அதிரை நியூஸ் எந்தவொரு நபரின் மிரட்டலுக்கும் அடிபணியாது !

அதிரை நியூஸ் - 'உள்ளூர் நிகழ்வுகளை உடனுக்குடன்' வாசகர்களுக்கு வழங்க வேண்டும் என்ற அடிப்படையில் உருவாக்கப்பட்டதுதான் இந்த செய்திதளம். வணிகமற்ற பொதுநல நோக்கில் அதிரையில் வாழும் தன்னார்வலர்கள் இணைந்து அவர்களின் கடும் பணிச்சுமைக்கிடையில் அதிரையில் நடக்கும் நிகழ்வுகளை நேரடியாக களஆய்வு செய்து ஊடக தர்மத்திற்கு உட்பட்டு தளத்தில் செய்தியாகவும், தலையங்கமாகவும், நேர்காணலாகவும் பதியப்பட்டு வருகின்றன. செய்தி சேகரிக்கும் பணிகளுக்காக உள்ளூரிலும், வெளிநாடுகளிலும் வசிக்கும் சமூக ஆர்வலர்கள் சிலர் எங்கள் ஆர்வத்தை ஊக்குவிக்கும் விதமாக தொடர்ந்து செய்திகளையும், ஆலோசனைகளையும் அவ்வப்போது வழங்கியும் வருகின்றனர்.

அரசியல் செய்யும் கட்சிகள், சமுதாய அமைப்புகள், தன்னார்வ தொண்டு நிறுவனங்கள் ஆகியவற்றின் செய்திகள், மரண அறிவிப்புகள், அரசு அறிவிப்புகள், தகவல்கள், உதவி கோருதல், வணிகச்செய்திகள், அதிரையின் முக்கிய தகவல்கள், அதிரையில் புதிதாக தொழில் முனைவோரை ஊக்கும் விக்கும் விதமாக அவர்களின் தொழில்குறித்த தகவலை இலவசமாக வெளியிடுதல் உள்ளிட்ட பணிகளை தெரு பாகுபாடின்றி வழங்கி வருகின்றோம். உள்ளூர் செய்திகள் மட்டுமல்லாமல் அதிரையை சுற்றி இருக்கக்கூடிய ஊர்களில் நடைபெறும் முக்கிய நிகழ்வுகளையும் கூடுதல் செய்தியாக தளத்தில் பதிந்து வருகின்றோம்.

அதே போல் வெளிநாடுகளில் நடக்கக்கூடிய நிகழ்வுகளை அந்ததந்த நாடுகளில் வசிக்கும் தன்னார்வலர்கள் சிலர் அனுப்பி வைக்கும் மின்னஞ்சல் செய்திகளை நிர்வாகக்குழுவின் நெறிமுறைக்குட்பட்டு உடனுக்குடன் தளத்தில் பதியப்பட்டு, பதிந்த தகவலை அவர்களுக்கு முறையாக தெரியப்படுத்தி வருகின்றோம்.

இதுவரை அதிரையில் செயல்படும் எந்தவொரு அமைப்புகளும் எங்களிடம் தருகின்ற செய்திகளை, தொடர்ந்து புறக்கணிப்பதையோ அல்லது பதியாமல் வீட்டுவிடுவதோ இல்லை. அதேபோல் எந்தவொரு அமைப்பிற்கோ அல்லது அரசியல் செய்யும் கட்சிகளுக்கோ சார்பு / எதிர்ப்பு என்ற நிலையிலும் இருந்ததில்லை.

அதே போல் அதிரையில் உள்ள எந்தவொரு பகுதிகளிலும் நிகழும் செய்திகளை தொடர்ந்து புறக்கணிப்பதோ அல்லது எங்கள் பகுதியின் செய்தி இந்த வலைத்தளத்தில் வரவில்லையென யாரும் எங்களிடம் குறை கூறாத வகையில் தேடிச்சென்று செய்திகளை சேகரித்து வழங்கி வருகிறோம்.

தளத்தில் பதியும் செய்திகளுக்காக வாசகர்கள் வழங்கும் கருத்துகள் கருத்துரிமை என்ற அடிப்படையில் அனைத்தையும் மட்டுறுத்தலின்றி அனுமதிக்கப்பட்டு வருகிறோம். தவிர வசை மொழிகள் / தகாக் கருத்துக்கள் / Anonymous - ஆகியன முன்னறிவிப்பின்றி நீக்கியும் வருகிறோம். பதிவுக்கு தொடர்பில்லாத பின்னூட்டங்கள் தொடரும் பட்சத்தில் பின்னூட்டப்பகுதியை முன்னறிவிப்பின்றி நிறுத்தியும் வைக்கின்றோம்.

