கோர விபத்தில் சிக்கி எட்டு ஆலிம்கள் பரிதாப மரணம் !

பள்ளப்பட்டி சுன்னத் ஜமாத் மக்தூமிய்யா மதரஸாவை சேர்ந்த எட்டு ஆலிம்கள் கொடைக்கானலில் இருந்து திண்டுக்கல் நோக்கி வாகனத்தில் பயணம் செய்துள்ளனர். அதே சாலையில் முசிறியில் இருந்து கேரளா நோக்கி படுவேகமாக லாரி எதிரே வந்துள்ளது. இரண்டு வாகனங்களும் சித்தையன் கோட்டை அருகே வந்தபோது, வாகனத்தின் மீது  லாரி நேருக்கு நேர் பயங்கரமாக மோதியதில் வாகன ஓட்டுனர் மோகன், வாகனத்தில் பயணம் செய்த தமிம் அன்சாரி அலி (25), அபிசாலி (25), சையது இப்ராகிம் (25), அப்துல் ரகுமான் (35), ஹலிவுல்லா (25), பசீர்வுல்லா (35) ( இருவரும் அண்ணன், தம்பிகள்), அப்துல் ரகீம் (கடலூர் மாவட்டம் இறையூரைச் சேர்ந்தவர் ), அலிபா ஆகியோர் சம்பவ இடத்தில் உடல் நசுங்கி பரிதாபமாக உயிரிழந்தனர். இவர்கள் அனைவரும் ஆலிம்கள் ஆவார். சேலத்தைச் சேர்ந்த கலில் ரகுமான் (46) படுகாயங்களுடன் மேல் சிகிச்சைக்காக மதுரைக்கு அனுப்பி வைக்கப்பட்டார்.

இந்த விபத்தால், 1.30 மணி முதல் 3.30 மணி வரை இரண்டு மணி நேரம் செம்பட்டி - வத்தலக்குண்டு ரோட்டில் போக்குவரத்து பாதிக்கப்பட்டது. உயிரிழந்தவர்களின் உடல்கள் திண்டுக்கல் தலைமை அரசு மருத்துவமனைக்கு பிரேத பரிசோதனைக்காக கொண்டு செல்லப்பட்டது. டேங்கர் லாரியை ஓட்டி வந்த டிரைவர் மற்றும் கிளீனர் சம்பவம் நடந்தவுடன் அந்த இடத்தைவிட்டு தப்பியோடிவிட்டனர். இந்த சம்பவத்தை அறிந்த பள்ளப்பட்டியில் உள்ள உறவினர்கள், நண்பர்கள் திண்டுக்கல் தலைமை அரசு மருத்துவமனையில் குவிந்தனர். ஒரே நேரத்தில் ஒன்பது பேர் உயிரிழந்து இருப்பது பெரும் அதிர்ச்சியையும், பரபரப்பையும் ஏற்படுத்தியுள்ளது.

இன்னா லில்லாஹி வ இன்னா இலைஹி ராஜிவூன்.

அன்னார்களின் மறுமை வாழ்வு சிறக்க துவா செய்வோம்.