குடிநீர் வழங்ககோரி பொதுமக்கள் ஈசிஆர் சாலையில் மறியல் ! 1 மணி நேரம் போக்குவரத்து பாதிப்பு ! [ படங்கள் இணைப்பு ]

தஞ்சை மாவட்ட, பட்டுக்கோட்டை ஒன்றிய, ஏரிபுறக்கரை கிராம நிர்வாக எல்லைக்குட்பட்ட பிலால் நகர், ஆதம் நகர் பகுதிகளில் கடும் குடிநீர் பற்றாக்குறை ஏற்பட்டுள்ளது. கடந்த 10 நாட்களாக இப்பகுதிக்கு குடிநீர் வழங்கப்படாததால் ஆதம் நகரில் வசிக்கும் பெண்கள் உட்பட பொதுமக்கள் காலிக்குடங்களுடன் ஈசிஆர் சாலையில் அமர்ந்து மறியல் போராட்டத்தில் ஈடுபட்டனர். இதனால் இந்த பகுதி மிகுந்த பரபரப்பாக காணப்பட்டது.

தகவலறிந்த அதிரை காவல்துறை ஆய்வாளர் ரவிசந்திரன் தலைமையில் சம்பவ இடத்திற்கு விரைந்து வந்த போலீசார்கள் சாலை மறியல் ஈடுபட்டோரிடம் பேச்சுவார்த்தை நடத்தினார். அப்போது ஏரிப்புறகரை ஊராட்சி மன்ற தலைவர் மாலா முத்துகிருஷ்ணன், மோட்டாரில் பழுது ஏற்பட்டதால் குடிநீர் சீராக வழங்கபடவில்லை என்றும், இனிமேல் சீராக குடிநீர் வழங்கப்படும் என உறுதியளித்தார். இதைதொடர்ந்து காவல்துறை ஆய்வாளர் ரவிசந்திரன், இனிமேல் தகுந்த காரணமில்லாமல் குடிநீர் வழங்குதில் மீண்டும் குறை ஏற்பட்டு பொதுமக்கள் புகார் செய்தால் உங்கள் மீது சட்ட நடவடிக்கை மேற்கொள்ளபடும் என ஊராட்சி மன்ற தலைவர் மாலா முத்துகிருஷ்ணனை எச்சரித்தார்.

இதைதொடர்ந்து மறியலில் ஈடுபட்ட அனைவரும் கலைந்து சென்றனர். இந்த மறியலால் ஈசிஆர் சாலையில் சுமார் 1 மணி நேரம் போக்குவரத்து பாதிப்படைந்தது.

இதையடுத்து ஊராட்சி  மன்ற தலைவர்  மாலா முத்துகிருஷ்ணன் மற்றும் ஆதம் நகர் பொதுமக்களின் சார்பில் ஜமாத்தினரை காவல்நிலையத்திற்கு அழைத்து பேச்சுவார்த்தை தொடர்ந்து நடத்தப்பட்டது.