அதேபோல் தளத்தில் பதியும் செய்திகளில் ஏதேனும் சமூக ஒற்றுமைக்கு பங்கம் விளைவிக்கும் படி அமைந்து இருந்து எங்களின் கவனத்துக்கு வரும் பட்சத்தில் இதுபோன்ற பதிவுகளை வாசகர்களின் உணர்வுகளுக்கு மதிப்பளிக்கும் விதத்தில் முன்னறிவிப்பின்றி நீக்கியும் விடுகின்றோம்.

சரி விசயத்திற்கு வருவோம்...
அதிரையின் வறண்ட குளங்களுக்கு நீர்ஆதாரத்தை கொண்டு வருவதற்காக கடந்த சில நாட்களாக அதிரை வாழ் சமூக ஆர்வலர்கள் ஒன்றிணைந்து செயல்பட்டு வருவது மிகுந்த மகிழ்ச்சியை தரக்கூடிய செயல். இவற்றை நாங்கள் வரவேற்கிறோம் - வாழ்த்துகிறோம். இவர்கள் நடத்திய கூட்டங்களில் அழைப்பின் பேரில் தவறாது நாங்கள் கலந்துகொண்டு எங்களின் ஒத்துழைப்பையும், ஆலோசனையையும் அவர்களுக்கு வழங்க தவறியதில்லை. அவ்வப்போது இது தொடர்பான செய்திகளை அதிரை நியூஸ் தளத்தில் உடனுக்குடன் வழங்கி வந்தோம்.

இதுபோன்று அதிரையின் பல்வேறு பகுதிகளில் வசிக்கும் சமூக ஆர்வலர்களோ அல்லது அரசியல் செய்யும் கட்சிகளோ, சமுதாய அமைப்புகளாகளோ அதிரை பொதுநலன் சார்ந்த எந்தவொரு சேவைகளில் ஈடுபட்டாலும், இவர்கள் செய்யும் அரும்பணிகளை ஊக்குவிக்கும் விதமாக தளத்தில் செய்தியாக வெளியிடுவதை முதன்மையாக கொண்டுள்ளோம். இதில் எந்தவொரு சார்பு / எதிர்ப்பு நிலையில் என்றும் நாங்கள் இருந்ததில்லை.

கடந்த சில நாட்களுக்கு முன்பு அதிரையில் வாழும் குறிப்பிட்ட பகுதியினருக்காக அதிமுகவினர் மேற்கொண்ட பணியை புகைப்படங்களுடன் செய்தியாக சகோதர வலைத்தளமாகிய அதிரை போஸ்ட் வெளியிட்டது. இவற்றை அனுமதியின் பேரில் அதிரை நியூஸ் ஆசிரியரால் எடிட் செய்யப்பட்டு தளத்தில் செய்தியாக வெளியிடப்பட்டன.

கடந்த சில நாட்களாக மும்முரமாக அரும்பணிகளை மேற்கொண்டு வரும் அதிரை பேரூராட்சி தலைவர் இந்த செய்தியை தாங்கி வந்ததற்காக எங்களின் வலைதளத்தை கண்டித்து கருத்தை நேற்று வெளியிட்டுள்ளார். இந்த காணொளியை பார்வையிட்ட எங்களுக்கு பெறும் அதிர்ச்சியை வரவழைத்ததோடு மட்டுமல்லாமல் ஆச்சரியமாகவும் இருந்தது. இந்த செய்தியை பொறுத்தவரை எந்தவொரு நபர்கள் செய்யும் அரும்பணிகளை பற்றி குறை கூறுவதாக அமைந்திருக்கவில்லை. இவற்றை வாசித்த பெரும்பாலான வாசகர்களுக்கு நன்கு விளங்கும்.

இதுகுறித்து வலைதள நடத்துனரிடம் நேரடியாக கருத்தை பெற்று நேர்காணலை அதிரை வலைதளங்களுக்கு வழங்கியிருக்க வேண்டும். இந்த தளத்தை கண்டித்து செய்தி வெளியிடும் அளவிற்கு பிறர் பாதிப்படையும் செய்திகள் அதில் இடம்பெறவில்லை. தன்னார்வலர்கள் இணைந்து  பொதுநல நோக்கில் தனது சொந்த செலவினங்களில் தங்களை முழுமையாக ஈடுபடுத்திக் கொண்டு இந்த சேவையை செய்து வருகிறார்கள். இந்த செயலால் அவர்களின் மனது மிகவும் வேதனையடைந்துள்ளன.

அதிரை நியூஸை பொருத்தவரை ஊடக தர்மத்திற்கு உட்பட்டே செய்திகளை வாசகர்களுக்கு வழங்கி வருகின்றோம். எந்தவொரு நபரின் குறுகீடுகளுக்கு தலைசாய்பதோ அல்லது மிரட்டலுக்கு அடிபணிவதோ விரும்பாது என்பதை இதன் மூலம் தெரியப்படுத்திக்கொள்கிறோம்.

அதிரை நியூஸ் குழு