குடிநீர் வழங்காததை கண்டித்து சாலை மறியலில் ஈடுபட்ட பொதுமக்கள் [ புகைப்படங்கள் ] !

கடந்த சில நாட்களுக்கு முன்பு அதிரை பேரூராட்சிக்கு உட்பட்ட 11 வது வார்டு புதுத்தெரு பகுதிக்கு கடந்த 10 நாள்களாக குடிநீர் வழங்கப்படவில்லை என ஆத்திரமடைந்த இப்பகுதி பெண்கள் பேரூராட்சியை கண்டித்து கடந்த [ 30-11-2013 ] அன்று அலுவலக முற்றுகை போராட்டத்தில் ஈடுபட்டனர்.

மீண்டும் இன்று காலை 10 மணியளவில் 8, 9, 10 ஆகிய வார்டுகளில் கடந்த சில மாதங்களாக போதுமான குடிநீரை விநியோகிக்கவில்லை எனக்கூறி இப்பகுதி பொதுமக்கள் திரண்டு வந்து பேரூராட்சி எதிரே உள்ள ஈசிஆர் சாலையில் அமர்ந்து மறியலில் ஈடுபட்டனர். இதில் நூற்றுக்கும் மேற்பட்டோர் கலந்துகொண்டனர். இதனால் இந்த சாலை வழியே செல்லும் வாகனங்கள் புறப்படுவதில் தாமதமாகின.

தகவலறிந்த இன்ஸ்பெக்டர் ரவிச்சந்திரன் மற்றும் போலீசார் மறியலில் ஈடுபட்டோரிடம் பேச்சுவார்த்தை நடத்தினர். பொதுமக்களின் கோரிக்கையை மனுவாக தந்தால் சம்பந்தபட்டோரிடம் பேச்சுவார்த்தை நடத்தி நடவடிக்கை மேற்கொள்ளப்படும் என வேண்டுகோள் வைத்தனர். இருதரப்பினரையும் பேச்சுவார்த்தைக்கு அழைத்ததை அடுத்து மறியலில் ஈடுபட்ட அனைவரும் கலைந்து சென்றனர். இதனால் இந்தப்பகுதி முழுதும் பரப்பரப்பாக காணப்பட்டது.

இதைத்தொடர்ந்து வட்டாசியார் தலைமையில் இருதரப்பினரோடு நடத்திய பேச்சுவார்த்தையில் 8, 9, 10 ஆகிய வார்டு பகுதிகளுக்கு குடிநீர் சீராக வழங்குவற்குரிய தேவையான நடவடிக்கை விரைவாக மேற்கொள்ளப்படும் என உறுதியளித்தார்.