அதிரையில் உலக மலேரியா தின விழிப்புணர்வு முகாம் !

அதிரையில் இன்று அதிரை அரசு மருத்துவமனை, அதிரை பேரூராட்சி, அதிரை லயன்ஸ் சங்கம் ஆகியோர் இணைந்து நடத்திய உலக மலேரியா தின விழிப்புணர்வு முகாம் சிறப்பாக நடைபெற்றது.

இதில் சிறப்பு விருந்தினராக மாவட்ட சுகாதாரத்துறை இணை இயக்குனர் ஆ. சுப்பிரமணி பங்கேற்றார். இம்முகாமில் அரசு மருத்துவமனையின் மருத்துவர்கள், லயன் சங்கத் தலைவர் அஹமது, செயலாளர் பேராசிரியர் செய்யது அஹமது கபீர், பொருளாளர் சாகுல் ஹமீது மற்றும் லயன்ஸ் சங்க ஏனைய நிர்வாகிகள் ஜலிலா ஜுவல்லரி முஹம்மது மொய்தீன், லியோ சங்க நிர்வாகிகள் நியாஸ் அஹமது, அதிரை மைதீன் ஆகியோர் கலந்துகொண்டார்கள்.

மலேரியா குறித்து விழிப்புணர்வு துண்டு பிரசுங்கள் பொதுமக்களிடம் விநியோகிக்கப்பட்டது.

இதில் மலேரியா நோயை பரப்பும் கொசுக்கள் உற்பத்தியாகும் இடங்கள் பற்றி விவரிக்கப்பட்டது. மேலும் 5 முதல் 7 நாட்கள் வரை தொடர் காய்ச்சல். குளிருடன் கூடிய நடுக்கம். உடல்வலி, தலைவலி ஏற்பட்டால் மலேரியா நோயின் அறிகுறிகள் ஆகும்.

தீவிர மலேரியா நோயின் அறிகுறியாக அதிகமான காய்ச்சல், நினைவு இழத்தல், குழப்பமான மனநிலை, நடக்கமுடியாமை, மயக்கம், வாந்தி, சிறுநீர் பிரியாத நிலை, கடுமையான வயிற்றுப்போக்கு, மூக்கு மற்றும் ஈறுகளில் ரத்தக்கசிவு, ரத்தசோகை ஏற்படும். மேற்கூறிய அறிகுறிகள் தென்பட்டால் அருகில் உள்ள ஆரம்ப சுகாதாரநிலைய மருத்துவரை அணுக வேண்டும். அனைத்து ஆரம்ப சுகாதார நிலையங்களிலும் மலேரியா நோய்க்கான பரிசோதனையும், மருந்து மாத்திரைகளும் இலவசமாக வழங்கப்படுகிறது. இதனை தடுக்க, தூங்கும்பொழுது கொசுவலை பயன்படுத்த வேண்டும். வீட்டின் கதவு, ஜன்னல் போன்றவற்றில் கொசு புகாதவாறு வலை கட்ட வேண்டும். கொசுவிரட்டும் சாதனங்களை பயன்படுத்தலாம். வீட்டிலுள்ள உபயோகமற்ற பாத்திரங்களை அகற்ற வேண்டும் என பிரசாரத்தில் வலியுறுத்தப்பட்டது.