தில் 2,135 வாக்குச்சாவடிகளில் வாக்காளர் அடையாள அட்டையுடன் ஆதார் அட்டை இணைப்பதற்கான சிறப்பு முகாம் வரும் 12ம் தேதி நடக்கிறது.இந்திய தேர்தல் ஆணையத்தால் கடந்த மார்ச் 3ம் தேதி முதல் தேசிய அளவில் வாக்காளர் பட்டியலை செம்மைப்படுத்தி விவரங்களை உறுதிப்படுத்தும் திட்டம் துவங்கப்பட்டுள்ளது. இத்திட்டத்தின் கீழ் வாக்காளர் அடையாள அட்டையுடன் ஆதார் அட்டை இணைக்கப்பட்டு பிழையற்ற பட்டியல் தயார் செய்யப்படவுள்ளது. இதன் முதல்கட்டமாக கடந்த மார்ச் 3ம் தேதி முதல் வாக்குச்சாவடி நிலை அலுவலர்கள் வீடுவீடாக சென்று வாக்காளர் அடையாள அட்டை எண், ஆதார் எண், சுய அல்லது குடும்ப உறுப்பினர்களின் கைபேசி எண் மற்றும் மின்னஞ்சல் முகவரி விவரங்களை சேகரித்து வருகின்றனர். இந்த விவரங்கள் கணினியில் பதிவு செய்யப்பட்டு வாக்காளர் அடையாள அட்டையுடன் ஆதார் அடையாள அட்டை இணைக்கும் பணி நடந்து வருகிறது.

தஞ்சை மாவட்டத்தில் 18 லட்சம் வாக்காளர்கள் உள்ளனர். இதில் 40 சதவீதம் வரை ஆதார் அடையாள எண், இமெயில், கைபேசி விவரங்கள் பெறப்பட்டுள்ளன. இதன்படி கடந்த 8ம் தேதி வரை 25 சதவீத வாக்காளர்களின் விவரங்கள் கணினியில் பதிவு செய்யப்பட்டுள்ளது. வரும் 12 மற்றும் 26 ம் தேதி, மே 10 மற்றும் 24ம் தேதிகளில் அந்தந்த வாக்குச்சாவடிகளில் சிறப்பு முகாம் நடத்தப்படுகிறது. இதில் வாக்காளர்கள் தங்களது வாக்காளர் அடையாள அட்டை எண், ஆதார் அடையாள அட்டை எண், சுய அல்லது குடும்ப உறுப்பினர்களின் கைபேசி எண், மின்னஞ்சல் முகவரி விவரங்களை வாக்குச்சாவடி அலுவலரிடம் அளிக்கலாம்.

மேலும் 1.1.2015ம் தேதியை தகுதி நாளாக கொண்டு 18 வயது பூர்த்தியடைந்த வாக்காளர்கள் தங்கள் பெயரை சேர்ப்பதற்கு படிவம் 6 ஐயும், வாக்காளர்கள் தங்கள் பெயர் பலமுறை வாக்காளர் பட்டியலில் இடம் பெற்றிருந்தால் அதை நீக்கம் செய்வதற்கு படிவம் 7 ஐயும், தங்களது விவரங்களை திருத்தம் செய்வதற்கு படிவம் 2 ஐயும் முகாம்களில் அளிக்கலாம். தஞ்சை மாவட்டத்தில் உள்ள 2,135 வாக்குச்சாவடிகளில் நடை பெறும் பணியை மேற்பார்வை யிட துணை தாசில்தார், வருவாய் ஆய்வாளர் நிலையில் 215 மேற்பார்வையாளர்கள் நியமிக்கப்பட்டுள்ளனர்.

மேலும் 8 துணை ஆட்சியர்கள் கண்காணிப்பாளர்களாக நியமிக்கப்பட்டுள்ளனர். வாக்காளர் பதிவு அலுவலர்கள் மற்றும் உதவி வாக்காளர் பதிவு அலுவலர்கள் தொடர்ந்து கண்காணித்து வருவதால் பணிகள் சிறப்பாக நடந்து வருகிறது. இவ்வாறு கலெக்டர் சுப்பையன் தெரிவித்துள்ளார்.