அதிரையில் எந்த கட்சி எத்தனை வாக்குகள் பெரும் ? Exclusive ரிப்போர்ட் !

அதிரை பேரூராட்சிக்கு உட்பட்ட மொத்தம் 21 வார்டுகளில் உள்ள 22,856 வாக்குகளில் நேற்று பதிவான வாக்குகள் 14,522 என்றும், இது சதவீதத்தில் 62.7 என்றும் தகவல் தெரிவிக்கின்றன.

நேற்று நடைபெற்ற வாக்கு பதிவின் போது அதிரையின் முக்கிய பகுதிகளில் வலம் வந்த அதிரை நியூஸ் குழுவினர் நேரடியாக சென்று திரட்டப்பட்ட தகவல், பொதுமக்கள், அரசியல் கட்சியினர், சமூக ஆர்வலர்கள் ஆகியோரிடம் பெறப்பட்ட தகவலின் அடிப்படையில் அதிரையில் பதிவான வாக்குகளில் எந்த கட்சிக்கு எத்தனை வாக்குகள் கிடைக்கும் என்பதை உத்தேசமாக கணித்து வழங்குகின்றோம். இதில் 500 க்கும் குறைவான வாக்குகள் பெற இருக்கும் கட்சிகள் இந்த லிஸ்டில் இடம்பெறவில்லை.

இந்த உத்தேச கணிப்பில் முதல் இடத்தை திமுகவும், இரண்டாம் இடத்தை அதிமுகவும், மூன்றாம் இடத்தை காங்கிரஸ் / பிஜேபி கட்சிகள் பெறுகின்றன.

திமுக பெறும் வாக்குகள் ( 7500 லிருந்து 10000 வரை )
அதிமுக பெறும் வாக்குகள் ( 4000 லிருந்து 6000 வரை )
காங்கிரஸ் பெறும் வாக்குகள் ( 1200 லிருந்து 2000 வரை )
பிஜேபி பெறும் வாக்குகள் ( 1500 லிருந்து 2000 வரை )

திமுக ( )
அதிரையில் திமுக வை பொறுத்தவரை கடந்த காலங்களில் திமுகவின் கோட்டையாக திகழ்ந்து வருவதற்கு இஸ்லாமியர்களின் வாக்கு வங்கியும் ஒரு காரணம். அடுத்ததாக திமுக சார்பில் தற்போது நிறுத்தப்பட்டிருக்கும் பலமான வேட்பாளர். கூட்டணி கட்சிகளாகிய மமக, முஸ்லீம் லீக், எஸ்டிபிஐ, ததஜ ஆகியவற்றின் பலமான ஆதரவு மற்றும் இக்கட்சியினர் ஆற்றிய களப்பணி ஆகியன கூடுதல் வாக்குகள் கிடைக்க காரணமாக அமையும் என்கின்றனர்.

கடைசி நேரத்தில் உடன் பிறப்புகளை கண்டுகொள்ளாமல் விட்டதும் பெரும் குறையாக கருதப்படுகிறது. குறிப்பாக ஆரம்பத்தில் திமுகவிற்காக தேர்தல் பணி செய்தவர்கள் கடைசி நேரத்தில் பிற கட்சிகளுக்காக சென்று வாக்கு சேகரிப்பில் ஈடுபட்டது. மேலும் வாக்கு சேகரிப்பில் தனித்தனி கோஷ்டிகளாக இருந்து செயல்பட்டதும் வாக்குகள் சிதற காரணமாக அமைந்துவிட்டதையும் குறிப்பிடுகின்றனர்.

அதிமுக ( )
கடந்த உள்ளாட்சி தேர்தலில் பேரூராட்சி தலைவர் பதவிக்கு போட்டியிட்ட அதிரை அப்துல் அஜீஸ் இரண்டாம் இடத்தை பெற்றார். அதிரையின் முக்கிய பகுதிகளை 'கவர்' செய்து வாக்கு சேகரித்தது எதிர் பார்த்ததை வீட சற்று கூடுதலான வாக்குகள் கிடைக்கும் என்றும், தேர்தல் ஆணைய அலுவலர்களின் ஒத்துழைப்பு, வாக்காளர் லிஸ்டில் குறிப்பிட்ட நபர்களின் பெயர்கள் விடுபட்டுபோனது எதிர் அணியினர் அதிக வாக்குகள் பெற இயலாமல் போவதற்கு காரணமாக அமைந்திருப்பது இக்கட்சிக்கு சாதகமாக அமைந்துவிட்டது என குறிப்பிடுகின்றனர்.

கடைசி நேரத்தில் ததஜ அமைப்பினர் அதிமுகவிற்கு அளித்து வந்த ஆதரவை வாபஸ் பெறுகிறோம் என்ற அறிவிப்பால் கட்சி பெறக்கூடிய கூடுதல் வாக்குகள் குறைந்துள்ளதாகவும், அதிரையில் உள்ள குறிப்பிட்ட சில ஏரியாக்களில் 'கவர்' செய்யாதது குறித்தும் பரபரப்பாக பேசப்பட்டு வருகிறது.

காங்கிரஸ் ()
மேலத்தெரு, தரகர் தெரு, முத்தம்மாள் தெரு, கரையூர் தெரு, காந்திநகர், பழஞ்செட்டி தெரு ஆகிய பகுதிகளில் விழுந்துள்ள பாரம்பரிய வாக்குகள் தவிர புதிதாக விழுவதற்கு வாய்ப்பில்லை என்றும் தகவல்கள் தெரிவிக்கின்றன.

பிஜேபி ()
சமீபத்தில் நிகழ்ந்த மல்லிபட்டினம் கலவரத்திற்கு பிறகு வேட்பாளர் மீது தனிக்கவனம் செலுத்தப்பட்டுள்ளது என்றும், குறிப்பாக கரையூர் தெரு, சால்ட் லேன், பிள்ளைமார் தெரு, காந்தி நகர், பழஞ்செட்டி தெரு, வள்ளியம்மை நகர், செட்டித்தோப்பு காலனி ஆகிய பகுதிகளில் வசிக்கும் பெரும்பாலான இந்து சமூகத்தினர் இவருக்கு வாக்குகள் செலுத்திருப்பதாக தகவல் தெரிவிக்கின்றன.

மேலும் நகரில் வலம்வந்த நாம், வாக்காளர் லிஸ்டில் தங்களின் பெயர் விடுபட்டுள்ளது என முக்கிய பகுதிகளில் உள்ள பொதுமக்கள் ஆதங்கமடைந்தததை காணமுடிந்தது.

கடந்த சில மாதங்களுக்கு முன்பு தேர்தல் ஆணையம் சார்பில் வெளியிடப்பட்ட உத்தேச பட்டியிலில் அனைத்து வாக்காளர்களின் பெயர்களும் உள்ளதா ? என சரிபார்க்க அழைப்பு விடப்பட்டது. இவற்றை எந்தவொரு கட்சியினரும், அமைப்பினரும், சமூக ஆர்வலரும் கவனத்தில் எடுத்துக்கொள்ளாதது பெரும் வருத்தத்திற்குரியது.

அதிரை நியூஸ் குழுவினர்