அமெரிக்கா கலிபோர்னியாவில் வரலாறு காணாத வறட்சி !

கலிபோர்னியாவில் வரலாறு காணாத தண்ணீர் வறட்சி நிலவி வருவதால் மக்கள் பெரும் சிரமத்திற்கு ஆளாகியுள்ளனர். அமெரிக்காவின் கலிபோர்னியா மாகாணத்திற்கு தேவையான தண்ணீர், பனிக்கட்டிகள் உருகுவதன் மூலமாக கிடைத்து வந்தது. ஆனால், தொடர்ந்து நான்கு ஆண்டுகளாக சுமாராக நிலவி வந்த பனிப்பொழிவால் தொடர் வறட்சி ஏற்பட்டுள்ளது.

இந்நிலையில், இந்த பிரச்சனையை சமாளிக்கும் விதமாக தண்ணீர் பயன்பாட்டை 25 சதவிகிதம் குறைக்க ஆளுநர் உத்தரவிட்டுள்ளார்.

இதுகுறித்து ஆளுநர் ஜெர்ரி புரவுன் கூறுகையில், நாம் 5 அடி பனிக்குமேல் நிற்பதற்கு பதிலாக வெறும் தரை மீது நின்றுகொண்டிருக்கிறோம். இது மிகவும் ஆபத்தான அறிகுறி. கடுமையான பல சட்டங்கள் மூலம் இதை தடுக்க வேண்டிய அவசியம் ஏற்பட்டுள்ளது.

இந்த புதிய அறிவிப்பின்படி, கோல்ப் மைதானங்கள், அலங்கார புல்வெளிகள், தொழில் பூங்கா, கல்லறைகள் போன்றவைகளுக்கு கொடுக்கப்பட்டு வந்த நீரின் அளவில் 25 சதவிதம் குறைக்கப்பட்டு உள்ளது.

இதை அமல்படுத்தாதவர்கள் மீது 10 ஆயிரம் டாலர் அபராதம் விதிக்கவும் முடிவு செய்யப்பட்டுள்ளது. விவசாயத்திற்கு அளிக்கப்படும் நீரின் அளவு ஏற்கனவே கடுமையாக குறைக்கப்பட்டுள்ளதால் இந்த கட்டுப்பாடுகள் அவர்களுக்கு பொருந்தாது என கூறியுள்ளார்.