அதிரை குளங்களுக்கு தண்ணீர் வரத்து அதிகரிப்பு ! மகிழ்ச்சியில் மக்கள் !!

கடந்த [ 07-01-2013 ] அன்று மாலை 6 மணி முதல் அதிரையின் வறண்ட குளங்களுக்கு மீண்டும் தண்ணீர் திறந்துவிடப்பட்டதை அடுத்து நமதூர் குளங்களுக்கு தண்ணீர் சீராக வந்துகொண்டிருக்கின்றன.

நீர் வரத்து கடந்த நள்ளிரவு முதல் அதிகமாக வருவதால் V.K.M ஸ்டோர் அருகில் உள்ள வாய்க்கால் உடைப்பு ஏற்பட்டது. உடைப்பை அடைப்பதற்காக மணல் மூட்டைகளை வைத்து தடுக்க முயற்சி மேற்கொள்ளப்பட்டது. இந்த முயற்சி தோல்வியில் முடிந்ததை அடுத்து சம்சுல் இஸ்லாம் சங்கம் மற்றும் தாஜுல் இஸ்லாம் சங்க நிர்வாகிகளின் ஆலோசனைக்கு பிறகு, தாஜுல் இஸ்லாம் சங்க நிர்வாகிகள் மரைக்கா குளத்திற்கு செல்லும் சிஎம்பி வாய்க்கால் இணைப்பில் உள்ள குழாயில் தடுப்பு வைத்து தண்ணீரின் வேகத்தை குறைத்துனர். வேகத்தை குறைத்ததை அடுத்து மரைக்கா குளத்திற்கும், தண்ணீர் முழுமையாக நிரம்பாமல் உள்ள செக்கடி குளத்திற்கு தண்ணீர் வரத்து சீராக சென்றுகொண்டிருக்கின்றன. இதனால் இந்த பகுதியில் வாழும் பொதுமக்கள் மிகுந்த மகிழ்ச்சியுடன் காணப்படுகின்றனர்.

நேற்று பார்வையிட்டதை போல் மீண்டும் இன்று காலை சம்சுல் இஸ்லாம் சங்கத்தின் துணைதலைவர் ஹாஜி M.S. ஷிஹாப்புதீன், தாஜுல் இஸ்லாம் சங்கத்தின் துணைதலைவர் P.M.K தாஜுதீன், செயலாளர் ஜஃபருல்லா மற்றும் அதிமுக கட்சியின் பொதுக்குழு உறுப்பினரும், தஞ்சை தெற்கு மாவட்ட சிறுபான்மையினர் நலபிரிவின் செயலாளருமாகிய அதிரை அப்துல் அஜீஸ் மற்றும் சமூக ஆர்வலர்கள் உள்ளிட்ட அப்பகுதியின் இளைஞர்கள் பலர் தண்ணீர் வரத்து அதிகமாக வருவதை பார்வையிட்டனர்.

தண்ணீர் வரத்தை மீண்டும் தொடர்ந்து சில நாட்களுக்கு நமதூருக்கு கொண்டு வருவதற்கு உரிய முயற்சிகள் ஏற்பாட்டளர்களால் மேற்கொள்ளப்பட்டு வருகின்றன. இந்த முயற்சி வெற்றிபெற்றால் சிஎம்பி வாய்க்கால் இணைப்பில் உள்ள ஒவ்வொரு குளங்களுக்கும் ஒன்றபின் ஒன்றாக தண்ணீர் நிரப்பப்படும் என தெரிகிறது. வாய்க்காலில் உடைப்பு - அடைப்பு ஏற்படாதவாறு ஆங்காங்கே இளைஞர்கள் பலர் தொடர்ந்து கண்காணித்து வருகின்றனர்.

செக்கடி குளத்திற்கு தண்ணீர் சீராக சென்றுகொண்டிருக்கும் காட்சி