மீன்பிடி தடைக்காலம் இன்று தொடக்கம் !

மீன்பிடி தடைக்காலம் இன்று முதல் தொடங்குகிறது. ஏப். 15 முதல் மே 29-ஆம் தேதி வரை விசைப்படகுகள் மற்றும் இழுவைப்படகுகள் மூலம் மீனவர்கள் கடலில் மீன்கள் பிடிக்கக் கூடாது என்றும், எக்காரணத்தைக் கொண்டும் இப்படகுகள் தங்குதளத்தினை விட்டு கடலுக்குள் செல்லக்கூடாது எனவும் ஆட்சியர் என். சுப்பையன் தெரிவித்துள்ளார்.

இதுகுறித்து அவர் வெளியிட்ட அறிக்கையில், 
தமிழ்நாடு கடல் மீன்பிடிப்பு ஒழுங்குமுறைச் சட்டம் 1983-ன் படி, தமிழகத்தின் கிழக்கு கடற்பகுதியில், மீன்களின் இனப்பெருக்க காலமான ஏப்ரல், மே மாதங்களில், மீன்வளத்தை பாதுகாத்து, உற்பத்தியை அதிகரிக்க வசதியாக ஆண்டுதோறும் ஏப்ரல் 15-ஆம் தேதி முதல் மே 29-ஆம் தேதி வரை 45 நாட்களுக்கு விசைப்படகுகள் மற்றும் இழுவைப்படகுகள் மூலம் மீன்பிடிப்பது தடை செய்யப்பட்டு வருகிறது.

இதன்படி, மீன்பிடித் தடைக்காலம் இன்று ( புதன்கிழமை) தொடங்குகிறது என ஆட்சியர் தெரிவித்துள்ளார். தடைக்காலம் தொடங்குவதால், மீன்களின் விலை மேலும் அதிகரிக்கும் என எதிர்பார்க்கப்படுகிறது.